Летописи

Выбранные теги: Очистить

Вокняжение,


Новгородская первая младшего извода

Новгородская Карамзинская

Софийская первая летопись

Тверская летопись

1015

Княжение Святополче. Святоплък же Окаанныи нача княжити в Киевѣ, и съзва люди, нача даяти коръзна, а другымь кунами, и раздая множество всего. Ярославу же тогда бывшу в Новѣградѣ, не вѣдущу отца своего смерти, кормяше варягы, бояся рати. Варязи же бяху мнози у Ярослава, и насилье творяху новгородцемь и женамь их. И вставше ркошя новгородци: «Сего мы насилья не можем терпѣти». И събрашася в нощь, и избишя варягы в дворѣ Поромонѣ. И разгнѣвася Ярослав, и шед на Ракому, сѣде в дворѣ, посла к новгородцем, рече: «Уже мнѣ сих не крѣсити». И позва к собѣ нарочитыа мужи тысящу, иже бяху изсѣкли варягы ты, оболстив их изсѣче, а друзии бѣжашя из града; в ту же нощъ приде ему вѣсть ис Киева от сестры его Передславы: Отець ти умерлъ, а Святоплъкъ сѣдит в Киевѣ, убивъ Бориса и Глѣба, а ты блюдися сего повелику. И се слышав, Ярослав печален бысть о отци и о дружинѣ; заутра же събрав избыток новгородцев, и створи вѣче на поли Ярослав, и рече к ним: Любимаа моя дружино, иже вчера избих в безумьи моем, не топерво ми их златом окупати, а нынече надобни. И утеръ слезы, рече имь: Братье, отець мои умерлъ есть, а Святополък сѣдит в Киевѣ, избиваа братю свою; хощу на нь поити, потягнѣте по мнѣѣ. И рѣша ему новгородци: Аще княже и братья нашя избита суть, а мы можемь с тобою ити. И събра Ярослав варягъ тысящу, а прочих вои 40 тысящ, и поиде на Святополъка, нарек Бога, и рече: Не аз начях избивати братью, но он, да будет отместникь Богъ крови брати моеи, зане без вины пролья кров Борисову и Глѣбову праведною; егда и мнѣ сице же створит, но суди ми, Господи, по правдѣ, да скончается злоба грѣшнаго. И поиде на Святополка. Слышав же Святоплъкъ идуща Ярослава, пристрои без числа вои, руси и печенѣгъ, и изыде противу к Любцу об онъ пол Днепра, а Ярослав о другыи.

Теги: Вокняжение, Киев, Киевский, Князь, Новгород, 1015, 6523, Борис Владимирович, Варяги, Глеб Владимирович, Двор, Днепр, Любеч, Муромский, Новгородцы, Печенеги, Предслава Владимировна, Ракомо, Река, Ростовский, Русские, Святополк Владимирович, Ярослав Владимирович, Поромона,

1016

В лѣто 6524. Начало княжениа Ярославля в Киевѣ. Прииде на Святоплъка и сташя противу собѣ обаи полы Днепра. И не смѣют ни си онѣх, ни они сих почати, и стояша три месяци противу себѣ, не смѣаху ступитися. И нача воевода Святополчь, именем Влъчии Хвостъ, ѣздя възлѣ брегъ, укаряти новгородци, глаголя: Почто приидосте с хромцем симъ? А вы плотници суще, приставимъ вы храмовъ рубити. Се слышавше новгородци, рѣша Ярославу, яко: Заутра перевеземся на нь; аще ли кто не идеть с нами, то сами посѣчемъ и. Бѣ бо уже в замороз, а Святоплък стоаше межи двѣма озерома, и всю нощь пилъ бѣ с дружиною своею. И нача Днепръ мерзнути, и бяше Ярославу муж в приазнь у Святоплъка, и посла к нему Ярослав отрокъ свои нощию, рече к нему он сии: Что ты тому велиши творити, меду мало варено, а дружины много. И отрече ему муж тои: Рцы тако Ярославу: да аще меду мало, а дружины много, да к вечеру дати. И разумѣв Ярослав: яко в нощъ велит сещися. И заутра, исплъчився съ дружиною своею, противу свѣта перевезеся на ону страну Днепра. И высѣде на брегъ, и отринушя лодья от брега; и тои нощи поидошя противу собѣ на сѣчю. И рече Ярослав друженѣ: Знаменаитеся, повиваите главы себѣ убрусом. И сступишася на мѣстѣ, и бысть сѣча зла, и не бѣ лзѣ озером печенѣгом помогати; и притиснушя Святоплъчи вои къ озеру, и въступиша на лед, и обломися с ними лед, и нача одоляти Ярослав, Святоплък же побѣже, и одолѣ Ярослав. А Святоплък бѣжа в Ляхи, и сѣде Ярослав в Киевѣ на столѣ отца своего и дѣда. Бѣ бо тогда Ярославъ 28 лѣт.

Теги: Воевода, Вокняжение, Киев, Киевский, Князь, 1016, 6524, Волчий Хвост, Днепр, Новгородцы, Печенеги, Польша, Река, Святополк Владимирович, Ярослав Владимирович,

1024

И възвратився Ярослав, приде к Новуграду. И посла за море по Якуна, по Варяжского князя, и по варягы. И прииде Якунъ с варягы къ Ярославу; и бѣ Якунъ слѣпъ, и луда бѣ у него вся златом исткана. И иде Ярослав съ Якуном на Мстислава к Чернигову; Мстислав же слышав, изыде противу има на сѣчю к Листвену. Тогда бяше осень, и ту ся стрѣтошя. Мстислав же с вечера исполчивъ дружину, и постави северу в чело противу варягомъ, а самь ста с дружиною своею по крилома. И бывши нощи рябино и бысть тма, и громъ шибаше, и молния, и дождь. И рече Мстислав дружинѣ своеи: Поидем на нь, то ны есть користь. И поиде Мстислав и Ярослав противу собѣ, съступися чело северо с варягы, и трудишася варягы, сѣкуще северу, и по семь наступи Мстислав с дружиною и нача сѣчи варягы. И бысть сѣчя зла и страшна; яко посветяшеся молниа, тако блещашеся оружие, и елико же молниа освѣщаше, толико мечи видяху. И тако друг друга убиваше; и бѣ гроза велика и сѣча силна. Видѣв же Ярослав, яко побѣжаем есть, и побѣже съ Якуномъ, княземь Варяжскым, и Якун же ту отбѣжа луды своея златыа; и тако побѣди Мстислав Ярослава и Якуна. Ярослав же приде к Новугороду, а Якун иде за море и тамо умре. Мстислав же, освѣтъ заутра, видѣ лежаща изсѣчены от своих сѣверо и варягы Ярославли, и рече: Кто сему не рад? Се, лежит севярянин, а се варягъ, а дружина своя цѣла. И посла Мстислав по Ярослава, глаголя: Сяди на своемь столѣ в Киевѣ, понеже ты еси болшии брат, а мнѣ буди сиа сторона. И не смѣ Ярослав поити, дондеже смиристася; бѣше же сѣдяще в Киевѣ мужи Ярославли.

Теги: Вокняжение, Киев, Киевский, Князь, Новгород, Тмутараканский, Чернигов, Черниговский, 1024, 6532, Варяги, Варяжский, Листвен, Мстислав Владимирович, Северяне, Якун, Ярослав Владимирович, Осень, Рябиновая ночь, Балтийское, Море,

Иде великии князь Ярославъ съ Якуномъ на Мьстислава къ Чернигову. Мьстиславъ же, слышавъ, изыде противу има на сѣчю къ Листвену, и бяше осень, и ту ся срѣтоша. Мьстиславъ же с вечера исполчивъ дружину, и постави северу въ чело противу варягомъ, а самъ ста съ дружиною своею по крылома. И бывши нощи рябинои, бысть тма, и громъ шибааше, и молния, и дождь. И рече Мьстиславъ своимъ: «Поидемъ на нихъ, то ны есть корысть». И поиде Мьстиславъ и великии князь Ярославъ противъ, и ступишася в чело севера с варягы, и трудишася варягы, сѣкущи северу. И по семь наступи Мьстиславъ съ своими, и нача сѣчи варягы, и бысть сѣча зла и страшна, яко посвѣтяаше молния, тако блещаашеся оружие, и елико же молния освѣтяаше, тако мечи видяаху, и другъ друга усѣкааше, и бѣ гроза велика и сѣча силна. Видѣвъ же ся великии князь Ярославъ, яко побѣжаемъ есть, и побеже съ Якуномъ, княземъ варяжьскым, и Якунъ же ту отбѣжа луды своея златые, и тако побѣди Мьстиславъ великаго князя Ярослава и Якуну. Ярославъ же прииде къ Новугороду, а Якунъ иде за море и тамо умре. Мьстиславъ же освѣтъ заутра видѣ лежаща иссѣчены от своихъ сѣверо и варягы великаго князя Ярослава и рече: «Кто сему не радъ? Се лежить сѣверянинъ, а се варягъ, а люди мои цѣлы». И посла Мьстиславъ по великаго князя Ярослава, глаголя: «Сяди на своемъ столѣ въ Киевѣ, занеже ты еси болшии братъ, а мнѣ буди си страна». И не смѣявъ велики князь Ярославъ ити, дондеже смиристася, бѣша же сѣдяще в Киевѣ мужи Ярославли.

Теги: Вокняжение, Киев, Киевский, Князь, Новгород, Тмутараканский, Тмутаракань, Чернигов, Черниговский, 1024, 6532, Варяги, Варяжский, Листвен, Мстислав Владимирович, Северяне, Якун, Ярослав Владимирович, Осень, Рябиновая ночь, Балтийское, Море,

1034

В лѣто 6542 [1034]. Великы князь Мьстиславъ, братъ Ярославль, изыде на ловы, и тамо разболѣся и умре. И положиша и в Черниговѣ въ Святѣмъ Спасѣ, юже бѣ зачалъ самъ, бѣ бо въздѣлано и при немъ възвыше, яко и на конѣ досяци стоя. Бѣ же убо Мьстиславъ дебелъ тѣломъ, а лицемъ черменъ, велики имѣ очи, на рати храборъ и милостивъ, а боляре любя повелику, и имѣния не щадяаше, ни пития, ни ядения не браняаше. По семъ же прия власть его всю великии князь Ярославъ и бысть самовластець в Рустѣи землиа.

Теги: Вокняжение, Киевский, Князь, Погребение князя, Русь, Смерть князя, Церковь, Чернигов, Черниговский, Мстислав Владимирович, Ярослав Владимирович, 6542, Спасо-Преображенская, 1034,

Иде великии князь Ярославъ въ Новъгородъ и посади сына своего Владимера в Новѣгородѣ, и епископа постави Жиряту, и людемъ написа грамоту, рекъ: «По сѣи грамотѣ дадите дань». И бяше хромоногъ, но умомъ свершенъ, и храборъ на рати, и крестьянъ, чтяше самъ книгы.

Теги: Архиепископ, Вокняжение, Киевский, Князь, Новгородский, Поставление, Владимир Ярославич, Ярослав Владимирович, 6542, Жирята, 1034,

О смерти Мстиславли, брата Ярославля. Въ лѣто 6542 [1034]. Князъ великии Мстиславь Володимеричь Черниговскии изыиде на ловъ, и тамо разболѣся, и умре; и положиша его вь Черниговѣ вь святѣмъ Спасѣ, егоже самъ заложиль; бѣ бо въздѣлано при немъ възвыше яко на кони досячи стоа. Бѣ же убо Мстиславь дебель тѣломъ, а лицемъ чермень, очи великы имѣа, на рати храборъ, и милостивь, а боляре любя по велику, и имѣния не щадяаше, ни питиа, ни ядениа не браняаше, и милостивь бяше кь всѣмъ служащимъ ему. По немъ же приать всю власть его великии князь Ярославь , и бысть самовластець въ Руси.

Теги: Вокняжение, Киевский, Погребение князя, Русь, Смерть князя, Чернигов, Черниговский, Мстислав Владимирович, Ярослав Владимирович, 6542, Спасо-Преображенская, 1034,

1036

В лѣто 6544 [1036]. Мстислав, братъ Ярославль, изыде на ловы, и тамо разболѣся и умре; и положиша и в Черниговѣ у церкви святого Спаса, юже бѣ зачалъ сам; бѣ бо въздѣлано еи при немь въвыше, яко на кони стоя досячи. Бѣ же убо Мстислав дебелъ тѣлом, а лицемь чермен, великима очима, а на рати был храбръ и милостивъ, а дружину любляше по велику, и имѣниа не щадяше, ни питиа, ни ядениа не браняше. По сем же прия власть его всю Ярослав, и бысть самовластець в Рускои земли.

Теги: Вокняжение, Всеволод Ярославич, Киевский, Князь, Смерть князя, Церковь, Чернигов, Черниговский, Мстислав Владимирович, Спасо-Преображенская, 1036, 6544,

1057

В лѣто 6565 [1057]. Преставися Вячеславъ, сынъ Ярославль, въ Смоленьскѣ; и посади Игоря въ Смоленьскѣ, а изъ Володимиря выведше.

Теги: Вокняжение, Волынский, Князь, Смерть князя, Смоленск, Вячеслав Ярославич, Игорь Ярославич, 1057, 6565,

В лѣто 6565 [1057]. Преставися Вячеслав сынь Ярославль в Смоленстѣ, и посадишя Игоря, из Володимеря выведше.

Теги: Владимир Волынский, Вокняжение, Волынский, Князь, Смерть князя, Смоленск, Вячеслав Ярославич, Игорь Ярославич, 1057, 6565,

1064

В лѣто 6572 [1064]. Бѣжа Ростиславъ Тмутороканю, сынъ Володимирь, внукъ Ярославль; и с нимъ бѣжа Порѣи, Вышата, сынъ Остромирь, воеводы новгородчкого. И пришед выгна Глѣба ис Тьмутороканя, а самъ сѣде въ него мѣсто.

Теги: Воевода, Вокняжение, Глеб Святославич, Киевский, Князь, Новгородский, Тмутараканский, Тмутаракань, Ярослав Владимирович, Вышата Остромирович, 1064, 6572, Порей, Ростислав Владимирович,

В лѣто 6572 [1064]. Бѣжа Ростислав къ Тмутороканю, сынь Володимерь, внукъ Ярославль; и с ним бѣ Пореи, Вышата, сынь Остромирь, воеводы новгородского; и пришед, выгна Глѣба ис Тмутороканя, а сам сѣде в него мѣсто.

Теги: Воевода, Вокняжение, Глеб Святославич, Киевский, Князь, Новгородский, Тмутараканский, Тмутаракань, Ярослав Владимирович, Вышата Остромирович, 1064, 6572, Порей, Ростислав Владимирович,

1076

В лѣто 6584 [1076]. Преставися Святослав, сынь Ярославль, от рѣзаниа желвеи, и положен бысть в Черниговѣ у святого Спаса. И сѣд по нем на столѣ Всеволод.

Теги: 1076, 6584, Вокняжение, Всеволод Ярославич, Киевский, Князь, Погребение князя, Святослав Ярославич, Смерть князя, Церковь, Чернигов, Спасо-Преображенская,

В лѣто 6584. Преставися князя великаго сынъ Ярославль Святославъ, и положенъ бысть в Черниговѣ въ Святѣмъ Спасѣ. Сѣде по немъ княземъ великымъ на столѣ Всеволодъ.

Теги: 1076, 6584, Вокняжение, Всеволод Ярославич, Киевский, Князь, Погребение князя, Святослав Ярославич, Смерть князя, Церковь, Чернигов, Спасо-Преображенская,

1077

Въ лѣто 6585 [1077]. Прииде Изяславь съ ляхы на брата своего, великого князя Всеволода; онъ же вышедь противу его, смирися съ нимъ; и сѣде Изяславъ въ Киевѣ на великомъ княженіи, иуля 15, на память дѣда своего, а Всеволодъ въ Черниговѣ.

Теги: 1077, 6585, Вокняжение, Всеволод Ярославич, Изяслав Ярославич, Киев, Чернигов, 15 июля, Владимир Святославич, Поляки, Память,

1078

Убиение Глѣбово писано въ Киевьскомъ в шестое. Того же лѣта убиенъ бысть Глѣбъ Святославичь в Заволочии маия 30 и положенъ бысть в Черниговѣ за Святымь Спасомъ. Сѣде Всеволодъ опять на столѣ в Киевѣ и посади сына своего Владимера в Черниговѣ, а Ярополка в Володимерѣ, а Святополку сѣдящу Изяславичю в Новѣгородѣ, а Ярополку въ Вышегородѣ, а Володимеру въ Смоленьсцѣ.

Теги: 1078, 30 мая, 6587, Вокняжение, Вышгород, Вышгородский, Глеб Святославич, Заволочие, Киев, Киевский, Князь, Новгород, Новгородский, Погребение князя, Святополк Изяславич, Смоленск, Ссылка, Убийство князя, Чернигов, Черниговский, Ярополк Всеволодович, Ярополк Изяславич, Владимир Всеволодович,

1081

Вь лѣто 6589 [1081]. Давыдъ Игоревичь, внукь Изяславь, и Володарь Ростиславичь, внукь Владимира Новогородскаго Ярославича, сѣдоста Тмутороканю.

Теги: 1081, 6589, Вокняжение, Володарь Ростиславич, Волынский, Изяслав Ярославич, Киевский, Князь, Новгородский, Тмутаракань, Владимир Ярославич, Давыд Игоревич, Перемышльский,

1083

В лѣто 6591 [1083]. Прииде из Грек Олег в Тмуторокань и поимаша Давыда и Володаря Ростиславича, и сѣде ту в Тмуторокани, и сѣче козары, иже бѣша съвѣтни на убиение брата его и на самого, а Давыда и Володаря пусти.

Теги: 1083, 6591, Византия, Вокняжение, Володарь Ростиславич, Волынский, Князь, Новгород-Северский, Олег Святославич, Роман Святославич, Тмутараканский, Тмутаракань, Хазары, Давыд Игоревич, Перемышльский,

В лѣто 6591 [1083]. Прииде изъ Грекъ Олегъ Тмютороканю и я Давыда и Володаря Ростиславича. И сѣде Тмутороканю, и иссѣче козары, иже бѣша совѣтни на убиение брата его и на самого, а Давыда и Володаря пусти.

Теги: 1083, 6591, Византия, Вокняжение, Володарь Ростиславич, Волынский, Князь, Новгород-Северский, Олег Святославич, Роман Святославич, Тмутараканский, Тмутаракань, Хазары, Давыд Игоревич, Перемышльский,

Въ лѣто 6591 [1083]. Прииде Олегь изъ Грекь къ Томутороканю, и ятъ Давыда Игоревича и Влодаря Ростиславича, и сѣде на княжении Тмуторокани; и исѣче козары, иже сьвѣтни были на убиение брата его Романа Святославича и на самого о заточении, а Давыда и Володаря пусти.

Теги: 1083, 6591, Византия, Вокняжение, Володарь Ростиславич, Волынский, Князь, Новгород-Северский, Олег Святославич, Роман Святославич, Тмутараканский, Тмутаракань, Хазары, Давыд Игоревич, Перемышльский,

1085

Въ лѣто 6593 [1085]. Ярополкъ Изяславичь хотѣ ити на великого князя Всеволода, онъ же посла противу ему сына своего Володимера ис Чернигова, Ярополкъ же бѣжа въ Ляхы. Володимеръ же Всеволодичь посади въ Володимери Давыда Игоревича, а самь иде къ Луцку, и взя его и матерь Ярополкову, а великую княгиню Изяславлю, и княгиню Ярополчю, и дружину его поимавь приведе вь Киевь.

Теги: 1085, 6593, Владимир Волынский, Вокняжение, Волынский, Всеволод Ярославич, Киев, Киевский, Князь, Чернигов, Ярополк Изяславич, Княгиня, Польша, Владимир Всеволодович, Давыд Игоревич, Луцк, Кунигунда фон Орламюнде, Гертруда Польская,

1088

Въ лѣто 6596 [1088]. Святополкь иде изъ Новогорода къ Турову на княженіе; а въ Новѣгородѣ сѣде Давыдъ Святославичь; а болгари взяли Муромъ.

Теги: 1088, 6596, Болгары волжские, Вокняжение, Киевский, Князь, Муром, Новгород, Святополк Изяславич, Черниговский, Туров, Давыд Святославич,

1093

Того же лѣта сѣде Святополкъ Изяславичь в Киевѣ на столѣ отца своего. Сии же много пострада за землю Рускую и с погаными печенѣгы. Приидошаз половци на Рускую землю, Святополкъ же и Володимеръ Манамахъ бишася с ними об ону сторону Стугны. И бысть брань велика зѣло, и побѣжени быша от половцевъ грѣхъ ради нашихъ, ови от оружия и меча изъмроша, а другыи истопоша. Тогда же князь Ростиславъ Всеволодичь утопе, и мало Владимеръ не утопе, хотя помочи брату своему, и многое множество паде за Рускую землю. Святополкъ же прииде къ Киеву самъ третеи, а Володимеръ къ Чернигову, и бысть плачь велик, а не радость. Половци взяша градъ Торчевьскыи.

Теги: Вокняжение, Киев, Киевский, Князь, Переяславский, Половцы, Ростислав Всеволодович, Русь, Святополк Изяславич, Чернигов, Печенеги, Река, Владимир Всеволодович, 1093, 6601, Стугна, Торческ,

1114

Того же лѣта преставися благовѣрныи князь Михаило, зовомыи Святоплък; вниде Володимиръ на стол в Киев.

Теги: Вокняжение, Киев, Киевский, Князь, Новгородский, Переяславский, Смерть князя, Смоленский, Черниговский, Полоцкий, Ростовский, Владимир Всеволодович, Святополк Изяславич (Михаил), Туровский, 1114, 6622,

Того же месяца сѣде Владимеръ Манамахъ на великое княжение, на столѣ отца своего Всеволода, и устрои мостъ чрезъ Днѣпръ.

Теги: Вокняжение, Всеволод Ярославич, Киев, Киевский, Князь, Переяславский, Смоленский, Черниговский, Днепр, Ростовский, Владимир Всеволодович, Мост, 1114, 6622,

1117

В лѣто 6625 [1117]. Иде Мьстиславъ въ Киевъ на столъ из Новагорода марта въ 17; а сына посади в Новѣгородѣ Всеволода на столѣ.

Теги: Вокняжение, Вышгородский, Киевский, Князь, Новгород, Новгородский, Переяславский, Мстислав Владимирович, Ростовский, Псковский, Всеволод Мстиславич, Белгородский, 1117, 6625, 17 марта,

В лѣто 6625. Приведе Володимиръ Мстислава, сына своего, из Новаграда в Киевь, а в Новѣградѣ сѣде Всеволод Мстиславичь.

Теги: Вокняжение, Вышгородский, Киев, Киевский, Князь, Новгород, Новгородский, Переяславский, Смоленский, Черниговский, Мстислав Владимирович, Ростовский, Владимир Всеволодович, Псковский, Всеволод Мстиславич, Белгородский, 1117, 6625,

В лѣт(о) 6625. Приведе Владимеръ с(ы)на своего Мьстислава из Новагорода в Киевъ, а в Новѣгородѣ сѣде Всеволодъ Мьстиславичьа.

Теги: Вокняжение, Киевский, Князь, Новгородский, Переяславский, Смоленский, Черниговский, Мстислав Владимирович, Ростовский, Владимир Всеволодович, Белгородский, 1117, 6625,

Въ лѣто 6625 [1117], марта 17, князь Мьстиславъ Володимеричь иде изъ Новогорода кь Киеву, къ отцу, княживъ 22 лѣта по Давыдѣ Святославичи. И дасть ему отецъ Бѣльгородъ, понеже посылалъ по него; а въ Новѣгородѣ посади сына своего Всеволода на столѣ

Теги: Вокняжение, Вышгородский, Киев, Киевский, Князь, Новгород, Новгородский, Переяславский, Смоленский, Черниговский, Мстислав Владимирович, Муромский, Ростовский, Псковский, Давыд Святославич, Белгород Южный, Всеволод Мстиславич, Белгородский, 1117, 6625, 17 марта,

1118

Въ лѣто 6626 [1118]. Ярославь Святополчичь отсла отъ себе жену свою, дщерь Мьстиславлю, Володимерю внуку; про то поиде на нь князь великий Володимерь и з дѣтми къ Володимеру, онъ же убѣже вь Угры, и бояре его отступиша отъ него. Князь великий же посла въ Володимеръ сына своего Романа, онъ же преставися тамо; и посади князь великий другаго сына, Андрѣа.

Теги: Владимир, Владимир Волынский, Вокняжение, Волынский, Киевский, Князь, Новгородский, Переяславский, Смерть князя, Смоленский, Черниговский, Боярин, Мстислав Владимирович, Ростовский, Владимир Всеволодович, Ярослав Святополчич, Андрей Владимирович, Угры, Роман Владимирович, Белгородский, 1118, 6626, Углицкий,

1125

В лѣто 6633 [1125]. Преставися Володимиръ Великыи в Киевѣ, сынъ Всеволожь; а сына его Мьстислава посадиша на столѣ отнѣ.

Теги: Вокняжение, Всеволод Ярославич, Киев, Киевский, Князь, Смерть князя, Мстислав Владимирович, Владимир Всеволодович, 6633, 1125,

В то же лѣто посадиша на столѣ Всеволода новгородци.

Теги: Вокняжение, Князь, Новгородский, Новгородцы, Всеволод Мстиславич, 6633, 1125,

И посадиша новгородцы у себе Всеволода на столѣ.

Теги: Вокняжение, Князь, Новгородский, Всеволод Мстиславич, 6633, 1125,

В лѣто 6633. [1125] Преставися князь великыи Владимеръ Манамах, княживъ лѣтъ въ Киевѣ 13, а живе всѣх лѣтъ 73, украшенъ добрыми нравы и прослувыи в побѣдах за Рускую землю с погаными половци, его же имени вся страны трепетааху. И положенъ бысть въ церкви Святыя София в Киевѣ. И сѣде на столѣ в Киевѣ сынъ его стареиши Мьстиславъ, еще сы дѣтескъ.

Теги: Вокняжение, Киев, Киевский, Князь, Погребение князя, Половцы, Русь, Смерть князя, Церковь, Мстислав Владимирович, Софии, Владимир Всеволодович, 6633, 1125,

Того же лѣта посадиша новогородци Всеволода на столѣ.

Теги: Вокняжение, Князь, Новгородский, Новгородцы, Всеволод Мстиславич, 6633, 1125,

Въ лѣто 6633 [1125]. Преставися князь великии Владимеръ, въ Киевѣ, Всеволодичь Манамахъ, внукъ Ярославь, маа 19, княживъ лѣть 13, а живъ всѣхъ лѣть 73. И сѣде по немъ въ Киевѣ сынь его Мьстиславъ, а другыи сынь Ярополкь въ Переяславли; а Всеволодъ Мьстиславичь прииде изъ Новагорода кь отцу вь Киевь.

Теги: Вокняжение, Киев, Киевский, Князь, Новгород, Новгородский, Переяславль Южный, Переяславский, Смерть князя, Мстислав Владимирович, Ярослав Владимирович, Владимир Всеволодович, Ярополк Владимирович, Всеволод Мстиславич, 6633, 1125, 19 мая,

1136

В лѣто 6644 [1136]. Новгородци призваша плесковиць и ладожанъ и сдумаша, яко сгонити князя своего Всеволода, и всадиша и въ епископль дворъ с женою и сдѣтьми и с тѣщею, мѣсяца маия въ 28; и сторожѣ стрежаху въ день и нощь 30 муж съ оружиемъ. И сѣдѣ 2 мѣсяца, и пустиша из города июля въ 15, а Володимира, сына его, прияша. А се вины его творяху: 1, не блюдет смердъ; 2, «чему хотѣлъ еси сѣсти въ Переяславли»; 3-е, «ѣхалъ еси с полку предѣ всѣх, а того много; на початыи велѣвъ ны ко Всеволодку приступити, а пакы отступити велит»; и не пустиша его, донелѣже инъ князь будеть.

Теги: Вокняжение, Князь, Новгород, Новгородский, Переяславль Южный, Черниговский, 15 июля, Новгородцы, Смерды, Владимир Всеволодович, Всеволод Мстиславич, Всеволод Ольгович, Изгнание князя, 6644, 1136, Псковичи, Ладожане, 28 мая,

В то же лѣто прииде Новугороду князь Святославъ Олговиць ис Чернигова, от брата Всеволодка, мѣсяца июля въ 19, на сборъ святыя Еуфимиа.

Теги: Вокняжение, Князь, Новгород, Новгородский, Черниговский, Память, Всеволод Ольгович, Святослав Ольгович, 6644, 1136, 19 июля, Евфимия,

В лѣто 6644. Новгородци призвашя пскович и ладожанъ и здумашя изгонити князя своего Всеволода, и всадиша и въ епископль дворъ с женою и с дѣтми, и с тещею, маиа 28; и стражие стрежаху день и нощь, 30 мужь на день, съ оружием. И сѣдѣ 2 месяца, и пустиша и из града, а Володимира, сына его, приашя. А се его вина: пръвое, не блюдет смеред; второе, хотѣл сѣсти в Переяславли; третие, ѣхал еси с полку преже всѣх; велѣвь нам къ Всеволодку приступити, и пакы отступить велит. И не пустиша его, доколѣ инъ князь будет.

Теги: Вокняжение, Князь, Новгородский, Переяславль Южный, Черниговский, Новгородцы, Смерды, Владимир Всеволодович, Всеволод Мстиславич, Всеволод Ольгович, Изгнание князя, 6644, 1136, Псковичи, Ладожане, 28 мая,

И прииде к Новуграду князь Святослав Олгович из Чернигова от брата Всеволодка, а Всеволода выгнаша новгородци от себе; он же прииде к строеви своему Ярополку к Киеву, и да ему Вышегород; и сѣде ту лѣто едино.

Теги: Вокняжение, Вышгород, Киев, Князь, Новгород, Новгородский, Чернигов, Черниговский, Вышегородский, Новгородцы, Ярополк Владимирович, Всеволод Мстиславич, Всеволод Ольгович, Святослав Ольгович, Изгнание князя, 6644, 1136,

В лѣто 6644. Новогородьци призваша пьсковичь и ладожанъ и здумавше, яко изгонити князя своего Всеволода, и всадиша и въ епискупль дворъ съ княгинею и съ боляры, и с тещею маия въ 28, и сторожи стрежааху день и нощь по 30 мужь съ оружиемъ. И сѣдѣвъ 2 месяца, испустиша из града 15, а Владимера, сына его, прияша. А се вины его творяаху: 1-е, не блюдеть смердов, 2-е, чему хотѣлъ еси сѣсти в Переяславлѣ, 3-е, ѣхалъ еси ис полку напередъ всѣхъ, а того много на початы, и повелѣв ны къ Всеволодку приступити, а пакы отступити велить». И не попустиша его, донелѣже инъ князь будеть.

Теги: Вокняжение, Князь, Новгород, Новгородский, Переяславль Южный, Черниговский, 15 июля, Новгородцы, Смерды, Владимир Всеволодович, Всеволод Мстиславич, Всеволод Ольгович, Изгнание князя, 6644, 1136, Псковичи, Ладожане, 28 мая,

И прииде Новугороду князь Святославъ Олговичь изъ Чернигова от брата Всеволодька, а Всеволода выгнаша новогородьци от себе. Он же прииде къ стрыеви своему Ярополку къ Киеву, и да ему Вышегородъ, и сѣде ту лѣто едино.

Теги: Вокняжение, Вышгород, Вышгородский, Киев, Князь, Новгород, Новгородский, Чернигов, Черниговский, Новгородцы, Ярополк Владимирович, Всеволод Мстиславич, Всеволод Ольгович, Святослав Ольгович, Изгнание князя, 6644, 1136,

Въ лѣто 6644 [1136]. Новогородци призваша плесковичи и ладожане, и здумаша яко изгонити князя своего Всеволода; и всадиша его въ епископь дворь, съ женою, и з дѣтми и съ тещею, и сторожи стрежаху его день и нощь, по 30 мужеи сь оружиемь; и пустиша его изъ города, а Володимера сына его приаша. А се выны его творяху: 1, не блудеть смердовь; 2, чему хотѣль еси сѣсти въ Переяславлѣ, а къ намъ цѣлова кресть? 3, ихалъ еси изъ полку напередъ всѣхь, а отъ того много ны потяты; и велѣвь ны, рече, къ Всеволодку приступити, а пакы отступити велитъ; и не пустиша его, дондеже инь князь приидеть.

Теги: Вокняжение, Князь, Новгородский, Переяславль Южный, Черниговский, Новгородцы, Смерды, Владимир Всеволодович, Всеволод Мстиславич, Всеволод Ольгович, Изгнание князя, 6644, 1136, Псковичи, Ладожане,

Того же лѣта прииде въ Новгородъ князь Святославъ Олговичь, ис Чернигова, отъ брата Всеволодка, мѣсяца июля 19 день, въ недѣлю; а Всеволода выгнаша. Онъ же прииде кь Киеву, и дасть ему князь великии Ярополкь Вышегородъ.

Теги: Вокняжение, Воскресение, Вышгород, Вышгородский, Киев, Князь, Новгород, Новгородский, Чернигов, Черниговский, Новгородцы, Ярополк Владимирович, Всеволод Мстиславич, Всеволод Ольгович, Святослав Ольгович, Изгнание князя, 6644, 1136, 19 июля,

1138

В то же лѣто вниде князь Ярославъ, сынъ Юргевъ, внукъ Володимирь, и Суздаля в Новъгород на столъ, мая въ 10; и съ плесковици смиришася.

Теги: Вокняжение, Новгород, 6646, 1138, Ярослав Юрьевич, Псковичи, 10 мая,

Того же лѣта преставися в Киевѣ князь Ярополкъ, и сѣде на столѣ брат его Вячеславъ.

Теги: Вокняжение, Смерть князя, Вячеслав Владимирович, Ярополк Владимирович, 6646, 1138,

В то же лѣто вниде князь Ярослав, сынь Юрьев, внукъ Володимирь, из Суждаля в Новгород на стол, маиа 10, и съ псковичи смиришяся.

Теги: Вокняжение, Новгород, 6646, 1138, Ярослав Юрьевич, Псковичи, 10 мая,

Тои же осени преставися Ярополкъ Володимирич, и вниде брат его Вячеслав в Киев, и людемь с митрополитом срѣтшем его, и посадиша и на столѣ прадѣда его Ярослава. И приде Олгович с вышегородци, пристроився з братьею своею, и присылаа к Вячеславу: Иди добром из града. Он же не хотя крови пролити и не бися с ним; и смири я митрополит и утвердив крестомъ честным; и иде опять к Турову, а Всеволод вниде в Киев. А в Черниговѣ посади Володимир Давыдовича.

Теги: Вокняжение, Киев, Смерть князя, Чернигов, Туров, Вячеслав Владимирович, Ярополк Владимирович, Всеволод Ольгович, Святослав Ольгович, Ольговичи, 6646, 1138, Владимир Давыдович,

Того ж(е) лѣта вниде княз(ь) Ярославъ, с(ы)нъ Юрьевъ, внукъ Володимерь, изъ Суздаля в Новъгородъ на столъ, и пьсковичи смиришася.

Теги: Вокняжение, Новгород, 6646, 1138, Ярослав Юрьевич, Псковичи,

Тое же осени преставися князь Ярополкъ Володимеричь, и вниде братъ его Вечеславъ в Киевъ, и людем с митрополитомъ срѣтше и, и посадиша на столѣ прадѣда его, Ярослава. И прииде Олговичь с вышегородьци, пристроився з братьею своею и посылая къ Вечеславу: «Иди добромъ из города». Он же, не хотя крови пролити, не бися с ними. И смири я митрополит, и утверди я кр(е)стомъ ч(е)стнымъ. И иде опять Турову, а Всеволодъ прииде въ Киевъ, а в Черниговѣ посади Володимера Д(а)выдовича.

Теги: Вокняжение, Киев, Смерть князя, Чернигов, Туров, Вячеслав Владимирович, Ярополк Владимирович, Всеволод Ольгович, Святослав Ольгович, Ольговичи, 6646, 1138, Владимир Давыдович,

Того же лѣта, маа въ 10, внииде князь Ярославъ Юриевичь Долгорукого въ Новьгородь на столъ. И въ Киевѣ сѣде князь великий Вячеславъ Володимеричь на столѣ. ВЯЧЕСЛАВЛЕ КНЯЖЕНИЕ. И сѣде Вячеславь толико 10 дный; и прииде на него Всеволодъ Олговичь Святославича, и выгна его ис Киева. И сѣде на столѣ въ Киевѣ Всеволодъ Олговичь, марта 5.

Теги: Вокняжение, Киев, Новгород, Вячеслав Владимирович, Всеволод Ольгович, 6646, 1138, Ярослав Юрьевич, Изгнание князя, 10 мая, 5 марта,

1139

Того же лѣта вниде князь Святославъ Олговиць к Новугороду и сѣде на столѣ мѣсяца декабря въ 25.

Теги: Вокняжение, Новгород, Святослав Ольгович, 6647, 1139, 25 декабря,

Того же лѣта вниде Святослав Олгович в Новград и сѣде на столѣ.

Теги: Вокняжение, Новгород, Святослав Ольгович, 6647, 1139,

В лѣто 6647. Прииде князь Юрьи изъ Суждаля Смоленьску и зваше новогородець на Киевъ на Всеволодька. И не послушаашем его. И тогда бѣжа Ростиславъ Смоленьску къ о(т)цю из Новагорода, сидивъ лѣто и 4 м(е)с(я)ци. И разгнѣвався Юрьи, иде опять къ Суждалю и взя и Новы Торгъ. И послаша новогородьци къ Киеву по С(вя)тослава Олговича, заходивше ротѣ, и бѣ мятежь в Новѣгородѣ, а С(вя)тослава длъго не бяшеть, и вниде С(вя)тославъ Олговичь в Новъгородъ и сѣде на столѣ, и нача замышляти на володимеричи, хотя дръжати самъ с своею братьею всю землю, и искаше под ними отчины ихъ. Они же м(о)л(и)твою родитель своихъ не дашася въ обиду. Кияномъ же и митрополиту не любо быс(ть) се. И посла Всеволода Переяславлю къ Андрѣю Володимеричю, рекъ: «Иди Курьску княжит(и)». Он же рече: «Луче умр(е)ти съ дружиною своею на отчинѣ, ниже Курьское княжение». Всеволодън же посла на ны съ полкы брата своего С(вя)тослава, и усрѣтоша и Андрѣева дружина, и биша полкы его, а С(вя)тославъ бѣжа, а они гонишася до Коряня, а у Малотина миръ взяша.

Теги: Вокняжение, Киев, Новгород, Переяславль Южный, Смоленск, Новгородцы, Суздаль, Курск, Андрей Владимирович, Юрий Владимирович, Всеволод Ольгович, Святослав Ольгович, Мятеж, 6647, 1139, Ростислав Юрьевич, Новый Торг,

Того же лѣта внииде Святославъ Олговичь второе (въ) Новьгородъ на столъ.

Теги: Вокняжение, Новгород, Святослав Ольгович, 6647, 1139,

1141

В то же лѣто вииде Ростиславъ Юргевич в Новъгород на столъ ноября въ 26.

Теги: Вокняжение, Новгород, Ростислав Юрьевич, 1141, 6649, 26 ноября,

Того же лѣта внииде Ростиславъ Юриевичь въ Новгородъ на столъ.

Теги: Вокняжение, Новгород, Ростислав Юрьевич, 1141, 6649,

1142

В лѣто 6650 [1142]. А епископа и купцѣ и послы новгородъскыя не пущахут из -д- Руси, а онѣ не хотяху иного князя, развѣ Святополка; и вда имъ Святополка изъ своею руку; воротивъся Юргью, яко пустилъ сынъ свои Новугороду. И услышася в Новѣгородѣ, яко Святополкъ идет к нимъ со всими людьми своими, и яша Ростислава, и всадиша въ епискупль дворъ, сѣдѣвша 4 мѣсяци. Тогда вниде Святополкъ в Новъгород, въ 19 априля; и пустиша Ростислава къ Юргю.

Теги: Архиепископ, Вокняжение, Новгород, Юрий Владимирович, Святополк Мстиславич, Ростислав Юрьевич, Изгнание князя, 1142, 6650, 19 апреля,

Въ лѣто 6650 [1142]. Епископа, и купцовъ и пословъ Новогородцкихъ не пустяху изъ Руси, а они не хотяху иного князя, но Святополка Мьстиславича; и вда имъ князь великий Святополка и(зъ) своею руку, противляяся Юрию, иже пустилъ сына своего Новогороду; и посла (въ) Новгородъ Святополка, и Новогородцевь отпусти всѣхъ съ нимъ. И услышаша въ Новѣгородѣ, яко Святополкь идетъ къ нимъ съ всѣми людми ихъ, и яша Ростислава и всадиша въ епискупль дворъ; сѣде 4 мѣсяцѣ. Святополкъ же, пришедъ въ Новогородъ, съсла Ростислава Юриевича, (и) иде кь отцу въ Суздаль.

Теги: Архиепископ, Вокняжение, Киевский, Новгород, Новгородцы, Суздаль, Юрий Владимирович, Всеволод Ольгович, Святополк Мстиславич, Ростислав Юрьевич, Изгнание князя, 1142, 6650,

1146

В лѣто 6654 [1146]. Преставися в Руси Всеволод мѣсяца июля; и сѣде на столѣ его брат Игорь. и сѣдѣ 2 недѣлѣ; негодоваху его людие, и въздаша людие вѣсть къ Изяславу Мьстиславицю въ Переяславлю, и прииде с вои, и бишася; и поможе богъ Изяславу, и сѣде Изяславъ на столѣ; и Игоря самого яша въ пятои день по побоищи, и порубиша и; а на осень вымолиша и пострищися, и пострижеся. Тогда же даша посадьничьство в Новѣгородѣ Костянтину Микулиницю, у Нѣжатѣ отъяше.

Теги: Вокняжение, Новгород, Переяславль Южный, Переяславский, Посадник, Смерть князя, Изяслав Мстиславич, Всеволод Ольгович, Константин Микульчич, Изгнание князя, Постриг князя, Нежата Твердятич, 6654, 1146, Игорь Ольгович, 30 июля,

В лѣт(о) 6654. Преставися Всеволодъ Олговичъ июля въ 30, а по нем вниде братъ его князь Игорь в Киевъ, и годно не быс(ть) кияномъ, и послаша къ Изяславу Мьстиславичус. И пришед, изыма Игоря, и всади в порубъ, а самъ сѣде на столѣ, добраго корене отрасль, а Игорь толко княживъ 2 нед(ели).

Теги: Вокняжение, Киев, Смерть князя, Киевляне, Изяслав Мстиславич, Всеволод Ольгович, Изгнание князя, 6654, 1146, Игорь Ольгович, 30 июля,

Въ лѣто 6654 [1146]. Пришедъ Володимерко изъ Галича взя Прилукъ, и хотѣ на нь приити князь великий Всеволодъ Олговичь, и посла кь братии, веля имъ быти готовымъ з Бориша дни, и потомъ разболѣся, и преставися августа 1. И внииде въ Киевь братъ его Игорь. КНЯЖЕНИЕ ИГОРЕВО ОЛГОВИЧА, ВНУКА СВЯТОСЛАВЛЯ. И не годно бысть людемъ княжение Игорево, и послаша въ Переяславль (къ) Изяславу Мъстиславичю, внуку Манамахову; онъ же прииде къ Киеву, а Игорь князь великий съ братомъ Святославомъ Олговычемъ выидоша противу ему, и не дошедше его побѣгоша, людие же о нихъ бишася , ту многыхъ избиша, а инии истопоша. И поможе Богь Изяславу, и вънииде Изяславь въ Киевъ, и сидѣ на столѣ августа 13. И по 4-хь днехъ по побоищи приведоша къ нему Игоря, изымавь въ болотѣ, и посла его въ манастырь на Выдобичь , и оттуду въ Переяславль, и всадиша его въ порубь; и тако скончася власть его, княживъ 2 недѣли. А братъ его Святославь бѣжа къ Новогородку къ Сѣверскому. Вячеславъ же то слышавъ, и надѣяся на старѣйшиньство, и не приложи чести кь великому князю Изяславу, и отъять городы свои, иже отъя у него Всеволодъ Олговичь, еще же и Володимерь заа, и посади въ немъ Андрѣевича. КНЯЖЕНИЕ ВЕЛИКОГО КНЯЗЯ ИЗЯСЛАВА МЬСТИСЛАВИЧА. Князь же великий Изяславь посла по брата по Ростислава отъять грады у Вячеслава, а сына своего Ярослава посади въ Туровѣ. А за Святославомъ Олговичемъ посла Изяслава Давыдича, и Володимера, брата его, и сына его Мьстислава и иные князи; и много зла сътвориша власти его. Святославь же присла къ нимъ, мира прося; они же рѣша: «лишися брата Игоря, и дадимъ ти миръ.» Онъ же не хотѣ того, но рече: «донелѣже ми душа въ тѣлѣ, не могу лишитися его.» Они же шедше разграбиша село Игорево, въ немъ же бѣ всякого множество товара, и зажгоша дворъ и гумно, въ немъ же бѣ девятьсотъ стоговъ жита; и оттолѣ послаша противу великому киязю, а сами поидоша кь Путивлю, и не дашася имъ Путивльци, дондеже прииде князь великій Изяславь, и тако дашася; и посади у нихъ намѣстникы своа, а что есть въ градѣ Святославле, а то все разграби. И прииде вѣсть кь Святославу, яко градъ его взятъ и вся сущая его тамо разграблени быша, а на нь идутъ хотяще его оступити въ Новѣгородцѣ, онъ же бѣжа оттуду кь Карачеву. И поиде за нимъ въ погоню Изяславь Давыдичь въ трехъ тысящахъ, разгордѣвся, хотя рукама изымати его и вся сущаа съ нимъ. Святославъ же то слышавъ, и не бѣ уже где ся ему дѣти; и погадавъ з братиею, Иваномъ Юриевичемъ Долгорукого, и съ сыновцемъ своимъ Иваномъ Ростиславичемъ и Володимеромъ Святославичемъ, и съ Половци, иде противу ему и одолѣ ему. Изяславъ же Давыдовичь прибѣже кь братии, они же вси поидоша на Святослава; то же слышавъ Святославь, пограби Карачевь, бѣже въ Вятичи. Князь же великій Изяславь Мьстиславичь имѣние, и волости и городъ дасть Давыдовичемъ, Изяславу и Володимеру, и Святославу Всеволодичю; а что Игорево, а то собѣ поималъ, (и) иде кь Киеву. На ту же осень Игорь вь порубѣ болѣнь бѣ, и просяше чернечьства; князь великий же повелѣ выпусти(в)ши его постричи, и бысть постриженъ въ Переславли отъ епископа Евфимия; потомъ же оздравѣ, и ведоша его въ Киевь въ манастырь святаго Феодора, и ту схыму възложиша на нь. Давыдичи же поидоша за Святославомь ко Дебряньску, а Святославь Всеволодичь Олговича оста вь Карачевѣ, а Святославь изъ Козельска иде къ Дѣдославлю; ту же разболѣся у него Ивань Юриевичь. Онъ же поиде къ Сестру, и ту Ростиславичь Ивань Берладичничь отступи отъ него къ Ростиславу кь Смоленьскому, а Святославь прииде въ Колтескь городъ, и ту присла ему Юрий Долгорукий изъ Суждаля помочь, 1000 бронникъ; а Давыдичи то слышавше, не смѣша по немъ ити, но возвратистася изъ Дѣдославля.

Теги: Владимир, Вокняжение, Евфимий, Епископ, Киев, Киевский, Новгород-Северский, Переяславль Южный, Половцы, Посадник, Смерть князя, Владимир Святославич, Киевляне, Суздаль, Туров, Вячеслав Владимирович, Юрий Владимирович, Изяслав Мстиславич, Всеволод Ольгович, Святослав Ольгович, Прилук, Мятеж, Изгнание князя, Изяслав Давыдович, Владимир Давыдович, Ростислав Мстиславич, Постриг князя, Галич, Святослав Всеволодович, Владимир Володаревич (Владимирко), 6654, 1146, Игорь Ольгович, 1 августа, Киевский Феодоровский (монастырь), 13 августа, Владимир Андреевич, Ярослав Изяславич, Мстислав Изяславич, Путивль, Путивльцы, Иван Юрьевич, Иван Ростиславич (Берладник), Дебрянск, Козельск, Дедославль, Вятичи, Колтеск,

1148

Тои же осени присла Изяславъ сына своего Ярослава ис Кыева, и прияша и новгородци, а Святополка выведе злобы его ради и дасть ему Володимирь.

Теги: Владимир Волынский, Вокняжение, Киев, Киевский, Новгород, Новгородцы, Изяслав Мстиславич, Святополк Мстиславич, Изгнание князя, Ярослав Изяславич, 1148, 6656,

Тои же осени присла Изяслав сына своего Ярослава ис Киева, и приаша и новгородци, а Святоплъка выведе злобы его ради и дасть ему Володимирь.

Теги: Владимир Волынский, Вокняжение, Киев, Киевский, Новгород, Новгородцы, Осень, Изяслав Мстиславич, Святополк Мстиславич, Изгнание князя, Ярослав Изяславич, 1148, 6656,

И тоя же осени присла князь Изяславъ своего с(ы)на Ярослава ис Киева, и прияша и новогородьци, а С(вя)тополка выведе злобы его ради, и дасть ему Володимерь.

Теги: Владимир Волынский, Вокняжение, Киев, Киевский, Новгород, Новгородцы, Осень, Изяслав Мстиславич, Святополк Мстиславич, Изгнание князя, Ярослав Изяславич, 1148, 6656,

Тоя же осени князь великий Изяславь Мьстиславичь прислалъ сына своего Ярослава ис Киева, и приаша его Новогородци, а брата Святополка Мьстиславича выведе, злобы его ради, и дасть ему Володимерь.

Теги: Владимир Волынский, Вокняжение, Киев, Киевский, Новгород, Новгородцы, Изяслав Мстиславич, Святополк Мстиславич, Изгнание князя, Ярослав Изяславич, 1148, 6656,

1149

В то же лѣто Юрьи прииде на Киевъ, позванъ Святославомъ Олговицемъ, и бишася у Переяславля, и переяславци сѣдоша на щитѣ, научениемъ Гюрговымъ; и сѣде Юрги в Киевѣ, а Изяславъ бѣжа въ Володимирь. На том же лѣтѣ идоша даньници новгородстѣи в малѣ, и посла князь Барладьскаго с вои, и бишася в малѣ нѣгдѣ, и сташа новгородци на островѣ, а онѣ противу сташа, и начаша город чинитѣ в лодияхъ; идоша новгородци к нимъ въ третии день, и бишася; и много их паде обоих, нь суздалець боле и бещисла. На ту же зиму приидоша ѣмь на Водь ратью в тысящи; и услышавше новгородци идоша по них въ 500 с воеводою и не упустиша ни мужа.

Теги: Владимир, Воевода, Вокняжение, Киев, Киевский, Новгород, Переяславль Южный, Новгородцы, Юрий Владимирович, Емь, Изяслав Мстиславич, Святослав Ольгович, Переяславцы, Вторжение, Иван Ростиславич (Берладник), 1149, 6657,

Въ лѣто 6657. Иде архиепископь Новогородцкий Нифонть въ Русь, позванъ великымъ княземъ Изяславомъ и митрополитомъ Климомъ, ставилъ бо его князь великий съ епископы Рускыми, не славь къ Царюграду. А Нифонть тако молвяше: «недостойнѣ есть сталъ, оже не благословень есть отъ великаго собора, ни ставлень;» и онъ про то не борзо отрядивъ его, но посади его въ Печерьстѣмъ манастыри, дондеже Юргий прииде. О БРАНИ ЮРИЕВѢ СЪ ИЗЯСЛАВОМЪ. Въ то же время Юрий прииде обычаемь таковымь: злыи человѣци, диаволомь подгнѣщаеми, яко огнь сѣно зжагаютъ, тако и сии, въздвигнувше вражду въ государехъ ихъ, въ грѣхь и срамъ въводять, а сами погыбають злѣ, якоже рече(но) (въ) писаниихь: злии злѣ погыбоша. Навадиша бо великому князю Изяславу Мьстиславичю на князя Ростислава Юргиевича, глаголюще: хотѣлъ сѣсти вь Киевѣ; князъ великий же, имя тому вѣры, ограби Ростислава, и всади въ лодью, посла его кь отцу толико самого четверта . И пришедъ Ростиславъ жаловася отцу на великого князя и на его коромолниковь; Юрий же о семъ сьжалиси велми, и рекъ: «уже ли се единъ азъ не имѣю части въ Руской земли, ни ли дѣти мои? или не отецъ мнѣ былъ князь великий Владимиръ Манамахъ?» И помолися Богу, и сьбра дружину, и приведе Половци, и поиде къ Киеву на великого князя Изяслава Мъстиславича. Пришедшу же ему къ Воиханю, ту приидоста къ нему оба Святослава, Олговичь и Всеволодичь, и шедше сташа у Бѣлывежи, и ту мѣсяць стоаху, ожидаючи отъ великаго князя покорениа; а князъ великий Изяславь розославъ по братию, къ нимъ ни словеса не посла. И поиде Юргий кь Переяславлю и ста. Тоже слышавь князь великий Изяславь, рече: «аще бы пришель на мене дядя мой з дѣтми, то взялъ бы къ собѣ еже хотѣлъ; аще привель на мене Олговичевь и Половци, то ми мира нѣсть съ ними.» Се же глаголаше, надѣащеся на множество вои; а Киане не хотяху помо(г)ати ему, но веляху миритися съ ними. Прииде же кь Переславлю, и уимаше его епнскопъ Евфимий, не веля битися, и глаголаше ему съ слезами: «възми рядъ з дядею своимъ.» Онъ же не хотяше, но поиде на нь, глаголя: «добыли есми своимъ потомь Киева и Переяславля, а нынѣ ли ми ся отступити?» И прииде кь Янчину селцу, идеже Юргий стоаше, и стояху противу себе отъ обѣда до вечерни; и потомъ отступи Юргий въспять, а князъ великий поиде по немъ, и яко заходящу солнцу възвратися Юргий, и (съ)ступишася, и бысть бой великъ. И поможе Богь Юрию, и поб(ѣд)и Юрий; а князь великий Изяславь бѣжа кь Киеву, толко самъ третий, августа 13, и оттолѣ събрався съ женою, и з дѣтми и съ всѣми своими, и бѣжа къ Лучку; а Юргий пребывъ въ Переяславлѣ три дни, и иде въ Киевъ, 15 августа. Идущимъ же имъ къ Киеву, увидѣша градъ высокъ издалеча, и никтоже знааше кий сей градъ, и поидоша на нь; Половци же бышася у него, и мнози язвени быша, и бѣжаша отъ града того. Бѣ же то не градъ, но село святыа Богородица Печерскаа, а града николиже бывало; ни тии сами, сущии въ селѣ томъ, разумѣша бывшаго, но изшедше видѣша кровипролитие, и почюдишася бывшему. А Переяславль дасть сыну своему Ростиславу.

Теги: Архиепископ, Вокняжение, Евфимий, Епископ, Киев, Киево-Печерский, Киевский, Митрополит, Монастырь, Новгород, Новгородский, Переяславль Южный, Половцы, Киевляне, Новгородцы, Луцк, Юрий Владимирович, Изяслав Мстиславич, Нифонт, Святослав Ольгович, Ростислав Юрьевич, Изгнание князя, Святослав Всеволодович, Климент (Клим) Смолятич, 13 августа, 1149, 6657, Белая Вежа,