В лѣто 6544 [1036].

В лѣто 6544 [1036]. Мстислав, братъ Ярославль, изыде на ловы, и тамо разболѣся и умре; и положиша и в Черниговѣ у церкви святого Спаса, юже бѣ зачалъ сам; бѣ бо въздѣлано еи при немь въвыше, яко на кони стоя досячи. Бѣ же убо Мстислав дебелъ тѣлом, а лицемь чермен, великима очима, а на рати был храбръ и милостивъ, а дружину любляше по велику, и имѣниа не щадяше, ни питиа, ни ядениа не браняше. По сем же прия власть его всю Ярослав, и бысть самовластець в Рускои земли.

И иде Ярослав к Новуграду, и посади сына своего Володимира в Новѣградѣ, и епископа постави Жиряту; и людемь написа грамоту, рекъ: По сеи грамотѣ даите дань. И бяше хромоног, но умъ бяше добръ в немъ, и храбръ на рати, и христианъ, понеже чтяше самъ книгы.

Ярославу же сущу в Новѣградѣ, приде ему вѣсть, яко печенѣзи обьстоят Киев. Ярослав же събра вои многы, варягы и словены, и приде к Киеву веснѣ, и вниде в град свои, и печенѣгъ бесчисла видѣ. Ярослав же выступи из града, и исплъчи дружину, и постави варяг посреди, а на правои странѣ киане, а на лѣвои новгородци. И сташя пред градом. И печенѣзи начашя приступати; изступишася на мѣсто, идеже есть нынѣ святаа Софиа, митрополиа руская; бѣ бо тогда о половинѣ града. И бысть сѣча зла, и едва одолѣ Ярослав к вечеру. И побѣгоша печенѣзи разно, и не вѣдяху, камо бѣжаще, а стенюще, а инии истопошя в Сѣтомли, а инии въ иных рѣках, а прок их пробѣгошя и до сего дне.

В се же лѣто разгнѣвася Ярослав на меншии брат Судислав, и всяди его в порубъ въ Псковѣ до живота своего; оклеветанъ бо бѣ к нему.

Въ лѣто 6544 [1036]. Родися Ярославу пятои сынь Вячеславь.

Того же лѣта приидоша печенѣзи на Киевь; великому же князю Ярославу сущу вь Новѣгородѣ, прииде ему вѣсть, яко печенѣзи обьстоять Киевь; великии же князь Ярославъ, събравъ воа многы, варягы и словяни, прииде кь Киеву веснѣ, и внииде въ градъ свои. И печенѣгь бес числа видѣвь, великыи же князь Ярославь выступи изъ града, исполчи воа своа, и поставы варягы посредѣ, а на правѣи странѣ киани, а на лѣвои странѣ новогородци, и сташа предъ градомъ. И печенѣзи почаша приступати, и сьступишася на мѣстѣ, идеже есть нынѣ святаа Софиа, митрополиа Русскаа, бѣ то тогда полъ града, и бысть сѣча зла, и едва къ вечеру одолѣ Ярославь. И побѣгоша печенѣзи разно, и не вѣдаху камо бѣжати стеняху : овии топляхуся въ Сѣтомли, а инии же во иныхъ рѣкахь , а инии мнози избиени, а прокь ихъ пробѣгоша и до сего дне.

Того же лѣта разгнѣвася Ярославь на брата своего меншего Судислава, и всади его поимавъ въ порубь въ Пъсковѣ до живота его, оклеветань бо бѣ къ нему.