В лѣто 6620 [1112].
В лѣто 6620 [1112]. Поидоша на половци рустии князи Владимеръ, Святополкъ, Ярославъ Святополчь, Давыдъ и Владимеръ с ними, и приидоша къ граду Шаруканю. И выидоша из града, и поклонишася княземъ рускымъ, вынесше рыбы и вино. И заутра пришедше къ Сугробу, зажгоша и, и русь ступишася с половци битися на потоцѣ Дегѣя марта 24, и побѣдиша князи половцевъ, и въздаша хвалу Богу. Наставшу же понедѣлнику страстныя недѣли, пакы иноплеменници собрашася в полкы своя, выступиша, яко поровеь велиции и тмами тмы и оступиша полкы рускыя. И посла помощь Богъ рускымъ княземъ аггела, и сразишася полци половецьстии первое с полкомъ рускымъ, и трѣснуша, акы громъ, и сразишася челома. И бысть брань люта межи има, и падааху обои. И поступи Владимеръ с полки своими, а Давыдъ съ своими, и възрѣвше половци, и вдаша плещи свои на побѣгъ, и падааху пред полкомъ Володимеримъ, невидимоэ бьеми аггеломъ, яко се видяаху мнози человеци, и главы летяаху невидимо стинаеми на землю. И побѣдиша я на рецѣ Салници, и взяша все богатество ихъ, а инѣх самѣх поимаша, и въспросиша ихъ: «Како васъ толика сила не могосте противитися, но въскорѣ побѣгосте». Они же рѣша: «Како можемъ с вами битися, а друзии верху васъ ѣздяху въ оружии свѣтлѣ и страшнѣ, иже помагахуть вамъ». Токмо се суть аггели, от Бога послани помагати крестьяномъ. Се бо аггелъ вложилъ въ сердце Владимеру Манамаху поустити братию свою на иноплеменникы.