В лѣто 6625 [1117]. Иде Мьстиславъ въ Киевъ на столъ из Новагорода марта въ 17; а сына посади в Новѣгородѣ Всеволода на столѣ.

В то же лѣто бысть знамение в Новѣгородѣ въ святѣи Софѣи от грома, а клиросъ всь падоша и с людьми ниць, нь вси живы быша, единъ от диакъ зараженъ бысть, мѣсяца маия въ 14, в час 10, вечернюю поющимъ. А на вечеръ бысть знамение в лунѣ.

В то же лѣто игуменъ Антонѣи заложи церковь камену святыя Богородица манастырь.

Того же лѣта преставися Добрыня, посадникъ новгородчкыи, декабря въ 6.

В лѣто 6625 [1117]. Приведе Володимиръ Мстислава, сына своего, из Новаграда в Киевь, а в Новѣградѣ сѣде Всеволод Мстиславичь.

В то же лѣто бысть знамение в Новѣградѣ в святѣи Софии от грому, маиа 14, в час 10 дни: вечернюю поющим, единь от дьякон заражен бысть от грому, а крилосъ всь падошя и с людми ниць, но живи быша; а на вечеръ бысть знамение в лунѣ.

В то же лѣто игуменъ Антон заложи церковь камену святыа Богородица в манастырѣ.

В лѣто 6625 [1117]. Приведе Владимеръ сына своего Мьстислава из Новагорода в Киевъ, а в Новѣгородѣ сѣде Всеволодъ Мьстиславичьа.

Въ лѣто 6625 [1117], марта 17, князь Мьстиславъ Володимеричь иде изъ Новогорода кь Киеву, къ отцу, княживъ 22 лѣта по Давыдѣ Святославичи. И дасть ему отецъ Бѣльгородъ, понеже посылалъ по него; а въ Новѣгородѣ посади сына своего Всеволода на столѣ

Того же лѣта бысть знамение у святои Софии отъ грома, маа 14, въ часъ 10; вечерню поющимъ, единь отъ диакь зараженъ бысть отъ грома, а клиросъ весь и люди падоша ниць, но вси живи; а на вечерь бысть знамение въ лунѣ.

Того же лѣта игумень Антонии заложи церковь каменну святую Богородицу въ манастырѣ. Того же лѣта преставися Новогородскии посадникъ Добрыня.

Того же лѣта ходи князь великии Володимеръ Манамахь на Ярослава Святополчича, къ Володимеру; онъ же доби ему челомъ.