В лѣто 6638 [1130]. Иде Всеволод с новогородци на Чюдь зимѣ, в говѣние, и самых исѣче, а хоромы пожже, а жены и дѣти приведе домовь.

И в том же лѣтѣ ходи къ отцю Кыеву.

В то же лѣто концаша церковь святого Иоанна.

Того же лѣта, идущи изъ заморья гость, потопе лодѣи 7, и сами истопоша и товаръ, а друзии вылѣзоша, нь нази; а из Дони приидоша здрави.

Того же лѣта отвержеся архиепископъ Иоанн новгородчкыи, сѣдѣ лѣт 20, и поставиша архиепископа Нифонта, мужа свята и зѣло боящася бога; и прииде Новугороду мѣсяца генваря въ 1 день, на святого Василья, на обѣднюю. А Петрилу даша посадничьство в Новѣгородѣ.

В лѣто 6638. [1130] Посла Мстислав сыны своа, Всеволода, Изяслава и Ростислава, с дружиною их с новгородци на чюдь; и взяша их и дань възложиша.

Того же лѣта отвръжеся Иоан, архиепископь Новгородскыи, сидѣв лѣт 20; и поставиша архиепископа Нифонта, мужа свята и зѣло боящася Бога.

В лѣто 6638. [1130] Заточиг князь великии Всеволод князи полотескыя и съ княгинями къ Царюграду.

Въ лѣто 6638 [1130]. Князь великии Мьстиславъ Володимеричь Манамашь поплѣни Литву.

Того же лѣта сынь его Всеволодъ съ Новогородци ходи на Чудь, и посѣче ихъ, и хоромы ихъ пожже, а жены ихь и дѣти ихъ приведе въ полонь со собою.

Того же лѣта кончаша церковь святаго Иоанна.

Тогда же идучи изъ замориа, со Готъ, потопи лодеи 7, и сами истопоша и товаръ, а друзии волѣзоша, но нази; а изъ Дони приидоша здрави.

Того же лѣта архиепископъ Иоань, пиань, отврьжеся Новогородскиа епископіа , сѣдѣвь 20 лѣть. И поставиша архиепископа Нифонта, мужа свята и богобоязнива; и прииде къ Новогороду, мѣсяца генваря 1 день, на святаго великого Василиа, на обѣднюю. А Петрилу даша посадничьство.