В лѣто 6642 [1134]. Почаша молвитѣ о сужальстѣи воинѣ новгородци, и убиша муж свои и вергоша с мосту в суботу пянтикостьную.

Того же лѣта погорѣ Торговыи полъ, от ручья Плотничкаго до конець Холма, якоже преже бяше погорѣлъ; а церквии честных 10 сгорѣ, августа въ 4.

Того же лѣта ходи Всеволод с новгородци, хотя брата своего посадити в Суждалѣ, и воротишася на Дубнѣ опять; и на том же пути отъяша посадничьство у Петрилѣ и даша Иванкови Павловичю. А Изяславъ иде къ Кыеву; и раздрася вся земля Руская.

Того же лѣта порубиша новгородцевъ за моремъ в Дони.

Иде Исаия игуменъ с посломъ в Киевъ, и прииде опять с митрополитом Михаиломъ Новугороду, мѣсяца декабря въ 9.

И в то же лѣто, на зиму, иде Всеволод на Суздаль ратью, и вся новгородчкая область, мѣсяца декабря въ 31; и сташа дние злѣи: мразъ, въялица , страшно зѣло. И бишася на Жданѣ горѣ, и много ся зла створи: и убиша посадника новгородчкаго Иванка, мужа зѣло храбра, мѣсяца генваря въ 26, и Петрила Микулиница, и много добрых мужь, а суждалець болши; и створше миръ, и приидоша опять. И пустиша митрополита Кыеву, мѣсяца февраля въ 10, в мясопустную недѣлю, а на Суждаль идуще, не пустиша его, а онъ молвяше имъ: «Не ходите, мене Богъ послушаеть». И, пришедши, даша посадничьство Мирославу Гюрятиничю.

В лѣто 6642 [1134]. Иде Исаиа игумен с послом в Киев и приде опять с митрополитом Михаилом к Новуграду, декабря 9.

В то же лѣто заложи Всеволод съ архиепископомъ Нифонтом церковь камену святыа Богородица на Торговищѣ.

А Рожнѣдъ заложи церковь святого Николу на Иаковли улицѣ.

И на зиму иде в Русь архиепископь Нифонтъ с лучшими мужи, и заста кианы с черниговци стояща противу собѣ, и Божиею волею смиришася.

В лѣто 6642 [1134]. Иде Всеволодъ на Суздаль ратью и вся Новогородьская область, и бишася на Жданѣ горѣ. И много ся зла створи, и убиша посадника Иванка, мужь храборъ зѣло, и Петрила Микулинича, и иных мужь много побиша добрых, и суздалцев паде боле. И створиша миръ, и приидоша опять. И пустиша митрополита Киеву мѣсяца февраля 10, в мясопустную недѣлю. А на Суздаль идучи, не пустиша митрополита, а онъ молвилъ: «Не ходите на Суздаль, мене Богъ послушаетъ».

Почаша молвити о суздалстѣи воинѣ новогородци, и убиша мужа своя, и свергоша съ моста.

Того же лѣта погорѣ Торговыи полъ, отъ ручиа Плотничьскаго до Холма, а церквии 10 згорѣ, августа 4.

Того же лѣта ходи Всеволодъ съ новогородци кь Суздалю, хотя брата своего посадити на Суждалѣ; и воротишася з Дубны, а Изяславь иде кь Киеву. Тогда отъяша посадничьство у Петрила и даша Ивану. И раздрася вся земля Рускаа.

Того же лѣта рубиша новогородець за моремъ.

Того же лѣта иде Исаиа игумень посолствомь кь Киеву, и прииде съ митрополитомъ Михаиломъ къ Новогороду, мѣсяца декабря 9.