В лѣто 6650 [1142]. А епископа и купцѣ и послы новгородъскыя не пущахут из -д- Руси, а онѣ не хотяху иного князя, развѣ Святополка; и вда имъ Святополка изъ своею руку; воротивъся Юргью, яко пустилъ сынъ свои Новугороду. И услышася в Новѣгородѣ, яко Святополкъ идет к нимъ со всими людьми своими, и яша Ростислава, и всадиша въ епискупль дворъ, сѣдѣвша 4 мѣсяци. Тогда вниде Святополкъ в Новъгород, въ 19 априля; и пустиша Ростислава къ Юргю.

В то же лѣто приходиша ѣмь и воеваша область Новгородчкую; избиша ладожанѣ 400 и не пустиша ни мужа.

Въ то же лѣто приходи свѣискыи князь съ пискупомъ въ 60 шнекъ на гость, иже суть изъ заморья шли въ 3 лодиях; и бишася, и не успѣша ничтоже, и отлучиша их 3 лодьи, избиша их полтораста.

В лѣто 6650 [1142]. Приходишя ѣмь, и воевашя область Новгородскую; избиша ладожан 400, и не пустишя ни мужа.

В то же лѣто приходишя князь Свѣискыи с пискупом въ 60 шнякѣх на гость, иже из Заморья шли в трех лодьях, и бишася с ними и не успѣшя ничтоже, и отлучишя их 3 лодьи, а их избиша полтораста.

В лѣто 6650 [1142]. Приходиша ѣмь и воеваша область Новогородскую, избиша лодожанѣ 400 и не пустиша ни мужа.

Того же лѣта приходи князь свиискыи съ епископомъ во 60 шнекъ на гость, иже изъ заморья шли въ трех лодияхъ, и бишася, не успѣша ничто же, и отлучиша ихъ 3 лодии, избиша ихъ полтораста.

Въ лѣто 6650 [1142]. Епископа, и купцовъ и пословъ Новогородцкихъ не пустяху изъ Руси, а они не хотяху иного князя, но Святополка Мьстиславича; и вда имъ князь великии Святополка изъ своею руку, противляяся Юрию, иже пустилъ сына своего Новогороду; и посла въ Новгородъ Святополка, и Новогородцевь отпусти всѣхъ съ нимъ. И услышаша въ Новѣгородѣ, яко Святополкь идетъ къ нимъ съ всѣми людми ихъ, и яша Ростислава и всадиша въ епискупль дворъ; сѣде 4 мѣсяцѣ. Святополкъ же, пришедъ въ Новогородъ, съсла Ростислава Юриевича, и иде кь отцу въ Суздаль.

Того же лѣта Вячеславь Володимеричь иде княжити въ Переяславль, а къ Турову иде Святославь Всеволодичь; а Игорь въсхотѣ себѣ Переяславля, и поиде на Вячеслава, и прииде кь Вячеславу вь помочь брата его сынь Изяславь Мьстиславичь, а Ростиславь шедъ изъ Смоленьска взя четыре городы Игоревы, онъ же послышевъ отъиде отъ Переяславля. А Вячеславъ дасть Переяславль Изяславу, а самъ иде къ Турову; а Святославъ Всеволодичь иде къ Володимерю.

Того же лѣта приходиша Имь, и воеваша область Новогородскую; избиша Ладожане 400, не отступиша ни мужа.

Того же лѣта приходи Свѣискии князь и епископь въ 60 шнекь на гость, иже изъ замориа шли въ 3 же лодиахь; и бишася, и не успѣша ничтоже, и отлучиша ихь 3 лодии, избиша ихъ полтораста.