В лѣто 6527 [1019].

В лѣто 6527 [1019]. Приде Святоплък с печенегы в силѣ тяжцѣ, Ярослав събра множество вои. И взыде противу ему на Лто Ярослав и ста на мѣстѣ, идеже убишя Бориса, въздѣв руце на небо и рече: Кровь брата моего въпиет к тебѣ, Владыко, мсти от крове праведнаго сего, якоже мстилъ еси кровь Авелеву, положив на Каинѣ стенание и трясание; тако и положи на сем. Помолився, и рече: Брата моя, аще тѣлом отшла еста отсюду, но молитвою помозита ми на противнаго сего убиицу и гордаго. И се ему рекшу, поидошя противу собѣ, и покрышя Ледское поле обои от множества вои, и бысть сѣча зла, аковаже не бывала в Руси; за рукы емлющеся сѣчаху, и зступишася трижды, и по удолью крови текущи, мнози вѣрнии видяху ангели, помагающе Ярославу. И к вечеру одолѣ Ярослав, а Святоплъкъ бѣжа. О Святополчи пропадении. И бѣжащу ему тогда, нападе на нь страх, разслабѣшя кости его, не можаше сидѣти, несяхут и на носилех; и принесоша и к Берестию, бѣгающе с ним; он же глаголаше: Побѣгнете со мною, женуть по насъ. Отроци же его отсылаху противу, еда кто женет по немъ, и не бѣ никогоже вслѣд гонящаго, и бѣжаху с ним. Он же лежав в немощи, и въсхопився глаголаше: О се женут, оно женут, побѣгнитеѣ. И не можаше тръпѣти на едином мѣстѣ, и пробѣже Лядскую землю, гоним Божиим гнѣвомъ, и прибѣже в пустыню межи ляхы и чехы и ту испроверже злѣ живот свои. Егоже по правдѣ, яко неправедну суду нашедшу на нь, по отшествии сего свѣта приашя мукы окааннаго; показавше явѣ посланаа на нь пагубнаа рана, въ смерть немилостивно въгна, и по смерти немилостивно мучимь есть, связанъ въ днѣ аду. Есть же могила его в пустыни и до сего дни, исходит же от нея смрад зол. Се же Богъ показа на наказание княземъ рускимь, да аще сице створят, се слышавше, ту же казнь приимуть, но и болши сеа, понеже вѣдуще се бывшее створит такоже зло убииство. Седмь бо мстии приа Каинъ, убивъ Авеля, а Ламех седмьдесят; понеже бѣ Каинъ не вѣдыи мщения приатъ от Бога, а Ламех, вѣдыи казнь, бывшую на прародители его, створи убииство. Рече бо Ламех къ своима женама: Мужа убих въ вред мнѣ, а уножу въ язву мнѣ; тѣм же, рече, 70 мстии на мнѣ, понеже, рече, вѣдая, створих. Сеи Ламехъ уби два брата Енохова и поя собѣ женѣ ею; сеи же Святоплъкъ новыи Ламех, иже ся бѣ родилъ от прелюбодѣаниа, иже изби братию свою, сыны Гедеоновы, тако и сии бысть. И Ярослав же сѣде в Киевѣ, утеръ пота с дружиною своею, показав побѣду и труд велик по брату своею.

В лѣто 6527 [1019]. Прииде Святополкъ с печенѣгы въ силѣ тяжцѣ, и Ярославъ вои множество собра, и взыде противу ему на Лто Ярославъ, и ста на мѣстѣ, идеже убиша Бориса, и въздѣвъ руцѣ на небо, и рече: «Кровь брата моего въпиеть к тебѣ, владыко! Мьсти от крови праведнаго, яко же мьстилъ еси кровь Авелеву, положивъ на Каинѣ стенание и трясение. Тако положи и на семь». Помолився и рече: «Братья моя! Аще тѣломъ отшла еста отсюду, но молитвою помозѣте ми на противнаго сего убиицю и гордаго». И се ему рекшу, поидоша противу себе и покрыша Лятьское поле обои от множества вои, и бысть сѣча зла, яко же не бывала такова в Руси, и за рукы емлюще, сѣцаахуся, и съступашася 3-жщи, и по удолиямъ крови течащи, и мнози вѣрнии видяаху аггелы, помагающе Ярославу, и къ вечеру одолѣ Ярославъ, а Святополкъ бѣжа. И бѣжащу ему, нападе на нихъ страхъ, и раслабишася кости его, не можааше сидѣти, носяхуть и на носилѣхъ, и принесоша и къ Берестию, бѣгающе с нимъ. Он же имъ глаголаше: «Побѣгнете со мною, женуть по нас». Отроци же его всылаахуть противу, егда кто женеть по немъ, и не бѣ никого же въслѣдъ гонящаго. И бѣжааху с нимъ, он же, лежавъ в немощи и въсхапився, глаголаше: «О се женуть! И поженете, и побѣгните!». И не можааху терпѣти на единомъ мѣстѣ, и пробѣже Лятьскую землю, гонимъ божиимъ гнѣвомъ, и прибѣже в пустыню межи чахи и ляхи, ту изпроверже злѣ животъ свои. Его же и по правдѣ, яко неправедну, суду нашедшу на нь, по ошествии сего свѣта прияша мукы, окаяннаго показавше явѣ, посланная на нь пагубная рана въ смерть немилостивно въгна. И по смерти немилостивно мучимъ есть, связанъ въ днѣ аду. Есть же могыла его в пустыни до сего дни, исходить же из нея смрадъ золъ, еже богъ показа на показание княземъ рускымъ, да аще сице створять, се слышавше, ту же казнь приимуть и болши сия, но понеже, вѣдуще се бывшее, створять тако же зло убииство. 7-мь бо мьсти приимъ Каинъ, уби Авеля, а Ламехъ 70. Понеже бо Каинъ не вѣдыи мщения прияти от бога, а Ламехъ вѣдыи казнь, бывшую на прародители его, створи убииство, рече бо Ламехъ къ своима женама: «Мужа убихъ въ вредъ мнѣ, а юношу въ язву мнѣ. Тѣм же, — рече — 70 мьсти есть на мнѣ, понеже, — рече, — вѣдая створихъ». Сеи Ламехъ уби два брата Енохова и поя себѣ женѣ ею. Сеи же Святополкъ, новыи Ламехъ, иже ся бѣ родилъ от прелюбодѣяния, им же изби братью свою, сыны Гедеоновы, тако си и бысть. Ярославъ же сѣде в Киевѣ, утеръ поту съ дружиною своею. И оттоле крамола преста въ Рускои земли, и Ярославъ прия власть всея Рускыя земля.

И нача въпрашати Ярославъ о телеси святую, како или гдѣ положена еста. И о святѣмь Борисѣ повѣдаша ему, яко въ Вышегородѣ положенъ есть. И о святѣмъ Глѣбѣ не вси сведяаху, яко въ Смоленьсцѣ убиенъ есть, и тогда сказааша ему, яже слышааше от преходящихъ оттуду, како видѣша свѣтъ и свѣща в пустѣ мѣстѣ. И то слышавъ, Ярославъ посла на взыскание къ Смоленьску презвитеры, рече, яко «тои есть мои братъ». И обрѣтоша и, идеже бяше видѣли, и шедъ съ кресты честно и съ свѣщами мнозѣми, и с кандилы, и вложеше и в карабль, и привезъше, и положиша и въ Вышегородѣ, идеже лежить тѣло преблаженнаго Бориса. И раскапавше землю, и ту положиша, и недоумѣюще, яко же бѣ лѣпо и честно. Се же пречюдно и дивно, и памяти достоино, како и колико лѣтъ лежа тѣло святого, то же невреждено пребысть ни от единаго плотоядца, ни бяше почернѣло, яко же бо имать обычаи телеса мертвыхъ, но свѣтло и красно, и цѣло, и благу воню имуще, тако богу сохраншу своего страдалца тѣло, и не вѣдяаху мнози ту лежащу святую страстотерпца телесе. Но, яко же рече господь: «Не можеть градъ укрытися, верху горы стоя, ни свѣщи, вжегше, спудомъ покрываютъ, но на свѣтилѣ поставляютъ, да свѣтить темныя». Тако и сия святая, прослави я свѣтити в мѣрѣ и премногыми чюдесы сияти в Рускои великои странѣ, идеже множество стражущих спасении бываютъ от честную раку Бориса и Глѣба.

Нача Ярославъ вои дѣлити, старостамъ своимъ по 10 гривенъ, а смердомъ по гривнѣ, а новогородцемъ по 10 гривенъ, и отпусти я вся домовъ, и давъ имъ правду и уставъ, списавъ грамоту, рече: «По сему ходите и держите, яко же списахъ вамъ».

Уставъ великаго князя Ярослава Владимерича о судѣхъ. Судъ о душегубьствѣ. Правда Руская. Аже убиетъ кто мужа, то мьстити брату брата, любо отець, или сынъ, любо братъ чаду, ли братню сынови. Оже не будеть кто его мистяи, то положить за голову 80 гривенъ, аще ли будеть княжь муж, или тиунъ княжь. Аци ли будеть русинъ горожанинъ, или гридъ, или купець, или тиунъ боярьскыи, или мечникъ, любо изгои, ли словѣнинъ, 40 гривенъ положити за нь. Судъ Ярославлич дѣтеи. По Ярославѣ же пакы совокупившеся сынове его Изяславъ, Святославъ, Всеволодъ и мужи ихъ Коснячко, Перенѣгъ, Никифоръ, и отложиша убиение за голову, но кунами ся выкупати. А иное все, яко же Ярославъ судилъ. О убииствѣ судъ. Аще кто убиеть княжа мужа в разбои, а головника не ищутъ, то вервьную платити, въ чьеи же верви голова лежеть, то 80 гривенъ; аще ли людинъ, то 40 гривенъ. Которая ли вервь начнеть платити дикую виру колико лѣтъ, за ту платять ту виру, занеже без головника имъ платити. Будеть ли головникъ ихъ въ верви, то, зане к нимъ прикладываютъ, того же дѣля имъ помагати головнику любо си дикую виру, но платити имъ въопчѣ 40 гривенъ, а головничество, а то самому головнику; а въ сороцѣ гривенъ заплатити ему изъ дружины своею часть, но оже будетъ убилъ, оже въ свадѣ или въ пиру явленно, то тако ему платити по вервиннѣ, еже ся прикладываеть вирою. Оже станеть безъ вины на разбои. Будеть ли стоялъ на разбои безъ всякые свады, то за разбоиника люди не платятъ, но выдадуть и самого всего и с женою, и з дѣтьми на потокъ и на разграбление. Аже кто не вложится в дикую вину и виру, тому людие не помогаютъ, но самъ платить. О вирах. Бе закони вирные были при великомъ князѣ Ярославѣ: вирнику взяти 7 ведеръ солоду на недѣлю, да овенъ или полоть, или двѣ ногаты; а в середу куна, оже сыръ, а в пятницю тако же; а куровъ ему по двое на день, а хлѣбовъ 7 на неделю, а пшена семь уборковъ, а гороху тако же, а соли семь голважень; то ти вирнику с отрокомъ; а кони 4, а овесъ конемъ сути на ротъ; вирнику 8 гривенъ, а 10 кунъ перекладная, а металнику 12 вѣкошь, а сосадная гривна. О вирах. Иже будеть вира въ 80 гривенъ, то вирнику 16 гривенъ и 10 кунъ и 12 вѣкошь, а переди съсадная гривна, а за голову 3 гривны. О княжѣ отроци. Оже въ княжѣ отроцѣ или в конюсѣ или о поварѣ, 40 гривенъ, а за тиунъ за огнищныи и за конюшии 80 гривенъ , а в сельскомъ тиунѣ княжѣ или в ратаиномъ 12 гривенъ, а за рядовича 5 гривенъ, тако же и за боярескъ. О ремественицѣх. И за ремественика, и за ремественицю 12 гривенъ. О смердѣ и холопѣ. А за смердъ и холоп 5 гривенъ, а за робу 6 гривенъ, а за искормилича 12 гривенъ, тако же и за кормилицю, хотя си будеть холопъ или роба. О поклепнои вирѣ. Аще на кого будеть поклепная вира, то оже будеть послуховъ 7, то же выведеть виру, то ти имуть вѣру, пакы ли варягъ или инъ кто, то 2. А на костехъ и по мертвецѣ не платити вѣры, оже имени нѣ вѣдаютъ, ни знаютъ его. Аже свержеть виру, то гривна куна смертная отроку, а кто исклепалъ, тому дати другая гривна, а от виры помочного 9 кунъ. Искавъ же ли послуха, и не налѣзеть, а истца начнеть головою клепати, тому дати исправа желѣзо, тако же и въ всѣхъ тяжахъ, и в татбѣ, и въ поклепѣ. Оже не будеть ли истца, тогда дати ему исправа желѣзо из неволи, да полугривнѣ злата, оже ли и мене, то на воду, али до двою гривну; аще ли мене, то ротѣ ему ити по свои куны. А судным кунамъ росту нѣтъ. О мечѣ. Оже кто ударить мечемъ, не вынесъ его, или рукоятию, то 12 гривенъ продажи за обиду. Аже ли вынесъ мечь, а не ударивъ, то гривна кунъ. Оже кто ударить кого батогомъ или чашею, или рогомъ, любо тылисницею, то 12 гривенъ, не терпя ли противу тому, тьнеть мечемъ, то вины ему в томъ нѣтъ. Аще ли утнеть руку, и отпадеть рука или усохнеть, или нога, или око, или носъ утнеть, то полувѣрие 20 гривенъ, а тому за вѣкъ 10 гривенъ; перъстъ утнеть мечемъ, кии любо будеть, 3 гривны продажи, а самому гривна. О мужи кровавѣ. Иже приидеть кровавъ мужь на дворъ или синь, то видока ему не искати, но платити ему продажи 3 гривны. Аще ли не будеть на немъ знамения, то привести ему видокъ, слово противу слова, а кто ли будетъ началъ, то тому платити 60 кунъ. Аще же и кровавъ приидеть, или будеть самъ почалъ, а выпустять послуси, то то ему за платежъ, оже и билъ и. О мечѣ. Аще ударить мечемъ, а не потнетъ насмерть, то 3 гривны продажи, а самому гривна за рану, оже лечебно есть. А потнеть насмерть, то вира. Иже побьхнеть мужь мужа любо к себѣ, любо от себя, или палицею, или жердию ударить, а видока 2 выидуть, то 3 гривны продажи. Аже будеть варягъ или колбягъ, то полная видока вывести и идеть на роту. О челядинѣ. Иже челядинъ крыется, а закличють и в торгу, а за 3 дни не выведуть его, а познають и въ 3 день, то свои челядинъ пояти, а оному платити 3 гривны продажи. Оже на чюжем конѣ ѣздит. Аще кто въсядеть на чюжь конь, не прошавъ, то 3 гривны продажи. О изгибели. Аще кто конь погубить или оружие, или портно, а заповѣдаеть на торгу, а послѣди познаеть въ своемъ градѣ, свое ему лицемъ взяти, а за обиду ему платити 3 гривны. Иже кто познаеть своего, что будеть погубилъ или украдено что у него, или конь, или портъ, или скотина, то не речи ему: «Се мое», но поиди на сводъ, гдѣ еси взялъ, сведутся; кто будеть виноватъ, на того татба снидеть. Тогды онъ свое възметь, или что будеть погыбло с нимъ, тои же ему начнеть платити. О татбѣ. Аще будеть коневыи тать, то выдати его князю на потокъ. Пакы ли будеть клѣтныи тать, то 3 гривны платити ему за то. О сводѣ. А оже будеть въ одномъ градѣ, то ити истцю до конца того свода, будеть ли сводъ по землямъ, то ити ему до трехъ сводовъ, а что будеть лице, то то ему третиему платити кунами за лице, а с лицемъ ити до конца своду; а истцю ждати прока. А гдѣ снидеть на конечнаго, то тому все платити и продажи. О татбѣ. Пакы ли что будеть татебное купилъ въ торгу, или конь, или портъ, или скотину, то введеть свободна мужа два или мытника. Аже начнеть не знаати, у кого будеть купилъ, то ити по немъ видокомъ на торгу на роту, а истцю свое лицемъ взяти. А что с нимъ погыбло, а того ему желѣти, а иному желѣти своихъ кунъ, зане не знаеть его, у кого будеть купилъ. А познаеть ли надолзѣ, у кого то купилъ, свои ему куны взяти и сему платити, что будеть у него погыбло, а князю продажу. О челедином изводѣ. Аще кто познаеть челядинъ свои украденъ, а поиметь и, то оному вести по кунамъ и до 3-яго свода, пояти же челядинъ въ челядина мѣсто, а оному дати лице, а тои идеть до конечнаго свода. А то есть не скотъ, нелзѣ рещи: «Не вѣдаю, у кого есмь купилъ», но по языку ити до конца. А гдѣ будеть конечныи тать, то опять воротити челядинъ, а свои поиметь, и проторъ тому же платити, а князю продажи в челядинѣ 12 гривенъ, или украденъ или уведенъ есть. О том же сводѣ. А исъ своего рода в чюжду землю извода нѣтъ, но тако же вывести ему послухы, любо мытника, предъ ким же купивше, то истцю лице взяти, а прока ему желѣти, что с нимъ погыбло, а оному своихъ кунъ желѣти, дондеже налѣзеть. О татѣ. Оже убиютъ кого у клети или у которые татьбы, то убиють и въ пса мѣсто. Аже ли додержатъ до свѣта, то вести на княжь дворъ. Аже ли убиютъ и, а будуть люди видели связана, а будуть люди видели, то платити въ томъ 12 гривенъ. Аже кто украдеть скотъ въ хлѣвѣ или клѣть, то оже будеть единъ, то платити ему 3 гривны и 30 куны, а будеть ли ихъ много, то всѣмъ по 3 гривны да по 30 кунъ платити. О татбѣ, уроцѣ и скотѣ. Аще кто украдетъ скотъ на полѣ, или овци, или козы, или свиньи, то 60 кунъ. Аще ли ихъ будеть много, то всѣмъ по 60 кунъ. Оже крадуть гумно или жито въ ямѣ, то колко ихъ будеть крало, то всѣмъ по 3 грывны и по 30 кунъ, а у него же погыбло, оже будеть лице, лицемъ поемлеть, а за лѣто възметь по полугривнѣ; пакы лица не будеть, а будеть былъ княжь конь, то платити за него 3 гривны, а за иныхъ по двѣ грывны, а за кобылу 60 кунъ, а за волъ гривна, а за корову 40 кунъ, а за третьяка 30 кунъ, а за лоньщину полъ грывны, а за теля 5 кунъ, а за свинью 5 кунъ, а за порося ногата, а за овцю 5 кунъ, а за боранъ ногата, а за жеребець, оже будеть не всѣдано на нь, то гривна кунъ дати за нь, а за жеребя 6 ногатъ, а за коровие млеко 6 ногатъ. То ти уроци смердомъ, оже платять княжу продажу. О холопѣх. Оже будуть холопи тати, любо княжи, любо боярьскыи, любо черньцевы, их же князь продажею не казнить, занеже суть не свободни, то двоичи платити къ истцю за обиду. О запрѣньи кунъ. Аще кто възыщет кунъ на друзѣ, а онъ ся учнеть запирати, то оже на нь послуси выведеть, то ти поидуть на роту, а онъ възметь куны свои, занеже не далъ ему есть за много лѣтъ, то платити ему за обиду 3 гривны. О купцѣ. Аже кто купець куплю дасть в куплю куны или въ гостьбу, то купцю предъ послухы кунъ не имати, послуси ему не надобѣ, но ити ему на роту, оже ся учнеть запирати. О поклажѣ. А оже кто поклажеи кладеть у кого любо, тутъ послуха нѣтъ, у кого тотъ лежить товаръ; но оже начнеть болшимъ клепати, тому ити ротѣ, у кого лежало, како толко еси положилъ у мене, занеже ему благодѣялъ и хранилъ. О рѣзоимьствѣ. Аще кто куны даетъ в рѣзы или настави въ медъ, или жито въ присопъ, то послуси ему ставити; какъ ся с нимъ будеть рядилъ, таже ему имать. О мѣсячном рѣзу. Мѣсячныи рѣзъ, оже за мало дни, то имати ему, а заидуть ли куны до того же году, то дадять ему куны въ третия, мѣсячныи рѣзы погренути; послуховъ ли не будеть, а будеть кунъ 3 грывны, то ити ему про свои куны ротѣ; будет ли куны боле, то речи ему тако: «Провиновался еси, оже еси послуха не ставилъ». О овцах. А от 20 овець и от дву приплода на 12 лѣтъ 90000 овець и 100 овець и 12 овець, а борановъ 90000 и 100 и 12 борановъ, а всего борановъ и овець на 12 лѣт 180000 и 200 и 23, а овца метана по 6 ногатъ, а боранъ по 10 рѣзанъ, а за то за все кунами 40000 гривенъ и 5000 грывенъ и 50 гривенъ и 5 гривенъ и 40 рѣзан. А на тѣхъ овцахъ и на боранѣхъ рунъ 300000 и 60000 и 400 и 40 и 6 рунъ, а на тѣхъ рунѣхъ кунами 7000 гривенъ и 200 гривенъ и 8 гривенъ и 40 рѣзанъ и 6 рѣзанъ, а руно чтено по рѣзанѣ. О козахъ. А от 20 козъ и от 2 приплода на 12 лѣтъ 90000 козъ и 100 козъ и 12 козъ, а то кунами 20000 и 7000 и 30 гривенъ и 3 гривны и 30 рѣзанъ, а коза метана по 6 ногатъ. А козловъ 90000 и 100 и 11 козловъ, а то кунами 10000 и 8000 гривенъ и 20 гривенъ и 10 рѣзанъ, а козелъ метанъ по 10 рѣзанъ. О свиньяхъ. От 3 свинеи приплода на 12 лѣтъ 70000 и 3000 и 700 и 20 и 8 свинеи, а то кунами 30000 и 6000 и 800 и 60 гривенъ и 4 гривны. О вепрехъ. А вепревъ 40000 и 9000 и 100 и 40 вепревъ, а то кунами 10000 и 4700 и 40 гривенъ и 3 гривны и 40 рѣзанъ, а вепрь метанъ по 6 ногатъ. О назимых свиньяхъ. А назимыхъ 3 свиньи, а от тѣхъ приплода на 10 лѣтъ 60000 и 100 и 40 и 4 свиньи, а то кунами 30000 и 70 и 2 гривны, а свинья метана по полугривнѣ, а 3 вепри старые 40 и 5 рѣзанъ. О кобылах. А от 2 кобылъ на 12 лѣтъ приплода 30 и 2 кобылы, а третьячинъ 20 кобыл, а лоньщинъ 20 жерепцевъ, а однолѣтных 10 кобылъ, а 10 жерепьцевъ, а то кунами 100 и 30 гривенъ и двѣ грѣвны, а кобыла метана по 3 гривны, а третьячина по гривнѣ, а лоньщина по 30 рѣзанъ, а однолѣтное по 6 ногатъ метано. А тѣхъ всѣхъ лошадеи числомъ 90 и двое. О лоньских кобылицах. А отъ лоньскои кобылици приплода на 9 лѣт 4 кобылы и с материю, а третьячинъ 3 кобылици, а лоньскых 2 кобылици. А от тѣхъ кобылъ 10 жеребцевъ, а старыи единъ жеребець. А то кунами 20 гривенъ и 2 гривны. А тѣхъ лошадеи 20 числомъ. О лоньскои телици. А от лоньскои телици на 9 лѣт приплода 4 коровы и с матерью, а третьячинъ телиць 3, лоньскыхъ 2 телици, от старыхъ коровъ 3 быки старые, а лоньскыхъ 2 быка, а однолѣтныхъ 5 быковъ, а то кунами 7 гривенъ, а корова метана по двѣ гривнѣ. А того скота 20 безъ одного. А от того скота сыровъ 300 и 60 сыровъ, а масла 30 горнцевъ, а то кунами 14 гривенъ и 20 рѣзанъ, а сыръ метанъ по рѣзанѣ, а горнець масла по 10 рѣзанъ. О пчелах. А от двоих пчелъ на 12 лѣтъ приплода роевъ, и съ старыми пчелами, 200 и 50 и 6 роевъ, то кунами 100 гривенъ и 20 гривенъ и 4 гривны, то чтено по полугривнѣ рои с медомъ, а приплода на то по единому рою. О ржи. А в селѣ сѣянои ржи на два плуга 16 кадеи ржи ростовьскыхъ, а того на одно лѣто прибытка на 2 плуга 100 копенъ ржи, а на всю 12 лѣт 1000 копенъ и 200 копенъ ржи. О немолоченои ржи. А ржи немолоченые 40 копенъ, а на ту рожь прибытка на одно лѣто 20 копенъ, а на всю 12 лѣт в тои ржи прибытка 4000 копенъ и 600 и 60 копенъ ржи. О полбѣ немолоченои. А полбы немолоченые 15 копенъ, а на то прибытка на одно лѣто 7 копенъ, а на всю 12 лѣт въ тои полбѣ прибытка 1000, 700 и 50 копен. О молоченом овсѣ. А овса молоченого 20 половникъ и единъ, а на то прибытка на одно лѣто 11 половникъ овса, а на всю 12 лѣт въ томъ овсѣ прибытка 2000 и 800 и 60 и 3 половникы овса. О молоченомъ ячмени. А ячмени молоченого 6 половникъ, а на то прибытка на едино лѣто 3 половникы, а на всю 12 лѣт въ томъ ячмени прибытка 700 и 11 половникъ. О немолоченом житѣ. Немолоченое жито метано на 2 копны 3-я, молоченое жито метано на 2 половника 3, а на всю 12 лѣтъ. А немолоченаго жита на 12 лѣтъ ржи половниковъ 7000 копенъ и 600 копенъ и 10 копенъ, а молоченаго жита и овса, и ячмени полъчетверты тысячи половникъ и 70 половникъ и 4 половникы, а всего того кунами 170000 гривенъ и 9000 гривенъ и 300 гривенъ и 90 гривенъ и 4 гривны и 30 рѣзанъ и рѣзана, опроче жита. О сѣнѣ. А того же села пять стожеи сѣна, а та на всю 12 лѣтъ 60 стоговъ сѣна, а стогъ по гривнѣ, а то 60 гривенъ кунами. О сиротьемъ вырятькѣ. А женка съ дчерию, тѣмъ страды на 12 лѣтъ, по гривнѣ на лѣто, 20 гривенъ и 4 гривны кунами. А се уставил велики князь Владимер Всеволодичь Манамахъ. По Святополцѣ съзва дружину свою на Берестовѣмъ: Ратибора, тысецьскаго киевьскаго, и Прокопия, тысячьскаго бѣлогородьскаго, Станислава, тысечьскаго переяславьскаго, Нажира, Мирослава, Иванка Чюдоновича, Олгова мужа, и уставили и до третьяго рѣзу, аже емлеть куны в рѣзъ въ треть, аже кто възметь 2 рѣзу, то то ему взяти истое, пакы ли възметь третии рѣзъ, то истого ему не взяти. О рѣзѣ же. Аже кто емлеть по 10 кунъ от лѣта на гривну, того не отметати. Оже кто которыи купець, шедъ гдѣ любо съ чюжими кунами, истопится или рать възметь, или огнь, то не насилити ему, ни продати его, но како начнеть от лѣта платити, тако же платить, занеже пагуба от бога есть, а не виноватъ есть. Оже ли пропьется или пробьется, а въ безумии чужь товаръ потравить, то како любо тѣмъ, чьи то куны: ждуть ли ему, продадут ли его, своя имъ воля. О долзѣ. Аще кто многым будеть долженъ, а пришедъ гость изъ иного города или чюжоземець, а не вѣдая запустить за нь товаръ, а опять начнеть не дати гостю кунъ, а первии длъжници запинати ему начнуть, не дадучи кунъ, то вести я на торгъ и продати, и отдати же первое гостеви куны, а домачнымъ, что ся останеть кунъ, тѣм ся подѣлятъ. Пакы ли будуть княжи куны, то княжи куны переже взяти, а прокъ въ дѣлѣ. Оже кто много рѣза ималъ, то тому не имати. О закупѣ. Оже закупныи бѣжить от господина, то обелъ. Идет ли искати кунъ, а явлено ходить къ князю или къ судиямъ, бѣжить обиды дѣля своего господина, то про то не робятъ его, но дати ему правда. А иже у господина ролеины закупъ будеть, а погубить своискы конь, то не платить ему, но еже далъ ему господинъ плугъ и борону, от него же копу емлеть, то то ему погубившу платити. Аще ли господинъ его отошлеть на свое орудие, а погыбнеть без него, того ему не платити своему господину. Оже изъ хлѣба изъ забоя выведуть, то закупу того не платити. Но еже погубить на полѣ или въ дворъ не вженеть и не затворить, гдѣ ему господинъ его велѣлъ, или орудия своя дѣя погубить, то ему платити. Оже господинъ приобидить закупа, увѣдеть вражду и увередить цѣну, а введеть в купу его или отарицю, то то ему все воротити, а за обиду ему платити 60 кунъ. Аще ли прииметь на немъ кунъ, то опять ему воротити куны, что будеть приялъ, а за обиду ему платити 3 гривны продажи. Продастъ ли господинъ закупа обель, то наимиту слово да въ всѣх кунахъ, а господину платити за обиду 12 гривенъ продажи. Аще ли господинъ бьеть закупа про дѣло, то безъ вины есть, бьеть ли, не смысля, пиянъ, без вины, то яко же свободному платити, тако и въ закупѣ. О холопѣ. Оже холопъ обилныи выведеть конь чии и любо, то платити за нь 2 гривны, иже закупѣ уведеть что, то господинъ в немъ; но оже гдѣ налѣзуть, то перед заплатить господинъ его конь или ино что будеть взял, а ему холопъ обелныи. Пакы ли господинъ его начнеть не хотѣти платити за нь, а продасть и, и отдасть же преже за конь или за волъ, или за товаръ, что будеть взялъ, а паробокъ ему взяти самому себе. Оже холопъ ударить свободна мужа, а убѣжить въ хоромы, а господинъ его не выдастъ, то платити за нь господину 12 гривенъ; а затѣмъ, аще гдѣ налѣзеть удареныи тои своего исца, которыи его ударить, и велики князь то Ярославъ Володимеричь былъ уставилъ убити, но то сынове его по немъ уставиша на куны: или взяти, или бити, разъвязавъше, или взяти гривна кунъ за сором. О послушествѣ. А послушество на холопа не въскладаютъ, но оже не будеть свободнаго, то по нужи сложити на боярьска тиуна, на дворьскаго, а на иныхъ не въскладывати. А въ малѣ тяжи по нужи сложити на закупа. О бородѣ. А хто порветь бороду, а выметь знамение, а будуть людие, то 12 гривенъ продажи; а иже безъ людеи, в поклепѣ нѣт продажи. О зубѣ. Оже выбьютъ зубъ, а кровь увидять у него въ ртѣ, а люди влѣзуть, то 12 гривенъ продажи, а за зубъ взяти ему гривна. О бобрѣ. А кто украдеть бобръ, то 12 гривенъ продажи. Оже будеть рассѣчена земля или на земли знамение, им же ловлено, или сѣть, то по верви искати к себѣ татя, а любо продажа платити. Оже борть разломить. А еже борть разнаменуеть, то 12 гривенъ продажи. Оже межу перетнеть борътную, или ролеиную между разореть, или дворную межу тыномъ перетынитъ, то 12 гривенъ продажи. О дубѣ. Оже дубъ претнеть знаменыи, или межныи перетнеть, 12 гривенъ продажи. О накладѣх. А се накладъ 12 гривенъ: отроку 2 гривны и 20 кунъ, а самому ѣхати съ отрокомъ на дву конехъ, а овесъ сути на ротъ, а мяса дати овенъ или полоть, а инѣмъ кормомъ, что имъ чрево възметь, а писцю 10 кунъ, перекладнаго 5 кунъ, а за мѣхъ 2 ногаты. О борти. Оже борть подъломить, 3 гривны продажи, а за дерево 3 гривны. Иже пчелы выдереть, 3 гривны продажи, а за медъ, ожо будуть пчелы не лажены, то 10 кунъ, будеть ли олекъ, то 5 кунъ. Не будеть ли татя, то по слѣду женуть, оже будеть слѣдъ къ селу или к товару. А не отсочатъ от себе слѣду и ни идуть на слѣд, или отбьются, то тѣмь платити и татба, и продажа. А слѣдъ гонить съ чюжими людми и с послухы. А еже погубять слѣдъ на гостинници на велицѣ, а села не будетъ, или на пустѣ, гдѣ же не будеть ни села, ни люди, то не платити ни продажи, ни татбы. О смердѣх. Оже мучить смердъ смерда безъ княжа слова, то 3 гривны продажи, а за муку гривна кунъ. О огнищанинѣ. Аще огнищанина мучить, то 12 гривенъ продажи, а за муку гривна кунъ. Аще лодию украдеть, то 60 кунъ продажи, а лодию лицемь воротити, а не будеть лицемъ, то за заморьскую лодию 3 гривны, а за набоиную 2 гривны, а за стругъ гривна, а за челнъ 8 кунъ. О перевѣсех. Аще кто посѣчеть верею или вервь перетнеть в перевѣсѣ, то 3 гривны продажи, а господину за верею и за вервь гривна кунъ. О перевѣсѣх и о птицах. Аще кто украдеть въ чьемь перевѣсѣ чии песъ или ястробъ, или соколъ, то 3 гривны продажи, а господину гривну, а за голубь 9 кунъ, а за куря 9 кунъ, а за утя 30 кунъ, а за жаравь 30 кунъ, а въ сѣнѣ и въ дровѣхъ 9 кунъ, а господину, колко будет возъ украдено, то имати ему за возъ по двѣ ногатѣ. О гумнѣ. Аще ли кто зажждеть гумно, то на потокъ и на грабежь домъ его, преже пагубу росплативши, а въ процѣ князю поточити. Тако же, оже кто дворъ зажждеть. А кто пакощами конь зарѣжеть или скотину, то продажи 12 гривенъ, а за пагубу господину гривна урокъ платити. А тѣ тяжи вси судять с послухы съ свободными. Будеть ли послухъ холопъ, то на правду холопу не вылазити, но оже хощеть истець или иметь нарекати тако по сего рѣчи: «Азъ емлю тя, а не холопъ», и емлеть на желѣзо, оже обинит, и тои емлеть на немъ свое, не обинит ли его, а платити ему за муку гривна, зане полъ холопии рѣчи ялъ и; а желѣзного платити 40 кунъ, а мечнику 5 кунъ, а полгривны дѣтьскому. То ти желѣзные уроки, кто си в чемъ емлеть. А еже емлеть на желѣзо подъ свободныхъ людеи рѣчи, любо ли запна на нь будеть, или запна не будеть, или прихождение нощное, или кимъ любо образомъ, оже не ожется, про то мукы не платити ему ни одино желѣзное, кто и будеть ялъ. О женѣ. Оже кто убиеть жену, по тѣм же судомъ судити, яко же и мужа. Оже будеть виновата, то полъ виры: 20 гривенъ. А в холопѣ и в робѣ виры нѣтуть, но оже будеть без вины убиенъ, то за холопъ и за робу платити урокъ, а князю продажи 12 гривенъ. О смердьи задници. Ожо смердъ умреть безъ дѣти, то задница князю. Оже будуть у него дщери дома, то даяти чясть на ня, аще ли будуть за мужьми, то не дати чясти. О боярьстѣи задници и о людьстѣи. А иже в боярехъ или же въ боярьстѣи дружинѣ, то за князя задница не идеть, но оже не будеть сыновъ, а въ дщери възмут. Аще кто, умирая, разделить домъ дѣтем своимъ, на том же стояти. Пакы ли без ряду умреть, то всѣмъ дѣтемъ и на самого чясть дати по души. О женѣ. Аще жена сядеть по мужѣ, то дати еи чясть, а у своихъ дѣтеи взяти чясть9. А что на ню мужь възложилъ, тому же есть госпожа, а задница ея мужня10 не надобѣ. Будутъ ли дѣти, то что первои жены, то то възмуть дѣти матери своеи, любо си на жену будеть възложилъ, обаче матери своеи възмуть. Аже будеть сестра в дому, то тои задници не имати, но отдадять ю братия замужь, какъ си могуть. А се уроци городни. Городнику, закладаючи городъню, куна взяти, а кончавше ногата. А за кормъ и за вологу, и за рыбу 7 кунъ на неделю и 7-ро хлѣбовъ, 7 уборковъ пшена, 7 луконъ овса на 4 конеи, а имати ему, донележе городъ срубять. А солоду единою ему дадятъ 10 луконъ. А се уроци мостовные. Мостнику, помостившу мостъ, взяти ему от дѣла от 10 лакотъ по ногатѣ. Аже починить мосту ветхаго, то колко городень починить, то взяти ему по кунѣ от городни. А мостнику самому другу ѣхати на дву конехъ съ отрокомъ, а овса 4 лукна. О задници. Аще будуть робии дѣти у мужа, то задници имъ не имати, но свобода имъ матерью. А оже будеть у мужа в дому дѣти малы, а не движася сами собою, печеловати. А мати имъ поидеть замужь, токмо имъ ближнии будеть, тому же дати на руцѣ и с добыткомъ и з домомъ, донележе възмогуть, а товаръ дати пред людми. А что срѣзить товаромъ тѣмъ или пригостить, то то ему себѣ, а истыи товаръ воротити имъ, а прикупъ ему себѣ, зане онъ прекормилъ и печаловался ими. Оже от челяди плодъ или от скота, то все поимать лицемъ, что поималъ будеть. Что ли будеть растерялъ, то все ему платити дѣтемъ. Аще же и отчимъ приметь съ задницею дѣтеи, и то такоже есть рядъ, яко же рядилъ. А дворъ без дѣлу отенъ всякои меншему сынови. О женѣ. Аще жена оборчется сидѣти по мужѣ, а ростеряеть добыток, а поидеть замужь, то платити еи все дѣтемъ. Не хотѣти ли еи начнуть дѣти ни на дворѣ, а она начнеть всяко сидѣти въсхочеть с дѣтьми, то творити всяку волю ея, а дѣтемъ не дати воли, но что еи далъ мужь, с тѣмъ же еи сидѣти с детми, или свою часть вземше, сидить же. А матерня часть дѣтемъ не надобѣ, но кому мати въсхощеть, тому дасть, дастъ ли всѣмъ, и вси раздѣлятъ, безъ языка ли умреть, то, у кого ли будеть на дворѣ была и мертва, и кто ю кормилъ, тому взяти. Оже будеть двою мужии дѣти, а одинои матери, но онѣмъ своего отца задниця, а онѣмъ своего отца. Будеть ли что потерялъ своего иночима, а онѣхъ отца, а умреть, то възварити брату на нь, иже людие вылѣзуть, что будеть ростерялъ отець его иночимля, а что ему своего отца, то дръжить. А матери которыи еи сынъ будеть, перваго ли мужа или другаго, или тому же дасть все, аще ли и всѣ сынове ея будуть лиси, а дщери можеть дати, кто ю кормить. О задницѣ. Аще братия растяжутся пред княземъ о задници, то которыи дѣтьскыи идеть ихъ дѣлити, тому взяти гривна кунъ. О судебных уроцѣхъ. А се уроци судебнии: от виры 9 кунъ, а металнику 9 вѣкошь, а от борътнои земли 30 кунъ, а металнику 12 вѣкошь, а от ролеинои земли тако же, а освободивше челядина 9 кунъ, а металнику 9 вѣкошь, а от иныхъ от всѣхъ тяжь, кому помогуть, по 4 куны, а металнику по 6 вѣкошь. О холопьствѣ. А холопьство обелное трое: еже кто то купить, хотя и до полу гривны, и послухы поставить, а ногату дасть предъ самѣмъ холопомъ, а не без него. А другое холопьство: поиметь робу, а безъ ряду. Поимет ли с рядомъ, како ся будеть рядилъ, на том же и стоить. А се третие холопьство: тиуньство безъ ряду, или ключь к себѣ привяжеть. С рядом ли, то како ся будеть рядилъ, на томъ же и стоить. А вдачь не холопъ. А инии по хлѣбѣ робять, ни по придатцѣ, но оже не доходять годъ, то ворочати ему милость, отходит ли, то не виноватъ есть. Оже холопъ бѣжить, а заповѣсть и господинъ, аже слышавъ кто или зная, или вѣдая, оже есть холопъ, и дасть ему хлѣба или путь ему покажеть, то платити ему за холопъ 5 гривенъ, а за робу 6 гривенъ. Аще кто переиметь холопа чюждаго или робу и дасть вѣсть господину его, то взяти ему переима гривна кунъ. Не ублюдеть ли его, то платити ему 4 гривны за холопъ, а пятая переемная ему, а будеть роба — 5 грывенъ, а 6 на переемъ отходить. А кто самъ своего холопа досочится въ чьемъ любо городѣ или в хоромѣ, а будеть намѣстникъ не вѣдалъ его, то, поведавше ему, пояти же у нево отрокъ и, шедшу, увязати, и дати ему вязебную 10 кунъ. Аще упустить и, гоняа себѣ, ему пагуба, а не платить в то ни что же, тѣм же и переима нѣт. Оже кто, не вѣдая, чюжь холопъ усрящеть или повести дѣетъ, или держить и у себе, а отъидеть от него, то ити ему ротѣ, яко «не вѣдалъ есмь, оже есть холопъ»; а платежа в томъ нѣту. Оже гдѣ холопъ вылжеть куны, а онъ будеть, не вѣдая, вдалъ, то господину выкупати и, или лишится его; вѣдая ли будеть далъ, то кунъ лишену ему быти. Оже кто пустить холопа в торгъ, а должаеть, то выкупати его господину, а лишатися его нелзѣ. Аже кто купить чюждь холопъ, а не вѣдая, то первому господину холопъ пояти, а оному куны имати ротѣ ходивше, яко «не вѣдая, есмь купилъ». Вѣдая ли, будеть купилъ, то кунъ ему лишену быти. Оже холопъ бѣгая добудеть товару, то господину холопъ и долгы, господину же и товаръ. Аще кто бѣжаа, поемля сусѣдне или товаръ, то господину платити за нь урокъ, что будеть взял. Оже холопъ крадеть кого любо, господину выкупати и, любо выдати, с кѣмь будеть кралъ, а женѣ и дѣтемъ не надобѣ, а оже будуть с нимъ крали или хоронили, то всѣхъ выдати. Пакы ли я выкупаеть господинъ, аже будуть с нимъ свободнии крали или хоронили, то ти князю въ продажи. О человецѣ. Оже человекъ полгавъ куны у людеи, а побѣжить в чюжу землю, вѣры ему не яти, какъ и татю. О городскых мостех, осменики поплата. А в Людинъ конець чрез гроблю от Добрынины улицы в городняя врата до Бискупли улици, до Бориса и Глѣба, а тиможеномъ до коломнянъ, а коломляномъ до Нерьтьского мосту, а нерядичяномъ до веряжанъ, а веряжаномъ до пидьблянъ, а пидьбляном до Чюдинцевои улицѣ, а Чюдиньцевѣи улици съ загорожаны до городныхъ воротъ, а владыцѣ сквозѣ городная врата съ изгои, а съ другыми до Острое улици 1. Довыдожа ста 2. Слепцева ста 3. Бовыкова ста 4. Олексина ста 5. Ратиборова ста 6. Кондратова ста 7. Романова ста 8. Сидорова ста 9. Гаврилова ста 10. Княжа ста 11. Княжа 12. Рьжевьская 13. Бѣжитьская 14. Володьская 15. Обонижеская 16. Луская 17. Лобьская 18. Волховьская 19. Яжельбичьская. Двои рили до торгу софьяномъ до тысяцьскаго, тысяцьскому до вощникъ, от вощникъ посаднику до Великаго ряду, от Великаго ряду князю до Неметьскаго вымола, немцемь до Иваня вымола, гтомъ до Гелардова вымола до задняго, от Гелардова вымола огнищаномъ до Будитина вымола, ильицаном до Матеева вымола, а михаиловцемь до Бардины улки, а видьковичамъ до Климятиныхъ сѣнеи. О муцѣ. Оже утяжуть в мукѣ, а посидить у дворянина, 8 ногатъ за ту муку. А у колоколници бьютъ кнутомъ, а за ту муку 80 гривенъ. По си мѣста судебникъ Ярославль.

Судебникъ святого правовѣрнаго великаго самодръжца царя Костянтина греческаго. Законъ судебныи людемъ. Глава 1. Преже всякои правды подобаеть о божии вѣрѣ глаголати. Тѣм же и святыи великыи царь Костянтинъ греческыи, первыи законъ вписавъ, преда, тако глаголя, яко всяко село, в непотребу аще бываеть или присягы поганьскы, да отдавается въ божии храмъ съ всѣмь имѣниемъ, елика суть господеви. И то село, творящая требы в немъ и присягы, и да продасться съ всѣмь домомъ своимъ, и цѣна ихъ дасться бѣднымъ. Всяко бо село, аще ему господинъ погыбнеть, а не будеть наслѣдника рода его, дабы тяжалъ, да дасться церкви божееи. Аще ли кто от людеи тяжеть его по насилию, да битъ будеть предъ старѣишиною. Глава 2. О клеветѣх и о шептѣх. Всякъ творяи клеветы, достоить князю и судии не послушаати ихъ безъ свидитель многъ, но глаголати къ суперникомъ и клеветникомъ, аще не притосхнеть с послухы. Но яко же законъ божии учить, ту же казнь прииметь судия, иже по криву судять. Еже на друга безъ послуха глаголеть, божии законъ велить, иже сего не творити, проклятъ да есть. О супръници. А суперници да бити будуть безъ послухов. И о браних и о супостасѣх, и о полону. И исходяще къ супостатомъ на брань, подобаеть имъ хранитися от всякаго слова неприязнена и вещеи и от жены, и къ богу единомыслие свое имѣти, и молитву творити, и обѣты къ святымъ его и съ совѣтом же брани творити. Помощь бо от бога дасться въ сердцѣхъ съвѣты творити. Не въ премногу бо силу бываеть победа брани, но от бога крѣпость, таже богу дающему победу. Плѣна же 6 часть достоить взимати княземъ, а прочее все число всѣмъ людемъ в равную чясть раздѣлити от мала и до велика. Довлѣеть бо жупаномъ и казначѣемъ княжа чясть, а прибытокъ людемъ. Аще ли обрящутся етери от нихъ, дръзнувшеи от тѣхъ друговъ или кметичищь, или простыхъ людеи, подвигъ и храборьство съдѣеть обрѣтаяися князь или воевода, в то время от уреченнаго урока княжа да подается, яко же и лѣпо есть. Да подъемлеть я по части, иже обрѣтается на брани, да бываеть чясть, и иже остають на стану, да бываеть. Тако бо и глаголано есть и писано бысть, и предано от царя и пророка Давида. Глава 6. Оже мужь блудить с рабою от жены, а се иже имет творити. Глава 6. Имѣя жену свою и примѣшаяся рабѣ, являющеся бещинници и блудяи с рабою, и да битъ будеть муже тъ, а рабу сию достоить от князя земли тоя продати чрезъ землю ту в ыную область, а цѣну ея дати убогымъ; тоже блудящаго по божию закону достоить удалятися имъ, да отдасться божиимъ рабомъ в постъ: 7 лѣт достоить внѣюду божиа храма, 2 лѣта въ время литургия стояти, а два лѣта влазити въ церковь до святого еуагелиа, а прочее внѣ стояти и послушати литургиа; друзии же 2 лѣта до «Вѣрую въ единого бога», а седьмое лѣто всю да яти; не взимати же от священныхъ ничто же, но кончати же 7 лѣто; въ 8 же все приимати, но с разсужениемъ. Достоить же ясти хлѣбъ с водою в 7 лѣт. Соблудивыи съ чюжею рабою да битъ будетъ и дасть 30 стлязь, рекши златниць, господину рабы тоя, а самъ дасться в постъ 7 лѣтъ, яко же и преже рекохмъ, еда не предасться. Аще ли нищь есть, да подаеть противу силѣ своего имѣниа господину рабы, а самъ реченому посту дасться. Глава 7. Иже блудить с черницею. Блудящему с черницею по закону людьскому носа ему урѣзати, а по церковному закону 15 лѣтъ поста да предлагаеться ему. О кумѣ. Глава 8. Иже поиметь купетру, рекши куму свою, женѣ собѣ, по закону людьскому носа имъ обѣма урѣзати и разлучити а, а по церковному закону разлучити а и посьтѣ 15 лѣтъ. Дает же ся чинъ по тому же сице: 5 лѣт внѣ церкви стояти, плачющеся и послушающе литургию, а 4 лѣта въ церкви стояти до святого еуангелиа, а 3 лѣта до «Вѣрую въ единого бога», 3 — вся, и о хлѣбѣ, и о водѣ. И тако скончавши урокъ свои, и въ 16 лѣто все возмуть. О дщери. Глава 9. Оже ли дщерь свою поиметь от святого крещениа, в ту же казнь да внидеть, а суд то же по людскому, яко и кумомъ, яко же пред рекохомъ. О мужатѣи женѣ. Иже съ мужатою женою обрѣтается, носы обѣма урѣзати, и да битъ будеть. Аще ли самъ мужь застанеть, да убиетъ я оба, яко и пса у верзости. О судияхъ и о послусѣх. Въ всякю прю и клевету и шепты достоить князю и судии не послушати безъ свидитель многых, но глаголати къ суперникомъ и клеветникомъ: «Аще не притькнете послуховъ, яко же законъ божии велить, прияти ту же казнь чаите, оже на друга глаголете, божии законъ тако велить». Да же сего не схранить, да будеть проклятъ. Надо всѣми же сими на всякои прѣ князю или судьи достоить со всяцѣмь испытаниемъ и съ въстезаниемъ и терпѣниемъ испытание истезанию творити и безъ послуховъ не осудити, но искати послухъ истиненъ и въспросити послухы истовые, боящихся бога, нарочитыи, не имуще вражда никоея же, ни врежающая, ни мьсти с нимъ имѣюща, ни мерзости, ни лукавьства, ни тяжи, ни при на него глаголють, но страха ради божия и правды его. Число же послух да бываеть 11. То же число послухъ даите въ великия пря от единаго до 18, а выше, ни ниже сего рока; и в малыя пре до 7, от 7 и до 3-хъ, а не мене сего рока. Власть же имать на судѣ, на него же тои глаголеть судии, залагати и глаголати послухомъ; да обладаеть послухи, или присягу, или продажду, или таже казнь. Аще ли в кое время обрящутся лжуще, не достоить же потомъ ни въ едину прю тѣхъ послуховъ приимати, иже будуть когда обличени лжуще и преступающе законъ божии или зажитие имѣюще. Недоволнии же о себѣ, невидими нашею на прю отъемлются. Аще будут два послуха или будеть на единомъ измѣна, то и другыи не послухъ, яко оба лжуще или житие скотьско имуще, или иже о себѣ непобедими на присягъ отъимутся. О девици. Глава 10. Приложивыися девици девою, а не въ волю родившимъ ю, последи же симъ очютившимъ, аще възлюби ю отрокъ пояти, и въсхощета родителя ея, да тогда бываеть свадьба. Аще ли единъ ею не рачити начнеть, честенъ сы богатствомъ своимъ, то отрокъ девици дасть за срамъ литру злата, сирѣчь златниць 70 и 2 стьлязя. Аще ли подобен есть не имѣти, то дасть полъ имѣния своего и ниже того. Аще ли нищь есть, то тепетъ его судия земли противу силѣ его и посылаеть от своея области. И от земли тое да отженуть и, повиненъ есть посту 7 лѣтъ, яко же писахом. Иже деву уносить, то тепут и въ триста ран. Глава 11. Приложився девици девою в пустѣ мѣсте нудми пусту, находившую людьми, идеже аще еи не будеть помогы, да тепут отрока того и да продадуть я имѣние его дати девици все за срамъ. Глава 12. Прикоснувыися въздѣвящеися девици преже времени 13 лѣтъ, да продасться самъ отрокъ съ всѣмъ имѣниемъ своимъ и да тепуть его, и дадуть имѣние его девици. А по церковному же закону нужу створивыи нареченѣи замужь, вси суть повинни посту 7 лѣтъ, яко же преже мужатици дѣля глаголахомъ. Глава 13. Приложивыися девици нареченнѣи замужь, обрученеи мужу, аще ли и въ волю девици залѣзлъ будеть, носъ да урѣжут ему и да тепуть его 107 ранъ. Глава 14. О свадьбѣ, иже в роду женятся. Кровь мѣсяще въ свою кровь, свадьбу дѣють творящеи, да тепуть, и да разлучатся. Оже имѣет 2 женѣ. Глава 15. Иже имѣяи двѣ женѣ, да ся ижденет менца съ своими дѣтьми, и тепуть его твердѣ, а постъ 7 лѣтъ. Глава 16. О зажиганьи. Въжагаяи чюжь лѣсъ и сѣкыи дрова от него, в сугубу вину повиненъ есть. О враждѣ. Глава 17. А иже за какы етеры вражды или разграбление рати имѣния дѣля огнемъ зажигаютъ храмы, аще въ храмѣ, да огнемъ съжгуть, и аще ли внѣ града, или въ веси, или села, или въ селехъ хлѣбы, или гумно, или ино что волею, то и мечемъ усѣкается, иже зажигаеть; а по церковному закону в постѣ 12 лѣтъ предълагается, яко враждебникъ есть. О зажигании нивы. Глава 18. Аще ли кто, терние или степлие хотя зажещи ти на своеи нивѣ, възгнѣтить огнь, тои же огнь пришедъ и пожжеть чюжия нивы или виноградъ, достоить судии испытати, да аще в невидѣнии или въ благодать възгнетившу огнь сь, то то бываеть безъ щеты съгорѣвшаго да творить. О зажиганьи нивы. Аще любо въ вѣтренъ день или в нощь вьялица или огнь тои вѣтръ възгнетить, да не схранилъ будеть възгнетивы огнь, а рекъ: «Не приидеть огнь»; или облѣнився лѣностию, или умѣдливъ, или не не моглъ будеть, то пожжеть огнь, да платить и да тепуть его. Аще ли съхранилъ будеть все, напрасно же духъ буренъ нападет, и сего ради проидеть огнь далече, и да не осудится. Аще от тучи загарается храмъ чии, пожждеть етеро чье от своего ему рухла, и проидеть огнь и прочее пожжеть окрестныхъ своихъ ему сусѣд съсуды и храмы, яко внезаапу бывшу пожждению, тому да не осужается. Оже прибѣгаеть въ церковь. Никто же прибѣгающаго въ церковь нужею да не изовлачить, но вещью прибѣгы бѣду свою да повѣдывають попови, и попъ являетъ виннаго и вину от него створеную да приемлеть, яко убѣгая, и по закону да изыщется обида его и испытается. Аще ли кто покушается нужею от церкви извести прѣбѣгъшаго, кто любо будеть, таков же да прииметь 140 ранъ, и тогда, яко подобаеть, да испытается обида прибѣгъшаго. Иже имѣеть котору каку со етером. Всякъ вещь имѣяи съ етеромъ что котору каку, сам ся стоя с нимъ и въ земля от него, а не вѣдая владыкамъ, но о себѣ творя, или по власти, или по силѣ, или по насилию, нудми належаще, въ истинну свое имѣя, се да творить, да отпадаеть своея вещи, и да възвращають ю. Аще ли чюже възметь что, да от владыкы земли тоя да не владаеть о себѣ, но да тепуть его и да не строить никого же, яко не въ власть бывая, се же бывая мѣстникъ, и тако бывая, да устроение створить тому, еже взяти. Глава 29. О родех. Родители и дѣти, иже на ся что възглаголеть, да не имуть имъ вѣры, ни господы на господа, ни по осподѣ рабѣ, но свободнику, или от иноя чади аще кто будеть, тому да имуть вѣры, но то съ испытаниемъ, да будеть безъ грѣха рабъ, ли свободникъ, или послухъ да не бываеть. Глава 21. О полону. Иже кто от ратныхъ купить плѣнника и весь строи его, свою цѣну дасть на немъ, тоже аще имать ту же цѣну вдавыи на себѣ, да идеть на свободь въспять, да имат искупъ его мездника, дондеже изработается. Аще ли не имать что дати на себѣ, юже свѣща цѣну, а мьзды ему нарицающеся на всяко лѣто 3 щлязи пред послухомъ, и тако скончавшу ему цѣну, да отъпущается свободенъ. Тако же, иже аще работаеть из робы, и свѣщаеть цѣну его пред послухи, да отпущается. О послушествѣ. Глава 22. Свѣдитель послух, свидители от послуха да не свидѣтельствуютъ, глаголюще, яко «слышахомъ от коего сего длъжна суще и сего причастника», или ино что свидѣтельствующе, духомъ слышаще, аще и жупани суть, рекши князи, иже се свидительствуютъ, да не слушаютъ ихъ, не суть бо сами видели. Иже от ратныхъ являяся и святую нашу вѣру крестьяньскую отвергоша, и възвращашася въ свою землю и градъ, да въ церковь предастъся. О конѣ. Глава 24. Аще кто испросить конь, а он дасть до нарочита мѣста, или послеть, и ключится вредити, или умреть, испросшу, глаголеть, достоить бес четы быти, да творить господинъ коня, не платится. Аще ли в зарокъ мѣстомъ проидеть, то да умреть, тои заплатитъ. Аще кто безъ повелѣния на чюжемъ конѣ ѣздитъ, да тепуть его три утра и да продадут его, яко и татя. О поганом полону. Глава 25. Иже от ратныхъ имуть поганово и въ святую нашу вѣру христьяньскую, и отвержется, възвращающеся въ свою землю и градъ, да тепуть его и въ церковь да предадуть его. О скотѣ. Глава 26. Иже чюжии скотъ затворить или голодомъ уморить, или инако како убилъ, в сугубу вину да осужается, да тепуть его и да продадуть его. О татбѣ, иже крадеть на воинѣ. Глава 27. Крадыи на воинѣ аще есть крадыи оружие, да тепуть его. Аще ли конь, да продадут. Аще крадеть рабъ у господина. Крадущему рабу у господина, господинъ, аще и хощеть имѣти и таковаго раба, окраденномо да искупится, да безъ счеты творять. Аще ли не хощеть створити имѣти раба того, сего да отдасть в работу окраденому, то да тепуть и да продадуть, ему же крадъ. О стадѣ. Глава 28. Иже стадо чие чюже заженеть, яко вожь, въ первое се творя, да тепуть и, второе же от земля тоя да исъжжденется, третие еже створить, да тепуть и да продадуть, но елико поставить все и елико будеть загналъ. О гробнѣмъ тати. Глава 29. Иже мертвеца съвлачить въ гробѣ, да продасться в сугобину, и да тепуть его въ 300 ранъ. О церковнѣмь тати. Глава 30. Влазяи въ олтарь или въ день, или в нощь и вземляи етеро от святых сосудъ или от платия и от всякия вещи, да тепуть его да продадуть. А иже внѣюду олтаря церкви възметь, да тепуть его и постригут главу, и изъ земли слется, яко нечистъ. Аще трижды украдеть въ церкви что, да ослепять его и носа да урѣжуть ему. О татѣ. Глава 31. Иже свободнаго украдет или продасть, или поработить, да поработится самъ, яко же и онъ поработилъ есть свободу, в ту же работу да въступить. О рабѣ. Глава 32. Приснубляя кто подъмолвивыи чюжаго раба и крыя его, а не явѣ творяи, повиненъ есть и тои господину тому того своему господину пристроити другаго или иного купивъ или цѣну дасть, таковаго раба дати цѣну его, и да тепуть его. О маложену. Глава 33. Не разлученно есть от бога маложенома житие творящу спасу, творець нашь господь богъ премудростию учить насъ, то бо въ бытии не суща человека створи не тако же, но перьсть вземъ от земля и создаи жену, а могыи инъ от мужеска ребра полу створи ю, да сшедшимся въ премудрость едино еста, а не въ двѣ лицѣ и плоти взаконить въ сверьствъ, да ни въ версту не разлучну. О разлученѣи. Тѣм же и жена, наченши горкии вкусъ и давши мужеви горкаго того же вкуса от льсти неприязнены, и от того разлученѣ в вѣкы мужа божия заповѣди преступлениемъ с подружиемъ створше, женою разлученъ за грѣхъ тои и страсть има за дѣти сласти за дѣемѣ сочтания не разлучая, а сверьсть неразлучна есть. О мужѣ и отпущеньи женѣ. Сему же закону явлену пакы от иеуангелиста утвержешися еуангелие, створшемуся въ оно время, внегда фарисѣи въспросиша Христа бога нашего: «Аще достоить человеку по всякои винѣ на всякъ грѣхъ отпущати жену свою». Отвѣща имъ Исус: «Яко же богъ сведе и сочта, человекъ да не разлучаеть, развѣ словесе прелюбодѣинаго». Послѣдующе же имъ убо яко и приснии ученици Христу богу, не смѣ имъ иного закона взаконити, но занеже от неприязнена видѣние впадает межи маложенома клеветы ради плотескыя похоти или иныя каковы любо злобы. Тѣм же въ число нарицающе закономъ вещи, ихъ же ради разлучаетася маложена мужь от жены своея за таковыи грѣхъ. И разлучаетъ же ся за сия грѣхи жена от своего мужа блуда ради, аще обличится проказы дѣюще животу его, или иныя какие злобы сведуще иного мужа кромѣ своего, но мужу очюжьщу, и не запрѣтить ему ни женѣ своеи. И пакы же аще в недугъ прокаженъ въпадеть, да разлучается жена от мужа. Аще кую проказу створилъ будеть еи или, иного чая, не исповѣсть еи, и аще въ прокаженыи недугъ впадеть, и аще етеро что от него ключится преже шествия единому ею умрети, въ злую язь впадшу от твари, и тварнику всякому огнемъ да съжждется. О судияхъ. Но се же все вѣдомо достоить княземъ и судиямъ с послухы истязати и испытати, яко же предъ писахомъ, всю дѣ велимъ вся бесчиници людьстѣи в великии судъ божии, им же суть обещници людьстии въ веселии суть богу от князь имати осужати, да не сего дѣля не достоить обиновати никого же, но вся на всякъ день въ божии законъ наставляти, уповающе на Христа бога, въ вселеньскыи судъ блаженыи же гласъ услышати: «Грядѣте, благословении отца моего! Наслѣдуите уготованное вамъ царствие, благыи раби вѣрнии! Въ мнозѣ вы устрою. Внидете в радость господа бога нашего, веселящеся съ аггелы въ вѣкы вѣкомъ. Аминь». О раздѣлении дѣтем. А се иже отець не уравняетъ дѣтеи, овому мало предасть, а овому много, а другаго лиха створить за гнѣвъ нѣкакъ, да ся разделить всѣмъ на части. О шевцѣ. Аще швець исказить портно, не умѣя шити или гнѣвомъ, да тепуть его, а цены лишенъ. О ключарѣ. Оже кто до ключяря ласковъ, възметь что любо у него, да тепуть оба, но ключаря боле. О бѣганьи. Иже людинъ бѣгаетъ от князя своего подъ иного князя, да тепуть его добрѣ. О попѣ. Аще попъ бѣжить от своего епископа къ иному епископу, да не поетъ. Аще ли простить и свои епископъ, да поеть, но на иномъ мѣстѣ. О орудѣи. Оже кто что орудие възметь, а не упрашавъ у господина орудия, да тепуть его. О волѣ. Оже кто волъ бьетъ, оря, да тепуть его, аще ли уразитъ, да заплатитъ. Тако же и конь. О глаголаньи. Аще ли кто велми глаголеть у господы и не смирно же, да тепуть его. О протравѣ и о скотѣ. Протравы по коровѣ, аще и волове ходять, толи испасеть ниву или виноградъ, да тепуть господина коровья, да и платить, еже будеть испаслъ. О пьсѣ. Песъ, аще проказы дѣеть, подърывъ клѣть или продравъ стропъ, влѣзеть, да убиють я. Аще ли дверми влѣзеть, а будуть не затворили, да не убиють его. О похваленьи. Аще ли кто похвалится на кого, и на него же будеть хвалился, да ся что створить винограду или нивѣ, или скоту или самому похвалник, да тепуть и продадуть его. О враждѣ. Аще кто вражду створить, Моисѣи бо пророкъ и законодавець поручилъ, да идеть рука за руку, и око за око, и глава за главу. Аже ся искупить, то от земли тоя да ижденется. О скотѣ. Аще скотъ в нощи разламляет плоты, ти да ясть в нощи и ходяи, да ся подасть господину двоичи. А третие еда ся устрѣлить стрѣлою, аще конь или говядо. Аще ли свиния или боровъ проломляет плоты или подърываетъ нощию, да убиют его, звѣрь бо тои есть злонравенъ, да иже разаралъ, то ребры заплатити. О еретицѣ. Аще етеру человеку рчеть: «Еретиче», да ударить и ножемъ. Аще ли предъ судия идеть, да подъиметь глаголавыи, еже есть было еретику подъяти, да тепуть его добрѣ. О ратаи. Иже ратаи, не дооравъ времени, поидеть прочь, да есть лишенъ орания, тако же и пастырь, иже стадо пасеть. О епископѣ и о попѣ. Оже имуть епископа или попа с чюжею женою, или дияка уларняго, да измутся сана своего. О послухѣ. Попъ же бывает въ послушествѣ за 12 мужь. О дву жену. Аще ся двѣ женѣ бѣсита, блуда ради лѣзучи, на купѣ творящи, иже мужь едина, да тепуть обѣ по 100 ранъ. О упоиствѣ. Аще другъ друга упоить до поруга, да биенъ будетъ 12 ранъ. О черньцѣ и о черницѣ. Аще имуть черньца с черницею, блудъ дѣюща, да окуютъ и и всадять в темницю, дондеже умретъ, отрекъ бо ся свѣта сего. О мужи и о женѣ, и осляти. Аще имется мужь съ ослятем или жена, аще ли да бьенъ будеть и продасться в поганыя, погано бо есть зѣло. Дати цѣну ту бѣднымъ. О разбоинице. Аще разбоиникъ имется, мечеви предасться. О клятвѣ. Аще кто кленется скупости ради, да бьенъ будеть. О оклеветании. Аще кто оклевещет друга, да биенъ будеть, да прииметь, яко же было оному прияти. О мщатѣ. Аще кто блудъ творить съ мщатемъ, да убиютъ его. О уставнѣи патриархомъ правилнои чести, яко не достоить имъ въсхищати области иному, достоины на освящение и строение, но и въсхищеныя по обидѣ възвратити. О сварѣ. Аще два мужа сваритася, то единъ удари подруга каменемъ или пястию, да не умреть, но сляжеть на ложѣ, аще ли въставъ, мужь походить на дворѣ о жезлѣ, чистъ есть ударивыи его, точию недѣлания его да дасть и цѣлбу. О битьи рабъ. Аще кто бьетъ раба своего или рабу жезломъ, ти да умреть от рукы его, судомъ да ся мьститъ. Аще ли пребудеть день или два, да не мьстится, свое бо есть имѣние. О сварѣ. И аще котораятася два мужа и уразити жену непразну, тии изыдеть от нея младенець не обличинъ, то дасть цѣну, елико задежеть мужь женѣ с подобою. Аще ли обличенъ будеть, то дасть душу за душу, око въ ока мѣсто, рука в рукы мѣсто, нога въ ногы мѣсто, зубъ въ зуба мѣсто, ижждение въ иждение мѣсто, вредъ въ вреда мѣсто, язва въ язвы мѣсто. Иже ударить въ око. Иже кто искнеть око рабу своему или рабѣ своеи, ти да осленет, свободь да отпустити я въ ока мѣста их. О зубѣ. Или зуб рабу своему или рабѣ своеи вы[бъеть], свободь да отпустить в зуба мѣсто. [О татьбѣ]. Аще кто украдеть теля или овцю, 5 телятъ да дасть въ телца мѣсто, а во овци мѣсто 4 овци дасть. О татбѣ. Аще въ подъкопании застанется тать, ти язвенъ умреть, нѣсть ему боя. Аще ли взидеть солнце за нь, и повиненъ есть. Аще ли не имать, да продадуть его в татбы мѣсто. Аще ли останетъ татба в рукахъ его от осляти и до овчяти, живу сугубу да дасть. О поклажеи. Аще кто дасть подругу сребро или ино что скрыти, ти украдеть и кто из дому его, и аще обрящеться тать, да тяжеть сугобь. Аще ли не обрящется тать, да приидеть господинъ дому предъ бога и да ся кленетъ. Аще ли нѣсть, слуковалъ самъ на все дружне положение по всему словеси въ кривину о всеи гибели, судъ обою украдъ, и у бога да дасть сугобь другу. О братѣ. Иже брату нищу взаимъ дасть, не будеть домъ его тощь, не задежи роста. О закладѣ. Аще ризу друга своего в залогъ заложиши до захода солнцу, отда же ему, есть бо все одежа ему си одина риза стыдѣния, в чемъ ему стати. Аще убо възопиетъ къ богу, слухомъ услышить и, милостивъ бо есть. О осляти. Иже узриши осля брата своего, падъшееся с рухломъ, да не минеши его, но въздвигнеши и или ино что да превратися, и судъ нищаго въ судѣ его и всего слова криваго да отпустиши и чиста и правдива, да не убиеши. Не оправди нечестиваго мзды ради, да не възмеши мьзды, мьзда бо ослѣпляеть очи видящимъ и рассыпаеть словеса правдивая. О сыну непокоривѣмь. Аще кому будеть сынъ непокоривъ губитель, не послушая рѣчи отца своего и матери, они кажуть, и не послушаетъ, отець же его и мати изведета предъ врата градъная мѣста града того и да ркуть градьскымъ мужемъ, глаголюще: «Сынъ нашь непокоривъ есть и губитель, не слушая речеи нашихъ, вѣтуя пьяница». Да побиютъ и камениемъ мужи града того, да умреть, да измуть злое сами от себе, да ти друзии видѣвше убоятся. О повѣшеньи. Оже кто кимъ грѣхомъ судомъ смертнымъ умрети, и повѣсять и на древѣ, да не пребудеть тѣло его на древѣ, но въ гробѣ погребуть и в тои день. О овчати. Аще видиши овча брата своего или ино что, плавающе въ водѣ или по полю блудяще, не мини е, но обрати къ своему брату. Аще ли нѣсть братъ твои, поими въ домъ свои, дондеже възыщеть брат твои, и даси ему, яко же створи всякои гибели его, ти обрящеши, не мини его, но възми, не могии потаити и да не съгрѣшиши богу. О сварѣ. Оже будеть пря межи человекома, и придета на судъ, да судять и, и да оправдаютъ праведнаго и осудять нечестиваго. Аще есть достоинъ ранъ нечестивыи, да поставиши предъ судиями, да бьютъ и пред ними по бесчестию его 40 ранъ, да не предъложить паче сего, безъ лѣпоты бо есть. Аще сваритися человека съ братомъ своимъ, то, пришедше, жена единаго его отъятъ мужа своего от убивающаго рукы, и имет мужа за лоно, да отсѣкуть ея руку, и не пощадить ея око твое. О умираньи. А се же повелѣваемъ, аще будеть умирая и повелѣлъ кому устроити имѣние, или съ детми которень сы или съ женою, ти тому поручить устроити имѣние предъ послухы, то да ему будеть нужа скончати все. Но аще есть строи, не противяся суду, повелѣние умершаго стоящему, то да глаголеть противу женѣ и дѣтемъ, да скончаеть волю умерьшаго. Аще ли есть поручникъ о себѣ, сам ся творя, приимъ строя умершаго домъ, то что погубить от имения жены и дѣтеи, то да възметь на судищи казнь 70 ранъ и дасть все сиротамъ, и полъгода приставить. Приказываем же с поручникы умершаго. И аще будуть почтени от работу въ свободу на отпущение осподичичемъ и госпожѣ, и аще ли не будеть свободъ, тогда не оставляютъ ихъ притити по госпожѣ и по осподичичехъ, яко и выше ркохомъ. Аще ли не правъ судъ, то взидуть къ великому отмѣстнику, еже его постави власть наша помагати сиротѣ и вдовици въ правду. Рекъшу богу пророкомъ: «Судите сиротѣ и оправдаите вдовицю». То да исправить великыи судия. И «обидяи сироту приемлеть судъ противу дѣломъ его». И повелѣваемъ же и порученымъ имѣние подъбно быти умеръшаго повелѣнию, да не будеть пияница, ни которы имуща с тѣми, яже начнуть строити, ни пустошници безаконии. Но да будуть подобнии, ацѣм же есть лѣпо строити, 1 о задушии, 2-е о женѣ и о детехъ. Се же начинающе, велимъ, общая боящеися казни, ни обинующася, не минующая ни великыхъ, не малыхъ, устрояти имѣние здравымъ ходящимъ и с целымъ умомъ, послухы подобны поставити, свѣдительствованы о добрѣ, да не будуть разбоиници, ни пияници, ни татье, ни иноя ни кое же злобы имуще, не мними, ни мнѣе седми от того града, идеже живутъ, или от веси, или аще откуду пришли суть, но подобни послушеству. Попущаем же и о рабѣхъ, свободою почтеныхъ, да стаютъ ити въ послушество, а не почтеных свободою право не велимъ. В писания, иже о имении своемъ, первое да впишеть вѣры своея образъ, иже и душу избавить. Аще же обѣдно избавити и преже житиемъ чистымъ не устроивше, ни рукы простершимъ убогымъ, ни свобожеше, обаче аще и всего до конца не получить, то аще и мука легъчаеши будеть. Глаголеть бо не лживъ есть рекыи: «Едина душа вящеши есть неба и земли». Да аще кто самъ в лѣностномъ семъ житии не достиглъ есть чимъ, ти отходяще оставляють многа уста за ся, яже начнуть мочи кричати, яже ны помогуть и по нас вѣчному огню отяти. Предая имѣние свое предъ послухы, да впишеть первое, что свободь, что ли дати убогымъ, что ли дѣтем, или сердоболи, или другомъ, или женѣ вещьнѣи, или иереомъ. Попущаетъ же суд нашь, да аще въсхощеть дарити от своея чясти жену си вещьную, то дарить достоиною чястью, еже наречется полъдому; наполу бо ему домъ, даетъ ему судъ власть, а полъвещи человѣческая не дасть ему, длъжнымъ судищемъ отцемъ чада своя кормити. Тѣмъ бо ся множество сдержит. О мачехах. Мачехам же и матеремъ велим крыющимъ имѣние у чюжие чади, иже не суть сердоболя, тѣ ся измѣнятъ крыемое, да ся изведуть на судъ и крывъшее, в нихъ же есть скровено, да ся лишатъ того, еже будеть крала, а онѣ приимут, яко и тати, казнь 70 ранъ и дадять общую татбу, скрывшую мачехою, и да подѣлять дѣти особь первыя жены с мачехиными дѣтми. Аще ли будеть кии дѣтищь с мачехою вѣдалъ, то и тъи дасть татбу с нею, да ему не будеть чясти в томъ, яко и мачесѣ. О оружии. Иже изломить другу копие или щитъ, или топоръ, да аще начнеть у себя хотѣти держать, то прияти ино что у него, аще ли инѣмъ чимъ ему заплатить пред чадью, иже начнеть вѣдати, колко будеть далъ на нем. О дѣтяти. Аще дадять дѣти въскормити длъжници, а саморазумѣетъ лжицею взяти, прокорма 3 гривны взяти. О человецѣ и о женѣ. Аще ся дасть человекъ или жена утошна времени, дернь ему не надобѣ. А поидеть прочь, дасть 3 гривны, а служилъ даромъ. О стозѣ. И за стогъ за тяжебныи и за сѣнныи гривна кунъ, а тяжа не надобѣ. О бесщестьи. А за бесчестную гривну золота, аже будет баба в золотѣ и мати, взяти ему 50 гривенъ за гривну золота. А оже будет баба не была въ золотѣ, а по матери ему не взяти золота, взяти гривна сребра, а за гривну сребра полосмы гривны. По си мѣста судебникъ царя греческаго Костянтина.

Костянтинъ же бяше тогда въ Новѣгородѣ, и разгнѣвася на нь великыи князь Ярославъ, и поточи и в Ростовъ, и на 3-ее лѣто повелѣ его убити в Муромѣ, на рѣцѣ на Оцѣ.

Бои третии Ярославу съ Святополкомъ. Въ лѣто 6527 [1019]. Прииде Святополкь съ Печенѣгы въ силѣ тяжцѣ на Ярослава; Ярославъ же събра воа многы купно съ наатыми его варягы, и изыиде противу его на Алто, и ста Ярославъ на мѣстѣ, идеже убиень бысть Борисъ; и въздѣвь руцѣ на небо, и помолися, рече: «Кровь брата моего въпиетъ къ тебѣ, Владыко! Мъсти отъ крови праведнаго, якоже мъстилъ еси кровь Авелеву, положивь на Каинѣ стенание и трясение; тако положи и на семъ окааннѣмъ братоубиици». И помолився, и рече: «Братиа моа! Аще еста тѣломъ отшла отсюду, но молитвою помозѣта ми на противнаго сего и гордаго убиицу». И се ему рекшу, поидоша противу себе, и покрыша Летьское поле обои отъ множества вои. И бысть сѣча зла, якоже не бывала такова въ Руси, и за рукы емлюще сѣчаахуся, и по удолиемь кровь ручиемъ течаше яко въ время дождевное, и съступишася трижды, и мнози вѣрнии видѣша аггелы, помагающа Ярославу; и обьмръкше биющеся, бѣ бо туча велика, и громъ изъ неа многь, и млъниа часто блистающи, и еликоже млъниа освѣщаваше, блищахуся оружиа въ рукахъ ихъ; и едва въ глубокь вечерь одолѣ Ярославь, а Святополкь побѣже. И бѣжащу ему, нападе на нь бѣсь, и вложи въ сердце его страхъ, и разслабѣша кости его, и не можааше на кони сидѣти, носяху его на носилѣхъ; и принесоша его къ Берестию, бѣгающе съ нимь, онъ же, гонимъ гнѣвомь Божиимь, глаголаше: «Побѣгните сь мною, женуть по насъ». Отроци же его всилахуть противу: «Егда кто женеть по немь? и не бѣ никогоже гонящаго, ни женущаго по немъ, и бѣжаху съ нимъ; онъ же лежа вь немощи, и въсхапився глаголаше: «охъ, се женутъ по насъ, побѣгните». И пробѣже Лятскую землю, гонимъ Божиимъ гнѣвомъ, и прибѣже въ пустыню межи Ческую землю и Ляхы, ту испроврьже злѣ животъ свои: спаде съ носилъ. Егоже и по правдѣ, яко неправедна, суду нашедшу на нь, по отшествии сего свѣта приаша мукы окааннаго Святополка: показаша явѣ посланнаа на нь пагубнаа рана, въ смерть немилостивно вогна, и по смерти немилостивно мучимъ есть, связань вь днѣ аду. Есть же могыла его и до сего дне въ пустыни, исходитъ изъ неа смрадъ золь. Се же Богь показа на показание княземъ русскымь, да аще сице сътворятъ, ее слышавше, туже казнь приимутъ; но и болша сиа, понеже вѣдуще се бывшее сътворятъ такоже злое убииство. 7 бо мстии приемъ Каинь, убивъ Авеля, а Ламехъ 70; понеже бо Каинь не вѣдыи мьщениа приати отъ Бога, а Ламехъ, вѣдыи казнь, бывшую на прародителехъ его, сътвори убииство. Рече бо Ламехь къ своима женама: мужа убихъ въ язву мнѣ, и уношу въ вредъ мнѣ; тѣмже, рече, 70 мьсти есть на мнѣ, понеже, рече, вѣдаа сътворихъ. Сеи Ламехь уби два брата Енохова, поа себѣ женѣ еа; сеи же Святополкь, новои Авимелехь. иже ся бѣ родиль отъ прелюбодѣаня, якоже и Авимелехь, иже изби 70 братии своа, сыны Гедеоновы, послѣди же самого жена з города полужерновомъ уби; тако и сии бысть окаанныи Святополкь, емуже обою сею горши мука бысть. Ярославъ же сѣде въ Киевѣ, утръ поту съ дружиною своею, показаа побѣду и трудъ великь по брату своею, и оттолѣ крамола преста въ Рускую землю, и Ярославь приа власть всея Рускыа земля.

О възыскании тѣла святаго Глѣба, князя Муромьскаго. Убиену же бывшу Глѣбови и повръжену на пустѣ мѣстѣ межи двѣма колодома, и Господь не оставляетъ своихъ рабь; якоже рече Давыдъ: съхранитъ Господь вся кости ихь, ни едина же отъ нихъ не съкрушится. И сему убо святому лежащу долго время, и не остави его Господь въ невѣдении и въ небрежении отинудъ пребывати; но показа Богъ мимоходящимъ гостиемь, овогда убо видѣша стлъпь огнень, овогда же свѣща горящаа, и пакы пѣниа аггелска слышааху мимоходяще гостие, инии же ловы дѣющеи и скоты пасущеи. Се слышааше и видяще, не бысть памяты ни единому ихь о вьзыскании тѣлесе святаго, дондеже не трьпя Ярославь злаго сего убииства, движеся на братоубиицу оного окааннаго Святополка; и браны многы съ нимъ съставивъ, и всегда пособиемь Божиемъ и поспѣшениемъ святою побѣдивъ: елико брани съставивь съ нимъ, посрамлень и побѣжень отбѣгааше, дондеже бѣжа погибе, якоже выше рѣхомъ. Ярославъ же начать въпрашати о тѣлесехъ святою: «како или где положена еста?» И о святѣмъ Борисѣ повѣдаша ему, яко въ Вышегородѣ положень есть, а о святѣмъ Глѣбѣ вси вѣдяху, яко во Смоленьсцѣ убиень есть, но невѣдяху, где положень есть; и тогда сказаша ему, яже слышаша отъ приходящихъ оттуду, како видѣша свѣтъ и свѣща въ пустѣ мѣстѣ. И то слышавъ Ярославъ, посла на възыскание ко Смоленску прозвытеры, рече: «Яко тои есть мои братъ». И обрѣтоша его, идеже бяху видѣли, и шедше съ кресты честно, и съ свѣщами мнозѣми и кадилы, и вложивше въ корабль, и привезоша и, положиша его въ Вышегородѣ, идеже лежить тѣло преблаженнаго Бориса; и раскопавше землю, ту положиша его, недоумѣюще бо еще, якоже бѣ лѣпо и честно. Се же пречюдно и дивно и памяти достоино, како и колико лѣть лежало тѣло святаго Глѣба, то же неврежденно пребысть ни отъ единого плотоядныхъ звѣрии, или птиць, или гадь, не бяше почернѣло, якоже бо имать обычаи тѣлеса мертвыхь, но свѣтло, и красно, и цѣло, и благовоню имуще; тако бо Богу съхраншу своего страдалца тѣло. И не вѣдяху мнози ту лежащу святую страстотрьпцу тѣлесе; но якоже рече Господь: не можетъ градъ укрытися врьху горы стоа, ни свѣщи въжегши спудомъ покрывають, но на свѣтилѣ поставляютъ, да свѣтитъ темныа; тако и си святаа: прослави а Господь свѣтити въ мирѣ, и премногыми чюдесы сиати въ великои Русскои земли, идеже множество страждущихъ спасени бываютъ отъ святою и всечестною раку святыхъ страстотрьпець Бориса и Глѣба.

Княжение Ярославле по смерти Святополъчи Владимеричевъ. Начатъ же Ярославъ воа дѣлити, старостамъ своимъ по 10 гривень, а смердомъ по гривнѣ, а Новогородцомъ 10 гривень, и отпусти а вся по домомъ; и давь Новогородцомъ правду и уставь, списавь грамоту, и рече: «по сему ходите и дрьжите, якоже списахь вамъ». Здѣ пишетъ судебникь великаго князя Ярослава Владимерича, и потомъ его дѣтеи: Изяслава, Святослава и Всеволода, и по нихь уставъ великого князя Владимира Всеволодича Манамаха, и потомъ царя Костантина великаго; язъ же сие преминухъ, множества ради.

Еще же молю ваше, братие, преподобие и благородие, чтущихъ и послушающихъ книгы сиа, еже аще обрящетъ кто много недостаточное, или неисполненое, да не позазритъ ми: не бо бѣхь кианинь родомъ, ни Новаграда, ни Владимера, но отъ веси Ростовскыхъ областеи, и елико обрѣтохъ, толико люботруднѣ написахъ; а елика силѣ моеи невозможно, то како могу наполнити, егоже не видѣвъ предъ собою лежащаго? не имамъ бо многыа памяти, ни научихся дохторскому наказанию, еже сьчиняти повѣсти и украшати премудрыми словесы, якоже обычаи имутъ ритори; а яже аще Богъ поручитъ въ руцѣ мои, то прьвыхъ лѣтъ напослѣдокъ вьпишемъ.