В лѣто 6530 [1022].
В лѣто 6530 [1022]. Прииде Ярослав к Берестию. В си же времена Мстиславу сущу Тмуторокани, поиде на касогы. Слышав же се князь Касожскыи Редедя, изыде противу ему, и ставшема обѣма полкома противу собѣ, и рече Редедя къ Мстиславу: Что ради губивѣ дружину межи собою, но снидевѣ ся сама бороти; да аще одолѣеши ты, то възми имѣние мое, и жену мою, и дѣти мои; аще ли язъ одолѣю, то възму твое всеѣ. И рече Мстислав: Тако буди. И рече Редедя к Мстиславу: Не оружием бо ся боревѣ, но борбою. И снястася бороти крѣпко, и борющимася има, и нача изнемагати Мстислав, бѣ бо великь и силенъ Редедя. И рече Мстислав: «О пречистаа Богородице, помози ми, аще бо одолѣю сего, съзижу церковь в имя твоеѣ». И се рек, удари имь о землю, и вынзе нож зарѣза Редедю; и шед в землю его, взя все имѣние, и жену его, и дѣти, и дань възложи на касогы. И пришед Тмутороканю, заложи церковь пресвятыа Богородиця и създа ю, яже стоит и до сего дне.