В лѣто 6498 [990].

В лѣто 6498 [990]. По сем Володимиръ живяше в законѣ христианстѣ, помысли създати церковь пресвятыа Богородица и, послав, приведе мастеры от Грекъ. Наченшу же здати, и яко сконча зижда, и украси ю честными иконами, и поручи ю Анастасу ерею корсунянину, и попы корсуньскиа пристави служити в неи, вдавъ ту все, еже бѣ взялъ в Корсунѣ; иконы, и съсуды, и кресты.

О ГРАДѢ ВОЛОДИМЕРѢ ЗАЛѢССКОМЪ, ИЖЕ ВЪ СУЖДАЛСКОЙ ЗЕМЛѢ, НА РѢЦѢ КЛЯЗМѢ. Въ лѣто 6498 [990]. Поиде Володимерь въ Словянскую землю и страну Залѣсскую, и въ Суждалстѣй области и Ростовьстѣй постави градъ въ свое имя Володимерь на рѣцѣ на Клязмѣ, на усть Лебеды, и спомъ осыпа; и постави церковь сьборную пресвятыа Богородица Успение, древяну, и спомъ осыпавъ. И постави церкви, и вси люди крести Русскыа, и намѣсници по всей земли, и иде въ Киевь.

О РАЗРУШЕНИИ ИДОЛА ВЕЛЕСА ВЪ РОСТОВѢ. Ищи сего въ житии Аврамиа Богоявленьскаго, Ростовскаго чюдотворца.

О РАЗРУШЕНИИ ИДОЛА, ИЖЕ ВЪ НОВѢГОРОДѢ. Въ лѣто 6499 [990]. Посла Володимерь въ Царьгородь кь Фотѣю патриарху, и възя у него первого митрополита Киеву Леона, а Новогороду архиепископа Иакыма Корсунянина, а Ростову архиепископа Феодора, и по инымъ градомъ епископы, и попы и диаконы, иже крестиша всю землю Рускую; и бысть радость всюду. И прииде архиепископъ Иакымъ къ Новогороду, и требища разори, и Перуна посѣче, и повелѣ влещи его въ Влъховь. И привязавше ужи, влечаху его по калу, биюще жезлиемь и пихающе; и въ то время вшелъ бяше въ Перуна бѣсь, въпя въ немъ: «о горе мнѣ! достахся немилостивнымъ симъ рукамъ»; и вринуша его въ Влъховъ. Онъ же пловяше сквозѣ великий мость, верже нѣкто на нь палицу древяну; онъ же връже палицу на мостъ, глаголя: «симъ тѣшащеся людие Новогородстии, поминайте мене»; на немъ же и нынѣ безумнии убивающеся, утѣху творятъ бѣсомъ. И заповѣдаша никомуже нигдеже не приати его. И приближися Перунь кь брегу, и вышедъ Выдблянинь на рѣку рано, хотя грьнци вести вь градъ, и видѣ, оли Перунь припли кь берви, и отрину его шѣстомъ: «ты, рече, Перунище, до сыти еси яль и пиль въ Новѣгородѣ, а нынѣча поплови прочь»; и плы ис свѣта некошное.

О СЬЗДАНИИ ЦЕРКВИ СВЯТЫА БОГОРОДИЦА ДЕСЯТИННЫА ВЪ КИЕВѢ. Посемь же Володимерь живяше въ законѣ христианстѣмъ , помысли създати церковь святыа Богородица, и пославъ приведе мастеры отъ Грекь. И наченшу же здати, и яко сконча зижда, и украси ю честными иконами, и поручи ю Анастасу Корсунянину, и попы Корсунскыа пристави служити въ ней, вдавъ ту все, еже бѣ взялъ въ Корсуни, иконы, и кресты и съсуды.

О СЪЗДАНИИ РОСТОВСКЫЯ ЦЕРКВИ. Того же лѣта постави Феодоръ, прьвый епископь въ Ростовѣ, церковь дубову Успение Пречистыа, и толику чюдну, якова не бывала и потомъ не будеть, и людъ крести.