В лѣто 6428 [920]. Поставлен бысть Романъ царемъ в Грецѣхъ Констянтином царемь и Николою патриархом.

В лѣто 6428 [920]. Поставленъ бысть Романъ царемъ въ Грецѣхъ Костянтиномъ царемъ и Николаю патриярхомъ.

Въ лѣто 6428 [920]. Поставлень бысть Романъ старый неудръжимъ царемъ вь Грецѣхъ, Константиномъ царемъ и Николою патриархомъ.

Того же лѣта преставися прьвыи архыепископъ Иакымъ Корсунянинь въ Новѣгородѣ, бяше же ученикь его Ефремъ, иже ны учаше.

Иде великии князь Ярославъ въ Новъгородъ и посади сына своего Владимера в Новѣгородѣ, и епископа постави Жиряту, и людемъ написа грамоту, рекъ: «По сѣи грамотѣ дадите дань». И бяше хромоногъ, но умомъ свершенъ, и храборъ на рати, и крестьянъ, чтяше самъ книгы.

Того же лѣта иде великии князь Ярославь въ Новогородъ, и посади сына своего Владимера въ Новѣгородѣ, и епископа постави Жиряту; и людемъ написа грамоту, рекь: «По сеи грамотѣ дадите дань». Бяше же Ярославь хромоногь, но умомь соврьшень и храборъ на рати, и христиань, чтяше самъ книгы.

В лѣто 6559 [1051]. Постави Ярославъ Лариона митрополитомъ русина въ святѣи Софѣи, събравши епископы.

В лѣто 6559 [1051]. Постави Ярослав Илариона митрополитом русина святѣи Софии Киеву, събрав епископы.

В лѣто 6559 [1051]. Постави Ярославъ Лариона митрополита русина святѣи Софеи Киеву, собравъ епископы.

Въ лѣто 6559 [1051]. Князь великии Ярославь, сьбравъ епископы русскиа, постави митрополита святѣи Софии Киеву именемъ Илариона русина.

Сем же лѣтѣ архиепископъ Лука прия свои столъ в Новѣгородѣ и свою область. Дудицѣ же холопу оскомины: урѣзаша ему носа и обѣ руцѣ, и бѣжа в Нѣмци.

Того же лѣта архиепископь Лука приа стол в Новѣграде и свою власть. Дудицѣ же холопу оскомины бышя, урѣзаша ему носа и руцѣ обѣ отсѣкошя; он же сбѣжа в Нѣмци.

Того же лѣта архиепископъ Лука прия престолъ свои въ Новѣгородѣ и свою власть, Дудици же холопу устнь и носъ срѣзаша и обѣ руцѣ усѣкоша.

Того же лѣта архиепископъ Лука приа престолъ свои въ Новѣгородѣ и свою власть; Дудицѣ же холопу устны и носъ срѣзаша и обѣ руцѣ усѣкоша.

И поставлен бысть Новуграду архиепископъ Стефан.

Того же лѣта поставленъ бысть Новугороду архиепископъ Стефанъ.

Того же лѣта поставлень бысть Новугороду архиепископомь Стефань, а въ Новѣгородѣ лѣта того еще князь Ростиславь Владимеровичь.

В лѣто 6586 [1078]. Поставлен бысть архиепископь Новуграду Германъ.

Поставленъ бысть архиепископомъ Новугороду Германъ.

Того же лѣта поставлень бысть архиепископь Новогороду Германь.

Се писано въ 7 въ Киевьскомъ о Янкѣ. Иде Янка въ Грекы, дщи Всеволожа, и приведе митрополита Иоанна Скопца. И пребывъ до года, и умре.

В лѣто 6612 [1104]. Прииде Никифоръ, митрополит рускыи.

В лѣто 6612 [1104]. Прииде митрополит Никифоръ в Русь на стол декабря 6.

Въ лѣто 6612 [1104]. Прииде митрополитъ Никифорь въ Киевь, декабря 7.

В лѣто 6613 [1105]. Поставлени быша епископи: Лазарь, Мина, Анфилохии.

Того же лѣта поставлени быша три епископи: Лазарь Переяславлю, Амфилохие Володымерю Велиньскому, третии Мина, митрополитомь Никифоромь.

В лѣто 6618 [1110]. Прииде в Новъгород архиепископъ Иоанн, мѣсяца декабря въ 20.

В лѣто 6618 [1110]. Поставлен бысть архиепископъ Новуграду Иоан.

В лѣто 6618 [1110]. Поставленъ бысть архиепископъ Новугороду Иоанъ.

Въ лѣто 6618 [1110]. Прииде архиепископь Ивань въ Новогородъ, мѣсяца декабря въ 20, поставлень митрополитомъ Никифоромъ.

В то же лѣто поставиша Феоктиста епископа Чернигову.

Того же лѣта отвержеся архиепископъ Иоанн новгородчкыи, сѣдѣ лѣт 20, и поставиша архиепископа Нифонта, мужа свята и зѣло боящася бога; и прииде Новугороду мѣсяца генваря въ 1 день, на святого Василья, на обѣднюю. А Петрилу даша посадничьство в Новѣгородѣ.

Того же лѣта отвръжеся Иоан, архиепископь Новгородскыи, сидѣв лѣт 20; и поставиша архиепископа Нифонта, мужа свята и зѣло боящася Бога.

Того же лѣта архиепископъ Иоань, пиань, отврьжеся Новогородскиа епископіа , сѣдѣвь 20 лѣть. И поставиша архиепископа Нифонта, мужа свята и богобоязнива; и прииде къ Новогороду, мѣсяца генваря 1 день, на святаго великого Василиа, на обѣднюю. А Петрилу даша посадничьство.

Того же лѣта Антона постави игуменомъ архиепископъ Нифонтъ.

Того же лѣта пришедъ князь великіи Изяславъ, отай позванъ Кіаны съгнати Юргіа ис Кіева; Юрій же иде къ Новогородку съ своими дѣтми. То же слышавъ Володимерь Галицкій, поиде на Изяслава кь Кіеву, Изяславъ же поиде противу ему съ братомъ Володимеромь и съ сыномь Мьстиславомь, и срѣте его у Тумаша, и сташа о рѣцѣ Стугнѣ; видѣша же дружина его множество вой Володимерковыхь, и убояшася, и начаша говорити великому князю Изяславу, да поидетъ назадъ. Оному же не хотящу, потомъ побѣже, и прибѣгь кь Кіеву нощію, и выбрався и бѣжа къ Володимеру; а Володимерко ста у Кіева. А Юргій въ то же время пріиде кь Кіеву съ Давыдовичи и съ Олговичи, и сѣде въ немъ; и посыласта за Изяславомъ, и не постигоша его. И ту видѣся Юргій съ Володимеркомъ, и любовь велію сътвориша межи себе, и поиде Володимерко кь Галичу.

Тоя же зимы Изяславь Мьстиславичь съвъкупи Угры и Ляхы, и пришедъ съгна Юріа съ Кіева, повабленъ бо бѣ мужи Вячиславли. И преставися княгини Изаславля. И посла Изяславъ кь дядѣ своему Вячеславу въ Вышегородъ, и рече: а ты ми буди отецъ, азъ съгрѣшихъ передъ тобою, чти не положивъ на тебѣ; а се нынѣ тебѣ Кіевь.» И въніиде Вячеславь въ Кіевь. Княженіе Вячеславле Володимерича Манамахова съ Изяславомъ Мьстиславичемъ. Въшедшу же Вячеславу, цѣловастася, и любовь сътвориша, и сѣдоша оба за одинъ на Кіевѣ; да старѣйшинство дрьжати Вячеславу на всемъ, дръжаше бо его Изяславъ (въ) отца мѣсто. Тогда отпустиста Угры ко королю съ многою честію и дары; бѣ бо Изяславу зять Угорской король. Потомь же Изяславь посла къ королю Угорскому сына своего Мьстислава съ великою любовію, и посемь посласта къ Ростиславу, во Смоленескь, какь Юргіа съгнаша и съвъкупистася въ любовь, и повелѣста ему къ себѣ быти, блюдущеся Юргіа.

В то же лѣто выгнаша новгородци Святослава Изяславлича, а Романа Ростиславлича посадишя. Тогда же иде Ростислав из Новаграда в Киев на стол, оставив сына своего Мстислава в Новѣградѣ; и възнегодовашя новгородци, зане створи имъ наряда, но боле раздра, и показашя путь сынови его по немъ. Тогда же послаша владыку Нифонта съ прежними мужи къ Юрьеви по сынъ и введоша Мстислава сына Юрьева.

Того же лѣта Новогородци выгнаша изъ Новагорода Ярослава Изяславича, а Ростиславь Мьстиславича посадиша у себя. Новогородь Кіевской.

Того же лѣта преставися Святополкь Мьстиславичь въ Володимерѣ, и посади князь великій сына своего Ярослава въ него мѣсто.

В то же лѣто собрася всь град людии, изволѣша собѣ епископомь поставити мужа свята и богомъ изъбрана именемь Аркадиа; и шед весь народ, пояша из манастыря святыя Богородица, и князь Мьстиславъ Юрьевич, и весь крилосъ святыя Софѣя, и вси попове городстѣи, игумены и чернци, и введоша и, и поручивше ему епископью въ дворѣ святыя Софѣя, дондеже приидеть митрополит в Русь; и тогда поидеши ставится.

Тои же весны преставися князь Юрьи Володимерич в Киевѣ. И посадишя Изяслава Давидовича в Киевѣ на столѣ.

Того же лѣта поиде Аркадии къ Кыеву ставится епископомъ, и поставленъ бысть от митрополита Костянтина, и прииде в Новъгород, мѣсяца семтября въ 13 день, на канунъ святого Въздвижениа.

В лѣто 6666. Иде Ростислав к Смоленску, а сынъ свои Святослава посади в Новѣградѣ на столѣ, а Давыда в Новѣм Торгу.

Того же лѣта ходи Аркадии к Киеву ставитися архиепископомъ, и поставлен бысть от митрополита Констянтина, и приде в Новград.

Того же лѣта побѣди Мстислав Изяславлич Изяслава Давыдовича, и прогна ис Киева, и позва Ростислава, строя своего, на столъ в Киев.

В лѣто 6667 [1159]. Иде Ростиславъ в Киевъ и сѣде на столѣ въ Киевѣ.

В лѣто 6667. Иде Ростислав в Киев и сѣде на столе. Преставися Констянтин, митрополит рускыи, в Черниговѣ.