Того же лѣта сѣде Святополкъ Изяславичь в Киевѣ на столѣ отца своего. Сии же много пострада за землю Рускую и с погаными печенѣгы. Приидошаз половци на Рускую землю, Святополкъ же и Володимеръ Манамахъ бишася с ними об ону сторону Стугны. И бысть брань велика зѣло, и побѣжени быша от половцевъ грѣхъ ради нашихъ, ови от оружия и меча изъмроша, а другыи истопоша. Тогда же князь Ростиславъ Всеволодичь утопе, и мало Владимеръ не утопе, хотя помочи брату своему, и многое множество паде за Рускую землю. Святополкъ же прииде къ Киеву самъ третеи, а Володимеръ къ Чернигову, и бысть плачь велик, а не радость. Половци взяша градъ Торчевьскыи.

КНЯЖЕНИЕ СВЯТОПОЛКА ИЗЯСЛАВИЧА, ВНУКА ЯРОСЛАВИЧА, МИХАИЛА. Въ лѣто 6601 [1093]. мѣсяца априля 24, на память святаго мученика Савы стратилата, сѣде на великомъ княжении, въ Киевѣ, Святополкь Изяславичь, внукь великого князя Ярослава. И приидоша тогда половци мнози, и прислаша къ нему о миру посли, онъ же поимавъ ихь посади въ порубь, и начаша Половци воевати; князь же великии Святополкь Изяславичь и братиа его, Володимеръ Манамахъ и Ростиславь Всеволодичи, поидоша противу имъ къ Треполю, и перешедь Стугну, прошедъ Треполь, съступишася межи валовь, и одолѣша половци; а князь великыи Святополкь съ братиею побѣгоша. И тогда Ростиславь бѣжа утопе вь Стугнѣ; тогда же и Владимиръ Всеволодичь Манамахъ мало не утопе, помагаа брату своему. Сиа же сьключися злоба на Вознесение Господне, маиа 25, на третие обрѣтение главы Предтечевы. Посемь же приидоша половци кь Киеву, князь же великии Святополкь выиде противь ихь, и побѣжденъ бысть; и оттолѣ възвращьшеся половци взяша Торческь.