Того же лѣта бишася Олговичи с Володимеричи, бѣша съ Олговичи половци, и побѣгоша половци, и погнаша по них Володимеровичи, сѣкуще я. В то же время Олговичи переяша стягъ Ярополчь. Сии же иссѣкоша поганыя, възвратишася на полчище и впадоша в руцѣ Олговичемъ. Тогда же яша Олговичи бояръ много, и тысяцькаго Давыда Яруновича, и Станислава Добраго Дутьковича, а внукъ Владимерь и Василко Мариинъ убиенъ ту, а Володимеричи приидоша Киеву, Ярополкъ, Юрьи, Андрѣи, а Олговичи Чернигову. И послаша по половци, и почаша воевати по Сулѣ, и бысть пагуба велика посуляномъ. Ярополкъ совокупи вои мнози, ростовци, полочаны, смоляняне, угра, галичанъ, берендѣевъ бѣ 30000, кияне, переяславци, туровичи, и бысть множество вои, и поиде къ Чернигову. Черниговци же въспиша къ Всеволоду, глаголюще: «Мыслиши бѣжати в Половци, да к чему ся увернешь. Луче остани своего высокоумия и проси мира. Вѣмы, яко не хощеть Ярополкъ пролити крови крестьяньскыя: милосердъ есть и смиренъ Бога ради. Тои бо съблюдаеть Рускую землю». И Всеволодъ же то слышавъ, яко вниде вся, и посласта с покорениемъ и с поклономъ. И прия молбу его Ярополкъ, и створи миръ, и дары взя многы, и возвратися, и вои отпусти вся. А Олговичи взяша Треполь и Халѣпъ.