В лѣто 6664 [1156]. Съгнаша новгородци Судила с посадничьства, и по изгнании 5 день умре; и потомъ даша посадничьство Якуну Мирославичю.

Тои же веснѣ преставися архиепископъ Нифонтъ новгородчкыи, априля въ 21: шелъ бо бяше къ Кыеву противъ митрополита; инии же мнози глаголаху, яко, лупивъ святую Софѣю, пошелъ къ Цесарюграду; много глаголаху на нь, нь собѣ на грѣх. О семъ бы разумѣти комуждо нас: которыи епископъ тако украси святую Софѣю, притворы исписаа, кивот створи и всю извну украси; и въ Пьсковѣ святого Спаса церковь созда камену, другую в Ладозѣ святого Климента. Мню бо, яко не хотя богъ, по грѣхомъ нашимъ, дати нам на утѣшение гроба его, отведе и къ Кыеву, и тамо преставися; и пакы ту положиша и в Печерьстѣмъ манастырѣ.

В то же лѣто собрася всь град людии, изволѣша собѣ епископомь поставити мужа свята и богомъ изъбрана именемь Аркадиа; и шед весь народ, пояша из манастыря святыя Богородица, и князь Мьстиславъ Юрьевич, и весь крилосъ святыя Софѣя, и вси попове городстѣи, игумены и чернци, и введоша и, и поручивше ему епископью въ дворѣ святыя Софѣя, дондеже приидеть митрополит в Русь; и тогда поидеши ставится.

В то же лѣто поставиша заморьскыи купци церковь святую Пятницю на Торговищи.

Того же лѣта събрася всь град, изволиша себѣ епископом ставити мужа, Богомь избранна, Аркадия; и шед всь народ, пояша его из монастыря святыа Богородица, князь Мстислав Юрьевич и всь клиросъ святые Софиа, и вси попове градстии, и игумени, и черньци, и введоша и, и поручивше ему епископию в дворѣ святыа София, дондеже прииде митрополит в Русь.

В то же лѣто поставиша купци заморстии церковь святыа Пятниця на Торговищи.

В лѣто 6664. Преставися Нифонт, архиепископь Новгородскыи, априля 18, и положиша его в Печерском монастырѣ.

Того же лѣта приде митрополит Констянтин из Царяграда в Киев, и приа его князь съ честию и людие вси.