В лѣто 6449 [941].
В лѣто 6449 [941]. Иде Игорь на Греки, и яко послашя блъгаре вѣсть к царю, яко идут русь на Царьград, скѣдии 30000, глаголемы от рода варяжска сущим, иже поидошя и приплушя июня въ 10, и почашя воевати Вифинскыа страны. И пленоваху по Понту до Ираклиа и до Флафлогонскы земля; и всю страну Никомидиискую попленишя, много же и велие зло створишя русь, преже даждь греческым воемь не приспѣвшимъ. Тогда бо и суды вся пожгоша огнемь, а ихже имше пленникы, то всѣх растинаху, иных же к земли присѣкаху, другыа же, яко стража поставляюще, стрѣлами растлеляху, елико же ратному чину творяху, и изламаху опако руцѣ связавше, и гвозди желѣзныа посреди главы вбиваху имъ. Много же святых церквии огневи предашя, монастыри и села пожгошя, и имѣниа не мало обою страну взяшя. Потом же пришедшемь воемь от въстока, Панфиръ деместик съ 40000, Фока же патрекии с македоны, Феодоръ же стратилатъ с фракы, с ними же и сановници болярстии, и обыдошя русь около. И свѣщашя русь, и изыдошя, въоружившеся, на грекы. И брани межи ими бывши злѣ, едва одолѣшя греци, русь же възвратишяся к дружинѣ своеи к вечеру, на нощь же влѣзошя в лодиа и отбѣгошя. Роман же посла на дромоны, елико бяху в Констянтинѣ градѣ с Феофаном патрекиемь на русь. Феофан же лодииныя воя преже урядивъ и уготовив, потом же и слезами себе утвердив, руси ожидаа в лодиах на ня хотя ити, искрестна, глаголемаго форостражниця, в неиже огнь влагаем на просвѣщение в нощи. Се на устьи Понта стражю дѣя, зане ту частое разбоиничество, на страны нагнаниа, ихже изби Ираклии. Ту дожда полку рускых, лодья раздрушь и устроеномь огнемъ пожже; усрѣте бо я въ олядех съ огнемъ, и пущати начя трубами огнь на лодьи рускыя, и бысть видети страшно чюдо. Русь же, видяще пламень, вметахуся в воду морскую, хотя убрести, и мнози погыбошя, и тако прокъ лодии възвратишяся на бѣгъ въ свояси. Тѣм же пришедшемь в землю свою, повѣдаху кождо своим о бывшемь и о оляднемь огни: «Якоже млъния, – рече, – иже на небесех, греци имут у себе, и се пущающе жжаху нас, и сего ради не одолѣхом имъ». Игорь же, пришед, начя съвокупляти воя многы, посла по варягы за море, вабя их на грекы, пакы хотя поити на Грекы.