В лѣто 6505 [997].

В лѣто 6505 [997]. Володимиру же шедшу к Новуграду по връховнѣи вои на печенѣги, бѣ бо рать велика беспрестани, в се же время увѣдаша печенѣзи, яко князя нѣтъ, приидоша и сташя около Бѣлаграда, и не дадяху вылѣсти из града. И бѣ глад великь въ градѣ, и не бѣ лзѣ Володимиру помочи, не бѣ бо вои у него, печенѣгъ же множество. И удлъжися, остояв град, и бѣ глад великъ. И створишя вѣче в градѣ, рекошя: Се, уже хощем помрети от глада, а от князя помощи нѣт; да луче ли ны помрети, вдаимся печенѣгомъ, да кого живять, кого ли умрътвят; уже бо помираем от глада. И так съвѣтъ створишя. Бѣ бо единъ старець не был на вѣчи том, и въпрошая: Что ради вѣче было. Людие повѣдашя ему, яко утро людие хотят ся предати печенѣгомъ. Се же слышав, посла по старѣишины градскыа и рече имъ: Слышах, яко хощете ся предати печенѣгом, не стерпят людие глада. И рече имъ: Послушаите мене, не предаитеся за 3 дни, и яз что вы велю, то створите. Они же ради обѣщашася створити; и рече имь: Сберите аче и по горсти овса, или пшеници, или отрубъ. Они же, шедше, ради снискашя. И повелѣ женам створити цѣжь, в немже варят кисель, и повелѣ ископати кладязь и встави тамо в кладязь кадь и нальяти цѣжа кадь. И повелѣ другыи кладязь ископати и встави тамо другую кадь, и повелѣ искати меду; они же, шедше, взяша меду лукно, бѣ бо погребено в земли въ княжи медуши; и повелѣ розсытити сладко, и въльяти в кладязь. Утро же послашя по печенѣгы, и гражане рѣша печенѣгом: Поимѣте к собѣ таль наш, а вы поидѣте до 10 муж в град нашь, видите что ся дѣеть в градѣ нашемь. Печенѣзи же ради бывше, мняще, яко предатися хотят, пояшя у них тали, а сами избраша лучшии мужи в родѣх и послашя в град, да разглядают, что ся дѣет в градѣ. И приидошя въ град, рекоша имъ людие: Почто губите себе? Коли можете перестояти нас? Аще стоите за 10 лѣт, что можете сътворити нам, имѣем бо кръмлю от земля; аще ли не вѣруете, да се узрите своима очима. И приведоша я къ кладязю, идѣже цѣжь, и почерпоша вѣдром и льяху в ладкы, и яко свариша кисель, и поимше я, приидошя с ними к другому кладязю, и почерпоша сыты и начаша ясти сами пръвое, потом же и печенѣзи. И удивишася, и рекошя: Не имут вѣры сему наши князи, аще не ядят сами. Люди еже нальяшя корчагу цѣжа и сыты от кладязя и вдаша печенѣгомь; они же пришедше повѣдашя вся бывшаа. И сверивше, сѣдоша князи печенѣжьстии и подивишася, и поимше тали своя, и онѣх пустивше, всташя от града и въсвояси идошя.

В лѣто 6505 [997]. Владимеру же шедшу къ Новугороду по верховнѣи вои на печенѣгы, бѣ бо рать велика зѣло. В се время увѣдавше печенѣзи, яко князя нѣту, приидоша и сташа около Бѣлагорода, и не дадяаху вылѣсти изъ града. И бѣ гладъ великъ въ градѣ, и не бѣ лзѣ Владимеру помощи, и не бѣ бо вои у нево, печенѣгъ же множество, и удолжися, остая въ градѣ, и бѣ гладъ великъ. И створиша вѣче и въ градѣ, рекоша: «Се уже хощемъ помрети от глада, а от князя помощи нѣту. Да лутще ли ны помрети. Вдадимся печенѣгомъ, кто живъ будеть или мертвъ, уже бо помираемъ от глада». И тако совѣтъ створиша. Бѣ бо единъ старець не былъ на вѣче томъ и въспроси, что ради вѣче было. И людие повѣдаша ему, яко утро людие хотять передатися печенѣгомъ. Се же слышавъ, посла по старѣишия людьскыя: «Слышахъ, яко хощете ся передати печенѣгомъ, не стерпять людие глада». И рече: «Послушаите мене, не предаитеся за три дни, и я что велю вы, творите». Они же ради обѣщашася творити. «Сберете кто от васъ по горьсти овса или пшеници, или оттрубъ». Они же, шедше ради, снискаша, и повелѣ женам творити цѣжь, в немъ же варять кисель, и нальяти цѣжа кадь. И повелѣ искати меду, и постави другую кадь, они же, шедше, взяша меду лукно, бѣ бо погребено в земли, въ княжеи медуши. И повелѣ россытити велми и вълияти въ кладязь. Утро же послаша по печенѣзи, и гражане рѣша печенѣгомъ: «Поимите къ себѣ таль нашу, а вы поидите до 10 мужь въ град нашь, видѣте, что ся дѣеть въ градѣ нашемъ». Печенѣзи же ради бывше, мняще, яко предатися хотятъ, пояша у нихъ тали, а сами избраша лутшии мужи в родѣхъ и послаша въ градъ, да розъглядаютъ, что ся дѣетъ въ градѣ. И приидоша въ градъ, ркоша имъ людие: «Почто губите себе? Коли можете перестояти нас? Аще стоите за 10 лѣтъ, что можете створити намъ, имѣемъ бо кормлю от земли. Аще ли вѣры не имате, да се узрите своима очима». И приведоша ихъ къ кладязю, идеже цѣжь, и почерпоша вѣдромъ, и лияху в ладькы, и яко свариша кисель и, поимше ихъ, приведоша къ другому кладязю, и почерпоша сыты, и начаша ясти первое сами, потом же и печенѣзи, удивишася и ркоша: «Не имуть вѣры сему наши князи, аще не ядять сами». Людие же нальяша корчагу цѣжа и сыты от колодязя и вдаша печенѣгомъ. Они же, пришедше, исповѣдаша вся бывшая. И варивше, ядоша князи печенѣжескыи, и подивившеся, и поимьше тали своя, и онѣх пустивше, идоша от града въсвояси.

О ЕЖЕ КАКО ПРИХЫТРЫША БѢЛОГОРОДЦИ ПЕЧЕНѢЖЕСКУЮ РАТЬ. Въ лѣто 6505 [997]. Владимеру шедшу къ Новогороду по верховнѣи вои на Печенѣгы, бѣ бо рать велика зѣло, въ се же время увѣдавше Печенѣзи, яко князя нѣ ту, приидоша и сташа около Бѣлагорода. И не дадяаху вылѣсти изъ града, и бѣ гладъ великь въ градѣ, и не бѣ лзѣ Владимеру помощи, и не бѣ бо вой у него, Печенѣгъ же множество. И одолжися осада въ градѣ, и бѣ гладъ великь, и сътвориша вѣче въ градѣ, рекоша: «се уже хощемъ помрети отъ глада, а отъ князя помощи нѣту, да луче ли ны помрети? или вдадимся Печенѣгомъ, кто живь будетъ, или мертвь; уже бо помираемъ отъ глада»; и тако сьвѣть сътвориша, яко предатися Печенѣгомъ. Бѣ же единъ старець не былъ на вѣчи томъ, и въпроси: «что ради вѣче было ?» и людие повѣдаша ему, яко утро хотятъ людие предатися Печенѣгомъ. Се же слышавъ, посла по старѣйшины градскыа, рече имь: «слышахъ, яко хощете предатися Печенѣгомъ»; они же рѣша: «не трьпятъ людие глада.» И рече имь: «послушайте мене и не предайтеся за три дни, и азъ что велю вы, сътворите;» они же ради обѣщастася сътворити. И рече имъ: «сьберѣте кто отъ васъ по горсти овса, или пшеници, или отрубь»; они же шедше ради снискаша . Повелѣ же имъ сътворити цѣжъ, въ немъ же варятъ кисель, и повелѣ ископати кладязь, и въставити въ онь кадь и налиати цѣжа кадь, и повелѣ ископати другый кладязь, и въставити тамо другую кадь. И повелѣ искати (меду); они же шедше възяша меду лукно, бѣ бо погребено въ земли въ княжей медуши; и повелѣ розсытити велми и волиати въ кладязь. Утро же послаша по Печенѣзи; и гражане рѣша: «поимѣте себѣ таль нашу, а вы поидите до 10 мужъ въ градъ нашъ, (да) видѣти, что ся дѣетъ въ градѣ нашемъ.» Печенѣзи же ради бывше, мняще, яко предатися хотятъ, пояша у нихъ тали, а сами избраша лучшии мужи въ родѣхъ, и послаша въ градъ, да розглядаетъ что ся дѣетъ въ градѣ. И приидоша вь градъ, рекоша имъ людие: «почто губите себе? коли можете престоати насъ? аще стоите за 10 лѣтъ, что можете сътворити намъ? имѣемъ бо кормля отъ земля; аще ли вѣры не имете, да се узрите своима очима.» И приведоша ихъ кь кладязю, идеже цѣжъ, и почрьпоша вѣдромъ, и лиаху въ ладкы; и яко сварыша кысель, и поимше ихъ приведоша ихъ кь другому кладязю, и почрьпоша сыти, и начаша ясти прьвое сами, потомъ же и Печенѣзи. И удивишася, и рекоша: «не имутъ вѣры сему наши князи, аще не ядятъ сами.» Людие же налиаша корчагу цѣжа и сыти отъ колодязя, и вдаша Печенѣгомъ; они же пришедше исповѣдаша бывшаа. И варивше ядоша княжи Печенѣжьстии, и подивишася, и поимше талиа своа, и онѣхъ пустивше , идоша отъ града въсвояси.