Временникъ, еже есть нарицается лѣтописание князеи и земля Руския, и како избра Богъ страну нашу на послѣднѣе время, и грады почаша бывати по мѣстом, преже Новгородчкая волость и потом Кыевская, и о поставлении Киева, како во имя назвася Кыевъ. Якоже древле царь Римъ, назвася и во имя его город Римъ; и паки Антиохъ, и бысть Антиохиа великаа; и паки Селевки, и бысть Селевкиа; и паки Александри, и бысть въ имя его Александриа; и по многая мѣста тако прозвани быша грады в имена царев тѣхъ и князеи тѣхъ: тако жъ и в нашеи странѣ званъ бысть градъ великимъ княземъ во имя Кия, его же нарицаютъ тако перевозника бывша; инѣи же: ловы дѣяше около города. И тако бо есть промыслъ Божии, еже явѣ в послѣдня: куда же древле погании жряху бѣсомъ на горах, нынѣ же паки туды святыя церкви златъверхия каменозданныя стоят, и монастыреве велцы поставлени быша, и черноризец в нихъ исполнено бысть, безпрестани славяще бога в молитвахъ, въ бдѣнии, в постѣ и в слезахъ, ихъ же ради молитвъ миръ стоитъ. Аще бо къ святымъ сыи прибѣгнемъ, церквамъ, тѣм велику ползу прииметъ души и тѣлу. Мы же паки на послѣдование возвратимъся, глаголюще сице о началѣ Русьския земля и о князѣхъ, како откуду быша. Васъ молю, стадо Христово, с любовию приклоните уши ваши разумно: како быша древнии князи и мужие ихъ, и како отбараху Руския землѣ, и ины страны придаху под ся; тѣи бо князи не збираху многа имѣния, ни творимыхъ виръ, ни продаж въскладаху люди; но оже будяше правая вира, а ту возмя, дааше дружинѣ на оружье. А дружина его кормяхуся, воююще ины страны и бьющеся и ркуще: «Братие, потягнемъ по своемъ князѣ и по Рускои землѣ»; глаголюще: «мало есть намъ, княже, двусотъ гривенъ». Они бо не складаху на своя жены златыхъ обручеи, но хожаху жены ихъ в сребряныхъ; и росплодили были землю Руськую. За наше несытоство навелъ Богь на ны поганыя, а и скоты наши и села наша и имѣния за тѣми суть, а мы своих злыхъ дѣлъ не останемъ. Пишетъ бо ся: "Богатество неправдою сбираемо извѣется. И паки: сбираетъ, и не вѣсть, кому сбираетъ я. И паки: "Луче малое праведнику, паче богатьства грѣшныхъ многа". Да отселѣ, братия моя возлюбленая, останемся от несытьства своего, нь доволни будете урокы вашими, яко и Павелъ пишеть: "Емуже дань, то дань; емуже урокъ, то урокъ; никому же насилья творяще, милостинею оцвѣтуще, страннолюбиемъ, въ страсѣ божии и правовѣрии свое спасение сдѣвающи, да и здѣ добрѣ [поживем] и тамо вѣчнѣи жизни причастьници будемъ". Си же таковая. Мы же от начала Рускы земля до сего лѣта и все по ряду извѣстьно да скажемъ, от Михаила цесаря до Александра и Исакья.

Софеискыи Временникъ, еже нарицается лѣтописание рускых князеи и земля Рускыа, и како избра Богъ страну нашю в послѣднее время, и гради почашя бывати по мѣстом, преже Новгороцкаа волость и потом Киевская, и о статьи Киева, како въименовася Киевь. Яко древле царь Рим, прозвася въ имя его град Римь; и пакы Антиох, и бысть Антиохиа; и пакы Селевкъ, и бысть Селевкиа; и пакы Александръ, и бысть въ имя его Александриа. И по многа мѣста тако прозвани бышя гради ти въ имена царевь тѣх и князеи тѣхъ. Яко в нашеи странѣ прозванъ бысть град великыи Киев въ имя Кыа, егоже нарицают древле перевозника бывша; инии же, яко и ловы дѣаше около града своего. Великь бо есть промыслъ Божии, еже яви в послѣдняа времена! Куда же древле жряху погании на горах, туда же нынѣ святыа церкви златоверхыа каменозданыя и монастыреве исплънены, и чернорисци, беспрестани славяще Бога въ молитвах, въ бдѣнии, и в постѣ, и в слезах, ихже ради молитвъ мирь стоит. Аще бо къ святымь сыи прибѣгнет церквамь, тѣмь велику ползу прииметь души и тѣлу. Мы же на послѣднее възвратимься. О началѣ Рускыя земля, и о князех, како и откуду бышя. Васъ молю, стадо Христово, с любовию приклоните ушеса вашя разумно: како бышя древнии князи и мужи их, и како обараху Рускыа земли, и ины страны приимаху под ся. Тии бо князи не сбираху многа имѣниа, ни творимых виръ, ни продажь вскладаху на люди; но оже будяше правая вира, а ту въземше, даяше дружинѣ на оружьи. А дружина его кормляхуся, воююще иныа страны, бьющеся: Братье, потягнем по своемь князи и по Рускои земли. И ждаху: Мало ми есть, княже, 200 гривенъ. Не кладяху на свои жены златых обручеи, но хожаху жены ихъ в сребрѣ; и расплодили были землю Рускую. За наше несытство навелъ Богъ на ны поганыя, а и скоти наши, и села нашя, и имѣниа за тѣми суть; а мы злѣи своих не останем. Пишет бо ся: Богатство неправдою сбираемо извѣется. И пакы: Събирает, невѣсть кому сбираеть я. И пакы: Луче малое праведнику, паче богатства грѣшных многа. Да отсѣле, братье моа възлюбленаа, останемся от несытьства своего, но доволни будете урокы вашими. Яко и Павелъ пишет: Емуже дань, то дань, емуже урок, то урок. Никомуже насилиа творяще, милостынею оцветуще, страннолюбиемь въ страсѣ Божии и правовѣрии свое спасение сдѣвающи, да и зде добрѣ, и тамо вѣчнѣи жизни причастници будемь. Си же таковаа. Мы же от начала Рускыа земля до сего лѣта все по ряду извѣстно да скажемь, от Михаила царя до Александра и Исакиа.

И потомъ нѣкто прозвитерь, именемъ Арии, нача хулы дѣати на Сына Божиа и называти тварию. Царь же Костантинъ събра вселенскии съборь въ градѣ Никеи, святыхъ отецъ 318, въ нихъ же бѣ старѣиша собору Сильвестръ, папа Римскыи, Александръ, патриархь Царяграда, Витъ и Викентие и Макарии отъ Ерусалима, и Увеналии отъ Египта, и Николае отъ Миръ, и Спиридонъ Тримифиискии, и отврьгли Ариа еретика, и прокляша и единомыслении его, и утвердиша православную вѣру христианскую, и оттолѣ нача простиратися вѣра христианьская. И на томъ съборѣ изложиша исповѣдание православныа вѣры: Вѣрую въ единого Бога. Умре же Костантинь царь великии, звѣздѣ провозвѣстивши смерть его, отравлень навѣтомь братии своеа, дѣтеи Феодориныхь, сыи лѣтъ 65; остави же 3 сыны своа: Консту, и Констатиа и Константа; въ Римѣ остави Консту, а въ Новѣмь Римѣ Константиа, въ Антиохии же Костанта. По Костантинѣ же царствова сынь его Костантии; тѣмъ избыенымъ на ратехь своимь неустроениемь. По Костантии же царствова Иулиань Законопреступникъ, иже на христианы велико томление показа и многыа мученикы сътворы, въ нихъ же великоименныи Артемии, дука Александрыискыи, и иныи мнозии. При томъ бысть Василии Великии и Григории Богословъ. По Иулианѣ же царствова Иулии, таже Гратиань. По Гратианѣ же Иуалентъ, потомъ Великии Феодосии, православныи; по немъ Аркадии, сынь его. При семъ бысть великыи Златоустъ. По Аркадии же царствова сынь его Феодосии Юнныи, глаголемыи доброписецъ, иже крести его великии Златоустъ. Отъ 1-го же събора до втораго лѣтъ 60. Бысть же съи съборь въ Костантинѣградѣ, при велицѣмъ цари Феодосии, святыхь отецъ 150, на Македониа духоборца ; а патриархь Нектарии, и Богословъ Григории отъ Нанзианза и Григории Нисскии. А отъ втораго събора до третиаго лѣть 50. Съи святыи третии съборь бысть во Ефесѣ, при цари Феодосии Юннѣмь, святыхъ отецъ 200, а патриархь Кирилъ Александрьскыи, на Несториа злочтиваго, патриарха бывша Царяграда, человѣкослужебника. Отъ третиаго же събора до четвертаго лѣть 10. Съи святыи четвертыи съборь бысть при Маркианѣ цари, въ Халкидонѣ, а патриархь былъ Анатолии Константинаграда, на Диоскора, и Еитихиа и Севгира, а святыхъ отецъ 630. Отъ четвертаго же събора до пятаго лѣтъ 100. Съи бысть святыи пятыи съборъ при велицѣмъ цари Иустинианѣ, въ Цариградѣ второе, святыхь отецъ 165, а патриархь Константиняграда Евтихие, на суемысленаго Оригена. Отъ пятаго же сьбора до шестаго лѣть 130. Съи бысть святыи шестыи сьборъ при цари Костантинѣ Брадатѣмь, вь Цариградѣ третие, святыхъ отецъ 170, а патриархь былъ Константиняграда Георгие, на Сергиа, и Пυра и Макариа. Отъ шестаго же събора до седмаго лѣть 122. Съи святыи седмыи съборъ бысть при цари Константинѣ, сынѣ Леоновѣ, и матери его Иринѣ, второе въ Никеи, въ 11 октобра, святыхъ отецъ 367, а патриархь былъ Тарасии Царяграда; събравшеся на отмѣтающихся поклонениа святыхь иконь. Въ то время бысть притча сицева: азь есмь Анаскаридъ, жрець бога Аполона, вѣмъ, что не то Богъ истинныи, но то Богъ, иже родится отъ пречистыа дѣвици Мариама, да вѣрую въ онь; солнце видиши мя паки и узриши мя при цари Костантинѣ и Иринѣ. И събысться пророчьство его за полторы тысящи лѣтъ. Въ Костантинѣградѣ начаша здати храмъ Святаа Святыхъ, и во подошвѣ обрѣли гробь; въ гробѣ на прьстни золотѣ написано пророчьство его. При Костантинѣ цари и матери его Иринѣ благовѣрное чаание начатъ бывати, и судъ приати начало съ дрьзновениемъ, и слову Божию разширятися, и манастыремъ съ всею тишиною съзидатися. Въ долнихъ же стѣнахъ, рекше притвори Фракиискаа, человѣкъ нѣкии, копаа, обрѣте раку написану: Христосъ хощетъ родитися изъ Мариа Дѣвы, и вѣрую въ онь; при Костантинѣ же и Иринѣ, при правовѣрныхъ царъ, о солнце, паки мя узриши. А отъ седмаго събора до преложениа священнихъ книгъ отъ Грекь на Словенскии языкь святымъ Кириломъ философомъ лѣтъ 77. Купно же отъ Адама до Христа 5505 лѣтъ. А отъ Христа до Михаила благочестиваго царя лѣть 856. А отъ Михаила до крещениа Болгарскиа земля лѣтъ 17. А отъ крещениа Болгаръского до преложениа книгь на Словеньскии языкъ лѣть 22. А отъ преложениа книгь до крещениа Русскиа земли лѣтъ 78. Купно же отъ Адама до крещениа Руского лѣтъ 6496. А до Михаила отъ Адама лѣть 6360.