В лѣто 6666 [1158]. Иде Ростиславъ къ Смоленьску и съ княгинею своею, а сына своего Святослава посади в Новѣгородѣ на столѣ, а Давыда в Новѣмъ торгу.

В то же лѣто, по грѣхомъ нашимъ, моръ бысть в людех много, и конѣи множество помре, яко нѣлзѣ бяше проити до торгу сквозѣ город, ни по гребли, ни на поле, понеже бо великъ бяше смрад. Еще же и скот рогатыи помре.

Того же лѣта поиде Аркадии къ Кыеву ставится епископомъ, и поставленъ бысть от митрополита Костянтина, и прииде в Новъгород, мѣсяца семтября въ 13 день, на канунъ святого Въздвижениа.

Того же лѣта побѣди Мьстиславъ Изяславиць Давыдовица Изяслава, и прогна ис Кыева и позва Ростислава, строя своего, на столъ в Киевъ.

Тои же осени поставиша Деонисиа игуменомъ у святого Георгиа в манастырѣ.

В лѣто 6666. Иде Ростислав к Смоленску, а сынъ свои Святослава посади в Новѣградѣ на столѣ, а Давыда в Новѣм Торгу.

В то же лѣто по грѣхом нашимь моръ бысть мног в людех, и конь множество помре, яко не лзѣ бяше доити до торгу сквозѣ град, ни погребли, ни на поле выити смрадом; тако и скот рогатыи помре.

Того же лѣта ходи Аркадии к Киеву ставитися архиепископомъ, и поставлен бысть от митрополита Констянтина, и приде в Новград.

Того же лѣта побѣди Мстислав Изяславлич Изяслава Давыдовича, и прогна ис Киева, и позва Ростислава, строя своего, на столъ в Киев.