В лѣто 6501 [993]. Иде Володимиръ на Хорваты.

В лѣто 6501 [993]. Иде Владимеръ на ховраты. Пришедъшю же ему с воины ховратьскыя, и се печенѣзи приидоша по онои странѣ от Сулы. Владимеръ же поиде противу имъ и срѣте я на Трубежи, на бродѣ, гдѣ нынѣ Переяславль. И ста Владимеръ на сеи странѣ, а печенѣзи на онои странѣ, и не смѣяху сии на ону страну, ни они — на сию страну. И приѣха князь печенѣжьскыи къ рѣцѣ, и възва Владимера, рече ему: «Выпусти ты свои мужь, а язъ свои, да ся борета. Да аще твои мужь ударить моимъ, да не въюемъ за три лѣта, аще ли нашь мужь ударить твоимъ, да въюемъ за три лѣта». И разыдошася разно. Владимеръ же прииде в товары, посла береддичи по товаромъ, глаголя: «Нѣту ли такова мужа, иже бы ся ялъ с печенѣжаниномъ?». И не обрѣтеся нигдѣ же. И заутра приѣхаша печенѣзи и свои мужь приведоша, а в нашихъ не бысть. Поча тужити Владимеръ, посылая по всимъ воем. И прииде единъ старъ мужь къ князю, и рече ему: «Княже! Есть у мене единъ сынъ меншии дома, а съ 4-ми есмь вышелъ, а онъ дома. От дѣтьства бо его нѣсть, кто имъ ударивалъ. Единою бо ми сварящу, и оному мнущу кожу, разгнѣвася на мя, преторже кожу рукама». Князь же, се слышавъ, радъ бысть, посла по нь, и приведоша и къ князю, и князь поведа ему все. Он же рече: «Могу ли, и самъ не вѣдаю, да искусите мя. Нѣту ли вола велика и силна?». И повелѣ раздражити вола, и възложиша на нь желѣза горяча, и пустиша вола, и побѣже волъ мимо его, и похвати вола рукою за бокъ, и вырва кожу с мясомъ, елико ему рука зая. И рече ему Владимеръ: «Можеши ся с нимъ бороти». И наутрия приидоша печенѣзи и почаша звати: «Нѣсть ли мужа? Се нашь готовъ стоить». Владимеръ же повелѣ тои нощи облещися въ оружие. И приступиша къ рецѣ обои, и въпустиша печенѣзи мужь свои, бѣ бо великъ зѣло и страшенъ, и выпусти же Владимеръ мужь свои. И узрѣ и печенѣжанинъ и въсмѣяся, бѣ бо середнии тѣлом. И размѣрявши межи обѣма полкома, и пустиша я к себѣ. И ястася, и почастася крѣпко брати, и удави печенѣжанина в руку до смерти, и удари имъ о землю, и кликнуша, и печенѣзи побегоша, а русь погнаша по нихъ, сѣкуще я, погнаша по нихъ. Володимеръ же радъ бысть и заложи городъ на бродѣ томъ, и нарече и Переяславль, зане прея славу отрокъ тои. Володимеръ же великымъ мужемъ створи его и отца его и възратися в Киевъ с побѣдою и славою великою.

О ПЕРЕЯСЛАВЛИ РУССКОМЪ, ИЖЕ БЛИЗЪ КИЕВА. Въ лѣто 6501 [993]. Иде Володимерь на Хорваты, и побѣди а. Пришедшу же ему съ войны Хорватскыа, и се Печенѣзи приидоша по оной странѣ отъ Сулы; Владимиръ же поиде противу имъ, и стрѣте ихъ на Трубежи на броду, где нынѣ Переяславль. И ста Владимерь на сей странѣ, а Печенѣзи на оной странѣ, и не смѣаху сии на ону страну, ни они на сию страну. И прииха князь Печенѣжескый къ рѣцѣ, и възва Владимера, рече ему: «выпусти ты свой мужь, а язъ свой, да ся борета.» И ведоша мужа велика и силна, глаголюще: «аще противень сему добудете противна боритися; да аще твой ударить моимъ, да не воюемъ за три лѣта; аще ли нашь мужъ ударитъ твоимъ, то воевати имамы за три лѣта»; и разыдошася разно. Владимеръ же прииде въ товары, посла биричи по товаромъ, глаголя: «есть ли таковъ мужъ, иже бы ся яль брати съ Печенѣжиномъ?» и не обрѣтеся нѣгдеже. И заутра приихаша Печенѣзи, и свой мужь приведоша, а въ нашихь не бысть. Поча тужити Володимерь, посылаа по всѣмь воемь своимъ, и прииде единь старь мужь кь князю, и рече ему: «княже господине! есть у мене единь сынь менший дома, а съ четирмы есми вышель, а той дома; отъ дѣтства бо его нѣсть кто имъ ударивалъ: единою бо ми сварящу на нь, а оному мнущу кожу, разгнѣвася на мя, претръже кожу рукама.» Князь же се слышавь радъ бысть, посла по него, и приведоша его кь князю, и князь повѣда ему все; онъ же рече: «могу ли, и самъ не вѣдаю, искусите мя: аще есть зде волъ великь и силень, приведите его?» И налѣзоша волъ въ томъ часѣ, и повелѣ раздражити его; и възложиша на нь желѣза горяча, и пустиша вола, и побѣже волъ мимо его, и похвати вола рукою за бокь, и вырва кожу съ мясомъ, елико ему рука заятъ; и рече ему Влодимерь: «можеши съ нимъ боротися.» И наутриа приидоша Печенѣзи, и начаша звати: «нѣсть ли мужъ у васъ? се нашъ готовь стоитъ.» Владимеръ же повелѣ воемъ тои нощи облещися въ оружие; и приступиша къ рѣцѣ обои. И выпустыша Печенѣзи свой мужь, бѣ бо великь и страшень; и выпусты же и Володимеръ свой мужъ, и узрѣ его Печенѣжанинь и въсмѣяся, бѣ бо средний тѣломь. И размѣрявши межи обѣма полкома, пустыша а къ себѣ, и ястася, и почаста ся крѣпко брати, и удави Володимерь мужъ Печенѣжина въ руку до смерти, и удари имъ о землю; и кликнуша вои Русстии, Печенѣзи же побѣгоша, а Русь погнаша по нихъ, сѣкуще ихъ. Володимеръ же радъ бысть, и заложи градъ на бродѣ томь, и нарече его Переяславль, зане перея славу отрокъ той. Володимеръ же великымъ мужемъ сътвори его и отца его. Володимеръ же противу ихь вмалѣ изыиде, и не могуще стати противу ихь.