В лѣто 6659 [1151]. Побѣди Изяславъ с Вячеславомъ Юрья у Переяславля, иуля въ 17. На ту зиму преставися княгиня Изяславляя. В то же лѣто архиепископъ Нифонтъ поби святую Софѣю свиньцемъ всю прямь и извистию омаза всю около. Тогда же создаша 2 церкви: святого Василья и святого цесаря Костянтина и матери его Олены.

В лѣто 6659 [1151]. Победи князь Изяславъ и Вечеславъ князя Юрия у Переяславля июля 17. И на ту зиму преставися княгини Изяславля.

Въ лѣто 6659 [1151]. Князь великии Изяславъ Мьстиславичь нача съвъкупляти угры и ляхы, а князь великии Юрии съвъкупися съ братомъ Вячеславомъ, и помощь къ нему прииде Володимеркова изъ Галича, а и самъ Володимерко къ Шумьску приступи; то же слышавше угри и ляхы, и убоявшися отъидоша отъ Изяслава. Андрею же Юриевичу з братомъ Ростиславомъ бывшу у Моравици, и ту въ нощи бысть золъ пополохъ на нихъ, яко всѣмъ половцемъ бѣжати и прочиимъ воемъ; но единъ Андрѣй Юриевичь укрѣпися съ своимъ дворомъ, а и ти хотяху бѣжати кь прочиимь воемъ. Наутриа же отступиша къ Любну, и бысть имъ вѣсть, яко идетъ отецъ ихъ и з братомъ Вячеславомъ, они же опять отступиша къ Лучску, а въ немъ сущу Владимеру Мьстиславичу. И вышедши пѣшци, начаша стрѣлятися съ ними; Андреи же Юриевичь не повѣда братии своеи, поѣде скоро на нихъ, и ту удариша подъ нимъ конь двѣма копии, а третиемъ въ луку переднюю, а съ града, яко дождъ, метаху камение на нь; а и нѣмчинь хотѣ пронзити его рогатиною, но Богъ съблюде его, и бысть радость отцу его и братии. И стоаху у града 3 недѣли, и воду отъяша; и нача Володимерь молитися, прося мира, а Изяславъ посылаше къ Володимеру Галичинскому, дабы о немъ умолилъ Юриа, а вину всю на ся възлагая; а не дадяше мира Ростиславь Юриевичь и Юргии Ярославичь, внукь великого князя Святополка. Юргии же хотѣ дати столъ Киевь брату Вячеславу, и не даша ему воли бояре, ркуще: «Не съдръжати ему». И даша ему Вышегородъ.

Того же лѣта пришедъ князь великіи Изяславъ, отай позванъ Кіаны съгнати Юргіа ис Кіева; Юрій же иде къ Новогородку съ своими дѣтми. То же слышавъ Володимерь Галицкій, поиде на Изяслава кь Кіеву, Изяславъ же поиде противу ему съ братомъ Володимеромь и съ сыномь Мьстиславомь, и срѣте его у Тумаша, и сташа о рѣцѣ Стугнѣ; видѣша же дружина его множество вой Володимерковыхь, и убояшася, и начаша говорити великому князю Изяславу, да поидетъ назадъ. Оному же не хотящу, потомъ побѣже, и прибѣгь кь Кіеву нощію, и выбрався и бѣжа къ Володимеру; а Володимерко ста у Кіева. А Юргій въ то же время пріиде кь Кіеву съ Давыдовичи и съ Олговичи, и сѣде въ немъ; и посыласта за Изяславомъ, и не постигоша его. И ту видѣся Юргій съ Володимеркомъ, и любовь велію сътвориша межи себе, и поиде Володимерко кь Галичу.

Въ лѣто 6659 [1151]. Князь великій Юргій Володимеровичь пожаловалъ сына своего Андреа, дасть ему Туровь, и Пинескь, и Дорогобужъ и Пересопницу; и сидѣ въ Пересопницѣ.

Тоя же зимы Изяславь Мьстиславичь съвъкупи Угры и Ляхы, и пришедъ съгна Юріа съ Кіева, повабленъ бо бѣ мужи Вячиславли. И преставися княгини Изаславля. И посла Изяславъ кь дядѣ своему Вячеславу въ Вышегородъ, и рече: а ты ми буди отецъ, азъ съгрѣшихъ передъ тобою, чти не положивъ на тебѣ; а се нынѣ тебѣ Кіевь.» И въніиде Вячеславь въ Кіевь. Княженіе Вячеславле Володимерича Манамахова съ Изяславомъ Мьстиславичемъ. Въшедшу же Вячеславу, цѣловастася, и любовь сътвориша, и сѣдоша оба за одинъ на Кіевѣ; да старѣйшинство дрьжати Вячеславу на всемъ, дръжаше бо его Изяславъ (въ) отца мѣсто. Тогда отпустиста Угры ко королю съ многою честію и дары; бѣ бо Изяславу зять Угорской король. Потомь же Изяславь посла къ королю Угорскому сына своего Мьстислава съ великою любовію, и посемь посласта къ Ростиславу, во Смоленескь, какь Юргіа съгнаша и съвъкупистася въ любовь, и повелѣста ему къ себѣ быти, блюдущеся Юргіа.

Тоя же весны преставися Ростиславь Юріевичь, вь великій пятокь.

Того же лѣта владыка Нифонть въ Новѣгородѣ поби святую Софію свинцомъ. Тогда же създаша двѣ церкви, святаго Василіа и святаго Константина и Елену.

Того же лѣта къ Юрію Володимеричу приходиша Половци мнози; онъ же сь Ольговичи, и съ Володимеромъ Давыдовичемъ, и з дѣтми и съ сыновцемъ своимъ Володимеромъ Андрѣевичимъ поиде отъ Переяславля, и сташа противу Кіева, и не дадяше имъ перевестися на бродѣхь Изяславъ къ себѣ, стерега и въ лодіахъ бой наряжая. Потомъ же Святославь перебродоша у Заруба, некрѣпка бо бѣ тамо сторожа, и ту вси проидоша. А князь великій Вячеславь, и Изяславь, и Ростиславь съ сыномъ Романомъ, Изяславъ Давыдовичь и Володимеръ съ множествомъ вой стояху у града; а сіи пришедше сташа у Либеды, и начаша о ней битися. Юргію же бысть вѣсть, яко сватъ его Володимерко идетъ ему въ помочь, и отступи назадъ противу его. Въутрѣи же князь великій Вячьславь, и Изяславь (и) вси князи, съ всѣми силами, поидоша по Юргіи; въ третій же день постигоша у Трепетовыхъ, а Юрій не успѣ снятися съ Володимеркомъ. И бысть имъ ту бо(й) силень зѣло; побіено бысть многое множество обоихъ, мнози же Половци избыены быша Юріеви, и князя Володимера Давыдовича убиша ту, Изяславъ же Мьстиславичь велми раненъ бѣ и съ коня збитъ, но толико Богь отъ смерти избави его; а Юрій бѣжа кь Переяславлю и з дѣтми. Князь великій же Вячеславь, Изяславь з братіею поидоша назадъ кь Кіеву; а Изяславь Давыдовичь иде съ братнимъ тѣломъ Володимеровымъ кь Чернигову, и положи его въ Спасѣ, а самъ сидѣвь въ Черниговѣ. Изяславъ же Мьстиславичь слыша Юргіа вь Переяславлѣ, поиде на нь съ Вячеславомъ дядею и съ Святополкомъ братомъ своимъ, и приходяще подъ городъ біахуся, и мнози падаху отъ обоихъ. Потомъ же посласта кь Юрію, глаголюще: «иди кь Суждалю, а вь Переяславли посади сына своего; не можемъ съ тобою быти, (зане) приводиши на ны Половци.» Онъ же не имѣя помощи не откуду, и неволею цѣлова кресть,и иде и з дѣтми на Алто: приспѣ бо тогда праздникъ Бориса и Глѣба, а Глѣба остави въ Переяславли. Андрей же съ (А)лта иде кь Суждалю; отцу (у)имавшу его, онъ же рече: «на семъ цѣловали есмя.» А Юрій опять иде къ Переяславлю; князь великій же Изяславъ посла къ нему, глаголя: «цѣловалъ еси на томъ, итти ти кь Суждалю; а нынѣ ведешь на мя Половци и Володимерка;» Юрій же иде кь Городку. Въ то же время Мьстиславу Изяславичу идущу сь Угры кь отцу, а Володимерко слыша поиде по нихъ, онѣмъ невѣдущимъ, и сташа у Сапогыня; дядя же его Володимерь Мъстиславичь присла къ нимъ питіе много, и быша ту піани. Пода же и вѣсть имъ, яко идетъ за ними Володимерко; они же величахуся піани, и въ ту нощь противу свѣта удари на ныхъ Володимерко, и изби всѣхъ, а прочихъ поима, а Мьстиславь убѣжа въ Луческь съ дружиною своею. То же слышавъ Изяславь иде на Юргіа кь Городку, а съ нимъ Давыдовичь Изяславь, и Всеволодичи и Олговичи (въ) помочь; затворшу же ся ему; и потомъ не бысть ни откуду ему помощи, и иде кь Суждалю, а Глѣба остави вь Город(к)ѣ.