По мнозѣх же временех сѣли суть словѣне по Дунаеви, где есть нынѣ Угорская земля и Болгарска. И от тѣх словенъ разидошяся по земли и прозвашяся имены своими, где сѣдше на которомъ мѣстѣ; яко шедше сѣдошя на рѣцѣ именем Морава и прозвашяся морава, а друзии нарекошяся чеси. А се ти же словени: хорвати бѣлии, и сербь, и хорутане, волохом бо нашедшим на дунаискыа словены, и сѣдшимь им в них насиляющимь им. Словени же пришедше, сѣдошя овии на Вислѣ рѣцѣ, и прозвашяся ляхове; а от тех ляхов прозвашяся поляне; ляхове друзии лутици, инии мозавжане, инии поморяне. Такоже и ти словени, пришедше и сѣдошя по Днепру и нарекошася поляне, а друзии древляне, зане сѣдошя в лѣсех; а инии сѣдошя межи Припятью и Двиною и нарекошяся дреговици, а инии полочане, рѣчкы ради Полоты, яже течет в Двину. Словени же, пришедше с Дуная, сѣдошя около озера Илмеря, и прозвашася своимь именем, и сдѣлашя град, и нарекошя и Новгород, и посадишя старѣишину Гостомысла. А друзии сѣдошя по Деснѣ, и по Семи, и по Сулѣ и наркошяся сѣвери. И тако разидеся словенскыи языкь; тѣмь и грамота прозвася словенскаа.

По мнозѣхъ же временехь сѣли суть Словяне по Дунаеви, гдѣ есть нынѣ Угорскаа земля и Болгарская. И отъ тѣхь Словѣнь разыидошася по земли и прозвашася имены своими, гдѣ сѣдше на которомь мѣстѣ: яко прьвии пришедше сѣдоша на рѣцѣ именемь Морава и нарекошася Мораве, а друзии нарекошася Чеси, а все тиже Словяне Хорвати Бѣлии, и Серьбь, и Хорутане, а инии Дунаи. Волохомъ бо нашед.... на Дунаискыа Словяны, и сѣдшимъ имь во нихъ и на... ующимъ имъ,... вѣне же пришедше сѣдоша овии же на Выслѣ рѣ.. и прозвашася Ляхове, а отъ тѣхъ Ляховъ прозвашася По …., Ляхове же друзии Лутици, а инии Литва, инии Мозавшенѣ, инии Поморанѣ. Такоже и тыи Словяне... ше и сѣдоша по Днѣпру, и нарекошася Поланѣ,... зии Древляне, зане сѣдоша въ лѣсѣхь; а инии сѣ.... межи и Двиною и Припетою, и нарекошася.... чи; а инии Полочанѣ, рѣки ради Полоты, яже.... во Двину... не пришедше з Дуная сѣдоша около озера Илмер.., и прозвашася своимъ именемъ, и здѣлаша градъ, и нарекоша Новогородъ, и посадиша и старѣишину Гостомысла; а друзии сѣдоша по Деснѣ, и по Семѣ и по Сулѣ, и нарекошася Сѣвери. И тако разыидеся Словянъскыи языкъ; тѣмъ и грамота прозвася Словянская.

О Мефодии и Констянтинѣ. В лѣто 6406 [898]. Идошя угри мимо Киев горою, еже ся зоветь нынѣ Угорское. И пришедше къ Днепру, сташя вежами, бѣшя бо ходяще яко и половци. И пришедше от Встока, и устремишася чрез горы великыа, иже прозвашяся горы Угорскыа, и почашя воевати на живущаа ту. Сѣдяху бо ту переже словени, и волохове переяша землю Словенскую; по сем же угре прогнашя волохи и наслѣдишя землю ту, и сѣдошя съ словенми, покоривше я под ся, и оттолѣ прозвася земля Угорская. И начашя воевати угре на Греки, и полониша землю Фрачьску и Македонску даже и до Селуня; и начашя воевати на мораву и на чехы. Бе бо единь языкъ словенеск. Словени же сѣдяху по Дунаю, ихже прияшя угре, и морава, и чеси, и ляхове, и поляне, яже ныне зовомаа Русь. Сим бо первое положены книги моравѣ, яже и прозвася грамота словенская; тая же грамота есть в Руси и в Болгарех Дунаискых. Словеномъ бо живущим крещенымь и князем их, Ростислав и Святополкъ и Кочел, послашя къ царю Михаилу, глаголюще: Земля наша крещена, и нѣсть у нас учитель, иже бы нас учили и наказали и протлъковали святыа книгы: не разумѣем бо ни гречскому языку, ни латинску; оны бо ны инако научят, а друзии инако; тѣм же не разумѣемь книжнаго разума, ни силы их; да послите ны учителя, иже могут ны сказати книжнаа словеса и разумь их. Се слышавъ, царь Михаилъ съзва философы вся, и сказа имь рѣчи вся словенскых князь. И ркошя философи: Есть муж в Селунѣ, именемь Левь, и суть у него сынове разумиви языку словенску, и хитра два сына у него и философа. И се слышав, царь посла по ня в Селунь къ Лвови, глаголя: Пошли к намъ вскорѣ сына своя Мефодиа и Констянтина. Се слышав, Левъ вскорѣ посла я, и приидоста къ цареви, и рече има царь: Се прислалася ко мнѣ Словенскаа земля, просяще учитель себѣ, иже бы моглъ имъ истлъковати святыа книги; сего бо желают. И умолена быста царемъ; и послаше я в Словенскую землю к Ростиславу, и Святополку, и Кочьлови. Сима же пришедшима и начашя съставляти писмена азбуковнаа словенски, и преложиста Апостолъ и Евагелие. И ради бышя словени, яко слышашя величиа Божиа своимъ языкомъ. По сем же преложиста Псалтиръ, и Охтаик, и прочая книгы. Нѣции же начашя хулити словенскыа книгы, глаголюще, яко «Не достоить никоторому языку имѣти азбуков своих, развѣ и евреи, и грекъ, и латины по Пилатову писанию, еже на крестѣ Господни написа». Се же услышав папежь Римскы и похули тѣх, иже ропщут на книгы словенскыя, рекошя: Да ся исплънит книжное слово, яко да въсхвалят Бога въ языцѣѣ; другое же: Вси възглаголють языкы различными величиа Божия, якоже дасть имъ Святыи Духъ отвещавати; да аще кто хулит словенскую грамоту, да будуть отлучени от церкви, дондеже исправятся; ти бо суть влъци, а не овци, яже достоить от плод познати я и хранитися ихъ. Вы же, чада Божиа, послушаите учениа и не отринѣте наказаниа церковнаго, якоже вы наказалъ Мефодии, учитель вашь. Констянтинъ же възвратися вспять и иде учить болгарска языка, а Мефодии оста в Моравѣ.

В лѣто 6406 [898]. Идоша угри мимо Киевъ горою, еже ся зоветъ Угорьское, и пришедше къ Днѣпру, сташа вежами; бѣша бо ходяще, яко и половци. И пришедше от въстока, и устремишася чресъ горы великия, иже прозвашася горы Угорьския, и почаша воевати на живущая ту. Сѣдяху бо ту прежде словене и волохове, переяша землю Вълыньскую. По семь же угри прогнаху волохи и наслѣдиша землю ту, и сѣдоша с словѣнми, покоривше я под ся, и оттолѣ прозвася земля Угорьская. И начаше въевати угри на греки, и полониша землю Фраческую и Макидоньскую дажде и до Селюня. И начаша воевати на мареву и на чехи. Бѣ бо единъ языкъ словѣнескъ: словѣни же сѣдяаху по Дунаю, их же прияша угри и морава, и чеси, и ляхове, и поляне, яже нынѣ зовомая русь. Сим бо первое положены книги моравѣ, яже прозвася грамота словѣньская. Тая же грамота есть в Руси и в Болгарѣхъ Дунаиска. Словѣном бо живущимъ крещенымъ, и княземъ ихъ, Ростиславъ, Святополкъ и Кочелъ, послаша къ царю Михаилу, глаголюще: «Земля наша крещена, и нѣсть у насъ учителя, иже бы насъ училъ, и казали и протолковали святыя книгы. Не разумѣемь бо ни греческому языку, ни латиньску. Они бо ны инако учатъ, а друзи инако, тѣм же не разумѣемъ книжнаго разума, ни силы ихъ. Да послите ны учители, иже могуть намъ сказати книжная словеса и разуму ихъ». Слышавъ, царь Михаилъ созва философы вся и сказа имъ рѣчи вся словѣньскихъ князь. И ркоша философи: «Есть мужь в Селунии, именемъ Левъ, и суть у него сынове, разумиви языку словѣньску, и хитра два сына у него философа». И се слышавъ, царь посла по ня в Селунь, ко Лвови глаголя: «Пошли къ намъ въскорѣ сына своя Мефедия и Костянтина». Се слышавъ, Левъ въскорѣ посла я. Приидоста въскорѣ къ цареви, и рече има царь: «Се прислалася Словѣньская земля ко мнѣ, просяще учитель себѣ, иже бы моглъ истолковати святыя книги, сего бо желають». И умолена быста царемь, и послаша я въ Словѣньскую землю к Ростиславу и Святополку, и Кочелови. Сима же пришедшима, и начаша съставляти писмена азъбуковная словѣньски и приложиста Апостолъ и Еуангелие, и ради быша словѣни, яко слышаша величия божия своимь языкомъ. По семь же положиста Псалтырь и Октаикъ, и прочая книгы. Нѣции же начаша хулити словѣньския книги, глаголюще, яко не достоить никоторъму же языку имѣти азбуковъ своихъ развѣи евреи, грекъ и латины по Пилатову писанию, еже на крестѣ написа господни. Се же услышавъ, папежь Римьскии похули тѣхь, иже ропщуть на книгы словѣньския, рка: «Да ся исполнит книжное слово, яко да въсхвалять вся языци бога истиннаго»; другое же: «Вси възъглаголють языки различными величия божия, яко же дасть имъ Святыи Духъ отвѣщевати. Да аще кто хулить словѣньскую грамоту, да будетъ отлученъ от церкви, дондеже исправятся. Ти бо суть волци, а не овци, яже достоить от плод познати я и хранитися ихъ. Вы же, чада божия, послушаите учения и не отрините наказания церковнаго, яко же вы наказалъ Мефедеи, учитель вашь». Костянтинъ же възратився въспять и иде учити болгарьска языка, а Мефедии оста в Моравѣ.

О УГРѢХЬ. Въ лѣто 6406 [898]. Идоша Угри мимо Киевъ горою, иже ся нынѣ зоветъ Угорское, и пришедше къ Нѣпру сташа вежами; бѣша бо ходяще якоже и Половци. И пришедше отъ востока, устремишася черезъ горы великыа, иже прозвашася горы Угорьскыа, и почаша воевати на живущаа ту Волохи и Словяны. Сѣдяху бо ту преже Словяне, и Волохове и приаша землю Волинскую; посемь же Угри прогнаша Волохы, и наслѣдиша землю ту и сѣдоша сь Словянми, покоривша а подъ ся: и оттолѣ прозвася земля Угорскаа. И начаша воевати Угри на Грекы, и плѣниша землю Фрачскую и Макидонскую даже и до Селуня; и начаша воевати и на Мораву и на Чехы. Бѣ бо единь языкъ Словянескь: Словяне, иже сидяху по Дунаю, ихже приаша Угри, и Морава, и Чеси, и Ляхове, и Поляне, иже нынѣ зовомаа Русь. Симъ бо прьвое положены книгы Моравѣ, яже прозвася грамота Словенскаа; таже грамота есть въ Руси и въ Болгарѣхъ Дунайскихъ.