Временникъ, еже есть нарицается лѣтописание князеи и земля Руския, и како избра Богъ страну нашу на послѣднѣе время, и грады почаша бывати по мѣстом, преже Новгородчкая волость и потом Кыевская, и о поставлении Киева, како во имя назвася Кыевъ. Якоже древле царь Римъ, назвася и во имя его город Римъ; и паки Антиохъ, и бысть Антиохиа великаа; и паки Селевки, и бысть Селевкиа; и паки Александри, и бысть въ имя его Александриа; и по многая мѣста тако прозвани быша грады в имена царев тѣхъ и князеи тѣхъ: тако жъ и в нашеи странѣ званъ бысть градъ великимъ княземъ во имя Кия, его же нарицаютъ тако перевозника бывша; инѣи же: ловы дѣяше около города. И тако бо есть промыслъ Божии, еже явѣ в послѣдня: куда же древле погании жряху бѣсомъ на горах, нынѣ же паки туды святыя церкви златъверхия каменозданныя стоят, и монастыреве велцы поставлени быша, и черноризец в нихъ исполнено бысть, безпрестани славяще бога в молитвахъ, въ бдѣнии, в постѣ и в слезахъ, ихъ же ради молитвъ миръ стоитъ. Аще бо къ святымъ сыи прибѣгнемъ, церквамъ, тѣм велику ползу прииметъ души и тѣлу. Мы же паки на послѣдование возвратимъся, глаголюще сице о началѣ Русьския земля и о князѣхъ, како откуду быша. Васъ молю, стадо Христово, с любовию приклоните уши ваши разумно: како быша древнии князи и мужие ихъ, и како отбараху Руския землѣ, и ины страны придаху под ся; тѣи бо князи не збираху многа имѣния, ни творимыхъ виръ, ни продаж въскладаху люди; но оже будяше правая вира, а ту возмя, дааше дружинѣ на оружье. А дружина его кормяхуся, воююще ины страны и бьющеся и ркуще: «Братие, потягнемъ по своемъ князѣ и по Рускои землѣ»; глаголюще: «мало есть намъ, княже, двусотъ гривенъ». Они бо не складаху на своя жены златыхъ обручеи, но хожаху жены ихъ в сребряныхъ; и росплодили были землю Руськую. За наше несытоство навелъ Богь на ны поганыя, а и скоты наши и села наша и имѣния за тѣми суть, а мы своих злыхъ дѣлъ не останемъ. Пишетъ бо ся: "Богатество неправдою сбираемо извѣется. И паки: сбираетъ, и не вѣсть, кому сбираетъ я. И паки: "Луче малое праведнику, паче богатьства грѣшныхъ многа". Да отселѣ, братия моя возлюбленая, останемся от несытьства своего, нь доволни будете урокы вашими, яко и Павелъ пишеть: "Емуже дань, то дань; емуже урокъ, то урокъ; никому же насилья творяще, милостинею оцвѣтуще, страннолюбиемъ, въ страсѣ божии и правовѣрии свое спасение сдѣвающи, да и здѣ добрѣ [поживем] и тамо вѣчнѣи жизни причастьници будемъ". Си же таковая. Мы же от начала Рускы земля до сего лѣта и все по ряду извѣстьно да скажемъ, от Михаила цесаря до Александра и Исакья.

Пoвѣсти временных лѣт, oткуду пoшла Рускаа земля и ктo в неи пoчя первое княжити и откуду Рускаа земля стала есть. И се начнем повѣсть сию. По потопѣ трие сынове Ноевы раздѣлишя землю, Симь, Хамь и Афетъ. И яся въсток Симови: Персида, Ватрь, даже и до Индикиа в долготу, и в ширину, и до Нирокириа, и якоже рещи от встока даже и до полуденья, и Сирия, и Мидия, и Ефратъ рѣку, Вавилон, Кородуна, асиряне, Месопотамиа, Аравия Старѣишаа, Елимлисъ, Инди, Равия Силная, Колии, Комагыни, Финикия вся. Хамови же яся полуденьнаа чясть: Египет, Ефиопиа, прилежащиа къ Индом, и другаа же Ефиопиа, из неяже исходит река ефиопскаа Чермна, текущи на всток, Фива, Ливия, прилежащия даже и до Кириния, Мармариа, Сирити, Лива, и другая Нумидия, Масириа, Мавритания, противу сущи Галадирѣ. Сущии же къ встокомъ имуть Киликию, Памфилию, Писидию, Месию, Ликаонию, Фригию, Камалию, Ликию, Карию, Лидию, Амасию другую Троаду, Солиду, Вифинию, Старую Фругию, и островы пакы имать: Сардании, Критъ, Кипръ, и рѣку Гионъ, зовомыи Нилъ. Афету же яшяся полунощныа страны и западныа: Мидия, Алваниа, Армениа Малая и Великая, Каподокиа, Феврагони, Галатия, Колехисъ, Въспирии и Меоти, Деверии, Сармаги, Тавриани, Скифия, Фрацы, Македония, Далматия, Малоси, Фесалия, Локрия, Пеления, яже и Пелопонисъ наречеся: Аркадия, Ипирониа, Илуриикъ, Словени, Лихития, Андриакия и Андриатинскаа пучина. Имать же островы: Вретанию, Сикелиу, Евиюсъ, Родона, Хиона, Лѣзовомаа, Кофирона, Закинфа, Кефалиния, Афакину, Керкуру, и чясть всяческыа страны, нарицаемую от них, рѣку Тигръ, текущу межу Миды и Вавилоном. До Понтьскаго моря на полунощныя страны, Дунаи, Днѣстръ, и Вкакасиискиа горы, рекше Угорскиа, и оттуду до Днепра, и прочая рѣкы, Десна, Припять, Двина, Волхов, Волга, яже идет на встокъ в чясть Симову. Въ Афетовѣ же чясти сѣдят: русь, чюдь и вси языци: меря, мурома, весь, мордва, заволоцкаа чюдь, пермь, печера, ямь, югра, литва, зимгола, корсь, сѣтлога, либь, ляхове же и прусь и чюдь присѣдять к морю Варяжскому. По сему морю сѣдят варязи сѣмо къ встоку до предѣла Симова; по тому же морю сѣдят к западу до земля Аглянски и до Воложскы. Афетово бо колѣно и то варязи, свеи, урмани, гъти, русь, агляне, галичяне, ляхове, волоси, римляне, нѣмци, корлязи, вонедици, фрязи, и прочии; ти же присѣдят от запада к полунощию и съсѣдять с племенемь Хамовым. Симь же, и Хамь, и Афет, раздѣливше землю и жребиа метавше не преступати никомуже в жребии братень, и живяху кождо въ своеи части. И бѣ языкь единь; и умножившемся человекомъ на земли и помыслишя стлъпъ създати до небеси въ дни же Нектана и Фалека, и събрашяся на мѣстѣ Сенарь поли създати стлъпъ до небесѣ и град около его Вавулонъ; и създашя стлъпъ тъ за 40 лѣт, и несъвръшен бысть. И призрѣ Господь видѣти град и стлъп, и рече Господь: Се род единь и языкь единь. И смѣси Богъ языкы, и раздѣли на 70 и на два языка, разсѣя и по всеи земли. И по размѣшении языкь Богъ вѣтром велиемь и раздруши стлъпъ; и есть останокь его и до ныня промежи Асира и Вавилона, и есть въ высоту сажении 5000 и 400 и 33, толико же и в ширину, в лѣта многа бысть храним останок тъи. По раздрушении же стлъпа и по раздѣлении языкъ приашя сынове Симови въсточныя страны, а Хамови же сынове полудньныа страны, Афетови же приашя запад и полунощныя страны. И от сих же 70 и двою языку бысть языкь словенескъ от племене Афетова, нарицаемии норицы, еже суть словене.

По мнозѣх же временех сѣли суть словѣне по Дунаеви, где есть нынѣ Угорская земля и Болгарска. И от тѣх словенъ разидошяся по земли и прозвашяся имены своими, где сѣдше на которомъ мѣстѣ; яко шедше сѣдошя на рѣцѣ именем Морава и прозвашяся морава, а друзии нарекошяся чеси. А се ти же словени: хорвати бѣлии, и сербь, и хорутане, волохом бо нашедшим на дунаискыа словены, и сѣдшимь им в них насиляющимь им. Словени же пришедше, сѣдошя овии на Вислѣ рѣцѣ, и прозвашяся ляхове; а от тех ляхов прозвашяся поляне; ляхове друзии лутици, инии мозавжане, инии поморяне. Такоже и ти словени, пришедше и сѣдошя по Днепру и нарекошася поляне, а друзии древляне, зане сѣдошя в лѣсех; а инии сѣдошя межи Припятью и Двиною и нарекошяся дреговици, а инии полочане, рѣчкы ради Полоты, яже течет в Двину. Словени же, пришедше с Дуная, сѣдошя около озера Илмеря, и прозвашася своимь именем, и сдѣлашя град, и нарекошя и Новгород, и посадишя старѣишину Гостомысла. А друзии сѣдошя по Деснѣ, и по Семи, и по Сулѣ и наркошяся сѣвери. И тако разидеся словенскыи языкь; тѣмь и грамота прозвася словенскаа.

Поляномь, жившим по горам, и бѣ путь из Варягъ в Греки, и из Грекъ по Днепру и вверхъ Днепра волок до Ловоти, по Ловоти внити въ Илмерь въ езеро великое, из негоже потечет Влъхов и втечет въ езеро великое в Нево, и того езера устье течет в море Варяжское; и по тому морю внити до Рима, и от Рима по тому же морю ити к Царюграду, а от Царяграда приити в Понтъ море, в неже течет Днепръ рѣка. Днепръ бо течет из Оковскаго лѣса и потечет на полдень; а Двина ис того же лѣса потечет и идет на полунощие, и внидет в море Варяжское; ис того же лѣса потечет Волга на встокъ и втечет седмиюдесят жерелы в море Хвалитское. Тѣм же может из Руси ити по Волзѣ в Болгары и в Хвалисы и на всток доити в жребии Симов; а по Двинѣ въ Варяги, а из Варяг до Рима, а от Рима до племени Хамова; а Днепръ втечет в Понтьское море жерелом. Се же море словет Руское, по немуже училъ святыи Андреи апостолъ, брат Петров. Якоже рѣшя: Андрею учащу в Синопии, и пришедшу ему в Корсунь, и увѣдѣ, яко близ есть устье Днѣпръское, и въсхотѣ поити в Рим, и прииде въ устье Днѣпрьское, и поиде по Днепру горѣ, и по приключаю же прииде и ста под горами на брезѣ. И заутра вставь и рече к сущиим ту ученикомь: Видите ли горы сиа? Яко на сих горах въсиает благодать Божиа, и будет град великь и церкви многы Богъ въздвигнет. И вшед на горы сиа, и благослови я, и постави крестъ, и помолися к Богу, и сниде с горы, идеже есть нынѣ Киевъ. И поиде по Днепру горѣ. И прииде в словени, идѣже нынѣ Новгород. И видѣ ту люди сущая, какъ есть обычаи имуть, и како ся мыют и хвощутся; и удивися имъ. И иде въ Варяги, и прииде в Рим, и исповѣда, елико научи и елико видѣ, и рече им: Дивно видѣх землю Словенску; идущу ми сѣмо, видѣх бани древяны, и пережгуть и рамяно, и идут в ню, и извлекутся, и будут нази, и облѣются квасом кисломъ, и възмут на ся прутье младое и бьются сами, и того ся добиют, едва излѣзут елѣ живи; и обольются водою студеною, и тако оживут; и то творят по вся дни не мучими никимже, но сами ся мучять, и то творять мовение собѣ, а не мучениеѣ. И то слышавше, дивляхуся римляне. Андрееви же бывшу в Римѣ прииде в Синопию.

Поляном же, живущим особѣ и владѣющим роды своими, яже и до сея братьи бѣаху поляне, и живяху кождо на своих мѣстѣх с родомь своим. И бѣша три браты, единому имя Кии, другому Щекъ, третиему Хоривъ, а сестра их Лыбедь. И живяше Кии на горѣ, где есть нынѣ увоз Боричев, и бѣ с родом своимь; а брат его Щокъ живяше на друзѣи горѣ, где ныне зовется Щековица; а Хоривъ на третиеи горѣ, от негоже прозвася Хоривица. И тако сътворишя себѣ градокъ въ имя брата своего старѣишаго, и якоже и бысть, и нарекоша имя ему град Киев. И бяше же около града лѣсъ и боръ великъ, и бяху ловяще звѣрь. И бѣшя мудри мужи и смыслени, и нарицахуся поляне, от нихже суть поляне в Киевѣ и до сего дне. Бяху же тогда погани, жруще озеромь и колодяземь, рощениемь, якоже и прочии погании. А инии же не свѣдуще глаголють, яко Кии есть перевозникъ былъ, у Киева бо бяше перевоз тогда былъ съ оноя страны Днепра; тѣмь глаголаху: на перевоз на Киевъ. Аще бы Кыи перевозникь был, то не бы ходилъ к Царюграду; но сеи Кыи княжаше в родѣ своемь, и приходившу бо ему к царю, якоже сказают, яко велику честь прия от царя. Идущу же ему опять, поиде к Дунаеви и възлюби мѣсто, и сруби городокь малъ, и хотяше сѣсти в нем с родом своимъ, не дашя ему ту близ живущии; еже и до нынѣ нарицают Дунаици городище Киевець. Киеви же пришедшу в свои град Киевь и ту животъ свои сконча; и брат его Щекъ и Хорив, и сестра их Лыбедь ту скончяся. И по сих род их начя владѣти в полянех княжениемь; а в древлянех свое, дреговичи свое, а словени свое в Новѣгородѣ, а другое на Полотѣ, еже полочане. И от нихже и кривицы, еже живут на връх Волги и на верхь Двины, и на верхъ Днепра, ихже град есть Смоленескъ; ту дѣ бо живут кривици. Таже сѣверъ от них. А на Бѣлеѣозерѣ весь, а на Ростовскомъ озерѣ меря, а на Клещинѣ озерѣ меря же. А по Оцѣ по рѣцѣ, где потечет в Волгу, сѣдит мурома, языкь свои; мещера свои, мордва свои язык. Се бо в Руси словенскыи языкь: поляне, древляне, новгородци, полочане, дреговици, сѣверъ, бужане, занѣ сѣдошя по Бугу, послѣди же велыняне. А се суть инии языци, иже дань дают Руси: чюдь, меря, весь, мурома, черемиси, мордва, пермь, печера, ямь, литва, зимгола, корсь, морава, либи. Си суть языкь свои имуще от колѣна Афетова, иже суть на странах полунощных. А словенску же языку, якоже рекох, живущу на Дунаи и приидошя от скифъ, рекше от козаръ, рекомии болгаре, и сѣдошя по Дунаеви, и бышя населници словеномь. По сем же приидошя угри бѣлии и наследишя землю Словенску. Си бо угри почашя быти при Ираклии цари, иже находишя на Хоздроя, царя Пърьскаго. В си же времена быша и обри, иже находишя на Ираклиа, царя Перськаго, и мало его не яшя. Сии же добрѣ воеваху на словены и премучиша дулѣбы, сущаа словены, и насилие творяху женамь дулѣбьскым. Аще будет поехати обрину, и не дадяше впрячи коня, ни вола, но веляше бо впрячи 3 ли, 4 ли, 5 женъ в телѣгу и повести обрина, и тако мучаху дулѣбы. Бѣшя бо обрин тѣлом велици, а умом горди, и Богъ потреби я, и помрошя вси, не остася ни одинъ обринъ; и есть притча в Руси и до сего дни: погыбошя акы обри, ихже несть племени, ни наслѣдка. По сих же поидошя печенѣзи. И пакы идоша угри чернии мимо Киев, послѣ же при Олзѣ. Поляномь живущимъ, якоже рекохом, сущемь от рода словенска, а древляне от словен же, и нарекошяся древляне, рядимици же и вятици от ляховъ. И бѣста бо два брата в Лясѣх: Радимь, а другыи Вятко; пришедше сѣдоста Радимь на Рсьшю, и прозвашяся радимичи. А Вятко сѣде с родом своимъ по Оцѣ, от негоже прозвашясь вятици и до сего дне. И живяху в мирѣ поляне, древляне, сѣверъ, бужане, радимичи, вятичи, хорвати. Дулѣби же живяху по Бугу, где нынѣ велыняне. А лутици и тиверци присѣдяху к Дунаеви, и бѣ множество их, сѣдяху по Днѣстру нолны до моря, и суть гради ихъ и до сего дне. Да то ся зовет от грекъ Великая Скифиа. Имяху бо обычаи свои и закон отець своих и преданиа, кождо их свои нравъ имяху. Поляне бо своих отець обычаи имуть кроток и тихъ, и стыдливь, к родителем и к племени велико стыдѣние, и брачныи обычаи творят. А деревляне живяху звѣриным образомъ, живуще скотскыи: и убиваху друг друга, и ядяху все нечисто, брака у них не бываше, умыкаху бо у воды девици жены собѣ. А радимичи, и вятици, и сѣверяне единь обычаи имуть: живяху в лѣсех, якоже и всякыи звѣрь, ядуще все нечисто, срамословие в них пред родители, и племяни не стыдятся, браци не бываху в них, но игрища межи селы; и схожахуся на игрища и на вся бѣсовъскаа плясаниа, и ту умыкаху себѣ жены, с неюже кто свѣчався, и имяхут же и по две и по три жены. Аще кто умряше у них, и творяху трызну над нимь, и по сем творяху кладу велику, и възложят на кладу мрътвця и съжгути, и по семь събравше кости и вложаху в судину малу, и поставляху на путех на стлъпѣх; еже творят вятици и до сего дне. Сии же творят обычаи и кривици и прочии погании, не вѣдуще закона Божия, но творяще сами собѣ законъ. Глаголеть бо Георгии в лѣтописании: ибо коемуждо языку, овѣмь исписанъ законъ есть, другым же обычая; зане безаконнымь отечествие мнится. И от нихже переди и сирии, живущии на конець земля, законъ имуть, отець своих обычаи: не любодѣати, ни красти, ни оклеветати, ни убити, ни злодѣати весма. Законъ же и у ктириань, глаголемии рахмане и островици; иже от прадѣдъ наказаниемь и благочьстием мясъ не ядуще, ни вина пиюще, ни блуда творяще, страха ради многа, ни злобы творяще ни коеяже. Ибо друзии близ тѣх суть инѣмь законом, скверно творяще все, гневливи паче естества; внутрьнѣишее странѣ, и бѣаху человекы ядуще и странствующих убиваху, паче же ядяху яко пси. Инъ же законъ халдеом и вавилоняном: матери поимати, с братними чяды блуд творити и убивати, и всякое бестудное дѣание творят. Он же закон тилиомь: жены у них орють, храмь съзижут и вся мужьскаа орудья творять, и прелюбы творити еи, еликоже хотят. И невъздержими от мужь своих выну; и суть жены тые храбры; ловят звѣрь крѣпко, и мужи своими владѣють жены ти. И въ Вертани же мнозѣ мужи съ единою женою спят, и жены съ единѣмь мужемь похотствуют: безаконныи законъ отець творят независтно, ни въздержанно. Амазоняне же мужа не имуть, но акы скоты бесловесныя, но одиною днем к вешнимь днемь оземьствени будут, и съчтаются съ окрестными ибо мужи, яко нѣкоторое имъ тръжество и велико празньство время то тѣмь мнять от них заченшемъ въ чрѣве, и пакы разбѣгнутся о себе вси, въ время же хотящемь родити, и аще ли родить мужескь полъ, то погубить еи, аще ли женескъ, то въздоит ю прилѣжно. Якоже се и при насъ нынѣ половци законь дръжят, отець своих: кровь проливати, хвалящеся о сих, ядуще мертвечину и всю нечистоту, хоми и сухолы, и поимают мачехы и ятрови, и ины обычаи творят отець своих. Мы же христиане елико земль, иже вѣруют в святую Троицу, въ едино крещение, въ едину вѣру и законъ имамь единь, елико въ Христа крестихомся, въ Христа облекохомся.

По сих же лѣтех и по смерти братьи сея, бышя обидимы древляны и иными околними; и наидоша я козари, сѣдящаа на горах сих в лѣсех. И рѣшя имъ козари: Даите намь дань. И сдумавше поляне и вдашя имъ от дыма меч; и несошя козари князю своему и к старѣишинамъ своим, рѣшя имь: Налѣзохом дань нову. Они же рѣшя имъ: Откуду? Си же рѣшя: В лѣсѣ на горах над рѣкою Днѣпрьскою. Они же рѣшя: Что суть дали? Сии же показашя мечь. И рѣшя старци козарстии: Недобро, княже, дань сиа; мы ся доискахомъ оружиемь одиною страною остриемь, рекше саблею, а сих оружие обоюдуостръ есть, рекше мечь; сии бо имуть на нас имати дань и на иных странах. И се же сбысться все; не от своея бо воля рекошя, но от Божиа повелѣния сбысться се. И бысть якоже древле при фараонѣ, царѣ Египетстѣмь, егда приведошя Моисеа пред фараона, и рѣша фараону старци египетьстии: О царю, сеи хощеть смирити область Египетску. Яко и бысть; и погибошя бо египтяне от Моисея. Такоже и сии козари владѣшя. А послѣ же самѣми почашя владѣти; якоже и бысть, владѣют бо козары Русь и до днешняго дне.

Софеискыи Временникъ, еже нарицается лѣтописание рускых князеи и земля Рускыа, и како избра Богъ страну нашю в послѣднее время, и гради почашя бывати по мѣстом, преже Новгороцкаа волость и потом Киевская, и о статьи Киева, како въименовася Киевь. Яко древле царь Рим, прозвася въ имя его град Римь; и пакы Антиох, и бысть Антиохиа; и пакы Селевкъ, и бысть Селевкиа; и пакы Александръ, и бысть въ имя его Александриа. И по многа мѣста тако прозвани бышя гради ти въ имена царевь тѣх и князеи тѣхъ. Яко в нашеи странѣ прозванъ бысть град великыи Киев въ имя Кыа, егоже нарицают древле перевозника бывша; инии же, яко и ловы дѣаше около града своего. Великь бо есть промыслъ Божии, еже яви в послѣдняа времена! Куда же древле жряху погании на горах, туда же нынѣ святыа церкви златоверхыа каменозданыя и монастыреве исплънены, и чернорисци, беспрестани славяще Бога въ молитвах, въ бдѣнии, и в постѣ, и в слезах, ихже ради молитвъ мирь стоит. Аще бо къ святымь сыи прибѣгнет церквамь, тѣмь велику ползу прииметь души и тѣлу. Мы же на послѣднее възвратимься. О началѣ Рускыя земля, и о князех, како и откуду бышя. Васъ молю, стадо Христово, с любовию приклоните ушеса вашя разумно: како бышя древнии князи и мужи их, и како обараху Рускыа земли, и ины страны приимаху под ся. Тии бо князи не сбираху многа имѣниа, ни творимых виръ, ни продажь вскладаху на люди; но оже будяше правая вира, а ту въземше, даяше дружинѣ на оружьи. А дружина его кормляхуся, воююще иныа страны, бьющеся: Братье, потягнем по своемь князи и по Рускои земли. И ждаху: Мало ми есть, княже, 200 гривенъ. Не кладяху на свои жены златых обручеи, но хожаху жены ихъ в сребрѣ; и расплодили были землю Рускую. За наше несытство навелъ Богъ на ны поганыя, а и скоти наши, и села нашя, и имѣниа за тѣми суть; а мы злѣи своих не останем. Пишет бо ся: Богатство неправдою сбираемо извѣется. И пакы: Събирает, невѣсть кому сбираеть я. И пакы: Луче малое праведнику, паче богатства грѣшных многа. Да отсѣле, братье моа възлюбленаа, останемся от несытьства своего, но доволни будете урокы вашими. Яко и Павелъ пишет: Емуже дань, то дань, емуже урок, то урок. Никомуже насилиа творяще, милостынею оцветуще, страннолюбиемь въ страсѣ Божии и правовѣрии свое спасение сдѣвающи, да и зде добрѣ, и тамо вѣчнѣи жизни причастници будемь. Си же таковаа. Мы же от начала Рускыа земля до сего лѣта все по ряду извѣстно да скажемь, от Михаила царя до Александра и Исакиа.

Лѣтописец Рускыя земли. Еулогисон отче. Повѣсти времянных лѣт: откуда пошла Руськая земля и кто в неи перво почя княжити и откуду Руская земля стала есть. Се начнѣмъ повѣсть сию. По потопѣ трие сынове Ноевѣ раздѣлиша себѣ землю: Симъ, Хамъ и Афетъ. И яся въстокъ Симови: Персида, Ватрь, даже и до Индикия въ долготу и в ширину и до Ниръкурия; и, яко же рещи, от въстока даже и до полуденья и Сирия и Мидия и Ефрат рѣку, Вавилонъ, Куродуна, Асиряне, Месопотамия, Аравия старѣишяя, Елимаис, Индия, Аравия силная, Колии, Комагини, Финикия вся. Хамови же яся полудньная чясть: Егупетъ, Ефиопия, прилежащия ко Индом, и другая же Ефиопия, из нея же исходить рѣка ефиопьская Чермна, текущи на въстокъ, Фива, Лувия, прилежащия даже и до Кириния, Мармария, Сирити, Люва и другая Нумидия, Масирия, Мавритания, противу сущи Гадирѣ. Сущии же къ встокомъ имуть Киликию, Памфилию, Писидию, Мосию, Локаонию, Фругию, Камаилию, Ликию, Карию, Лудию, Амасию другую, Троаду, Еолиду, Вифунию, старую Фругию и островы паки имать: Сардании, Критъ, Купръ и рѣку Гионъ, зовомыи Нилъ. Афету же яшаяся полунощныя страны и западныя: Мидия, Алвания, Малая и Великая, Каподокия, Феврагони, Галатия, Колехысъ, Въспирии и Меоти, Деверии, Сармати, Тавриани, Скуфия, Фраци, Макидония, Далматия, Малоси, Фасолия, Локрия, Пеления, яже и Пелопонисъ наречеся, Аркадия, Ипирония, Илуриикъ, Словѣне, Лухития, Андриакия и Андрѣаньская пучина. Имать же островы: Вретания, Сикилию, Евиюсъ, Родона, Хиона, Лѣзовомая, Кофирона, Закунфа, Кефалиния, Афакину, Керкуру и чясть Асииския страны, нарицаемую Онию, рѣку Тигръ, текущу межу Миды и Вавилоном до Поньтьскаго моря на полунощныя страны, Дунаи, Днѣстръ и Въкакасиискыя горы, рекше Угорскыя, и оттуду до Днѣпра и прочяя рѣкы: Десна, Припеть, Двина, Волъховъ, Волга, яже идеть на въстокъ в чясть Симову. Въ Афетовѣ чясти сѣдять Русь, Чюдь и вси языци: Меря, Мурома, Весь, Моръдва, Заволочьская Чюдь, Пермь, Печера, Емь, Угра, Литва, Зимгола, Корсь, Сѣтгола, Любь, Ляхове и Прусь и Чюдь, присидять к морю Варяжьскому. По сему морю сѣдять Варязи сѣмо ко въстоку до предѣла Симова. По тому же морю къ западу сѣдять до земля Агляньскыи и до Волжьскы. Афетово бо колѣно и то: Варязи, Свеи, Нурмани, Гти, Русь, Агляне, Галичяне, Ляхове, Волоси, Римляне, Нѣмци, Корлязи, Венедици, Фрязи и прочии. Ти же присѣдять от запада къ полунощию и съсѣдять съ племенемъ съ Хамовымъ. Симъ же и Хамъ и Афетъ, раздѣливше землю и жребия метавше не преступати ни кому же въ жребеи братень, и живяху кождо въ своеи чясти. И бѣ языкъ единъ. И умножившимся человѣкомъ на земли, и помыслиша столпъ создати до небеси во дни Нектана и Фалека. И събрашасяа на мѣстѣ Сенаръ поли създати столпъ до небеси и град около его Вавилонъ, и создаша столпъ за 40 лѣтъ, и не свершенъ бысть. И призрѣ господь видѣти градъ и столпъ, и рече господь: «Се род единъ и языкъ единъ». И размѣси богъ языкы и раздѣли на 70 и на два языка, рассѣя и по всеи земли.

Лѣтописец Рускыя земли. Еулогисон отче. Повѣсти времянных лѣт: откуда пошла Руськая земля и кто в неи перво почя княжити и откуду Руская земля стала есть. Се начнѣмъ повѣсть сию. По потопѣ трие сынове Ноевѣ раздѣлиша себѣ землю: Симъ, Хамъ и Афетъ. И яся въстокъ Симови: Персида, Ватрь, даже и до Индикия въ долготу и в ширину и до Ниръкурия; и, яко же рещи, от въстока даже и до полуденья и Сирия и Мидия и Ефрат рѣку, Вавилонъ, Куродуна, Асиряне, Месопотамия, Аравия старѣишяя, Елимаис, Индия, Аравия силная, Колии, Комагини, Финикия вся. Хамови же яся полудньная чясть: Егупетъ, Ефиопия, прилежащия ко Индом, и другая же Ефиопия, из нея же исходить рѣка ефиопьская Чермна, текущи на въстокъ, Фива, Лувия, прилежащия даже и до Кириния, Мармария, Сирити, Люва и другая Нумидия, Масирия, Мавритания, противу сущи Гадирѣ. Сущии же къ встокомъ имуть Киликию, Памфилию, Писидию, Мосию, Локаонию, Фругию, Камаилию, Ликию, Карию, Лудию, Амасию другую, Троаду, Еолиду, Вифунию, старую Фругию и островы паки имать: Сардании, Критъ, Купръ и рѣку Гионъ, зовомыи Нилъ. Афету же яшаяся полунощныя страны и западныя: Мидия, Алвания, Малая и Великая, Каподокия, Феврагони, Галатия, Колехысъ, Въспирии и Меоти, Деверии, Сармати, Тавриани, Скуфия, Фраци, Макидония, Далматия, Малоси, Фасолия, Локрия, Пеления, яже и Пелопонисъ наречеся, Аркадия, Ипирония, Илуриикъ, Словѣне, Лухития, Андриакия и Андрѣаньская пучина. Имать же островы: Вретания, Сикилию, Евиюсъ, Родона, Хиона, Лѣзовомая, Кофирона, Закунфа, Кефалиния, Афакину, Керкуру и чясть Асииския страны, нарицаемую Онию, рѣку Тигръ, текущу межу Миды и Вавилоном до Поньтьскаго моря на полунощныя страны, Дунаи, Днѣстръ и Въкакасиискыя горы, рекше Угорскыя, и оттуду до Днѣпра и прочяя рѣкы: Десна, Припеть, Двина, Волъховъ, Волга, яже идеть на въстокъ в чясть Симову. Въ Афетовѣ чясти сѣдять Русь, Чюдь и вси языци: Меря, Мурома, Весь, Моръдва, Заволочьская Чюдь, Пермь, Печера, Емь, Угра, Литва, Зимгола, Корсь, Сѣтгола, Любь, Ляхове и Прусь и Чюдь, присидять к морю Варяжьскому. По сему морю сѣдять Варязи сѣмо ко въстоку до предѣла Симова. По тому же морю къ западу сѣдять до земля Агляньскыи и до Волжьскы. Афетово бо колѣно и то: Варязи, Свеи, Нурмани, Гти, Русь, Агляне, Галичяне, Ляхове, Волоси, Римляне, Нѣмци, Корлязи, Венедици, Фрязи и прочии. Ти же присѣдять от запада къ полунощию и съсѣдять съ племенемъ съ Хамовымъ. Симъ же и Хамъ и Афетъ, раздѣливше землю и жребия метавше не преступати ни кому же въ жребеи братень, и живяху кождо въ своеи чясти. И бѣ языкъ единъ. И умножившимся человѣкомъ на земли, и помыслиша столпъ создати до небеси во дни Нектана и Фалека. И събрашасяа на мѣстѣ Сенаръ поли създати столпъ до небеси и град около его Вавилонъ, и создаша столпъ за 40 лѣтъ, и не свершенъ бысть. И призрѣ господь видѣти градъ и столпъ, и рече господь: «Се род единъ и языкъ единъ». И размѣси богъ языкы и раздѣли на 70 и на два языка, рассѣя и по всеи земли. И по размѣшении языкъ богъ вѣтромъ велиимъ разруши столпъ, и есть останокъ его и донынѣ промежу Ассира и Вавилона, и есть въ высоту саженеи 5000 и 400 и 30 и 3, толико же и вб ширину в лѣта многа бысть храмъв останокъ. По разрушении же столпа и по раздѣленииг языкъ прияша сынове Симови въсточныя страны, а Хамови же сынове полуденьныа страны, Афетови же прияшад Западъ и полунощны страны. От сихъ же 70 и двою языку бысть языкъ словѣнескъ, от племени Афетова, нарицаемии и норици, еже суть словѣне.

По мнозѣх же временехъ сѣли суть словене по Дунаевѣ, гдѣ есть нынѣ Угорьская земля и Болгарьская. И от тѣхъ словѣнъ разыдошася по земли и прозвася имены своими, гдѣ сѣдше на которомъе мѣстѣ: яко, пришедше, сѣдоша на рѣцѣ именемъ Морова, а друзии нарекошася чеси, а се ти же словѣне, хорвате бѣлии и сербь, и хорутане. Волохом бо нашедшимъ на дунаискиа словѣны, и сѣдшимъ имъ в нихъ и насиляющимъ имъ. Словѣне же, пришедше, сѣдоша овии на Вислѣ рѣцѣ и прозвавшася ляхове, а от тѣхъ ляховъ прозвашася поляне, ляхове друзии лутици, инии мазавьжане, ини поморяне. Такоже и ти словене пришедше и сѣдоша по Днѣпру, и нарекошася поляне, а друзии древляне, зане сѣдоша в лѣсѣхъж, а инии сѣдоша межи Собою, Припетью и Двиною и нарекошася дреговичи, а инии полочане, рѣчки ради Полоты, яже течеть въ Двину. Словѣне же, пришедъше с Дуная, сѣдоша около озера Ильмеря и прозвашася своимъ именемъ, и здѣлаша град, и нарекоша и Новъгородъ, и посадиша и стареишину Гостомысла. А друзии сѣдоша по Деснѣ и по Сѣме и по Сулѣ, и нарекошася сѣвере. И тако разидеся словѣньскы языкъ, тѣмъ грамота прозвася словѣньска.

Поляномъ же жившимъ по горамъ. И бѣ путь из Варягъ въ Грекы, из Грекъ по Днѣпру и въверхъ Днѣпра волокъ до Ловоти, по Волотиз внити въ Ильмере, въ езеро великое, из него же течетъ Волховъ и вътечеть въ езеро великое в Нево; и от тогои озера устие течеть в море Варежеское, по тому же морю внитти до Рима, от Рима по тому же морю ити къ Царюграду, а от Царяграда приити в Понто море, в не же течеть Днѣпръ рѣка. Днѣпръ бо течеть изо Оковьскаго лѣса и потечеть на полъдень, а Двина ис тогол же лѣса потечеть и идеть на полунощие, им внедеть в море Варежьское, ис того же лѣса потечеть Волга на въстокъ и вътечеть седмьюдесятъ жерелъ въ море Хвалишьское. Тѣм же из Руси можеть ити по Волзѣ въ Болгары и въ Хвалисы, и на въстокъ доитти въ жребии Симовъ, а по Двинѣ въ Варягы, а изъ Варягъ до Рима, а от Рима до племени Хамова. А Днѣпръ втечеть в Поньское море треми жерелы. Се же море словетъ Руское, по нему же училъ святыи Андрѣи апостолъ, братъ Петровъ. Яко рѣша, Андрѣю учащу ему в Синапии, пришедшу ему в Корьсунь и увидѣ, яко близь есть устье Днѣпрьское, и въсхотѣ ити в Римъ. И приде устье Днѣпрьское и поиде по Днѣпру горѣ. И по приключаю же прииде и ста подъ горами при брѣзѣ. И заутра ставъ и рече къ сущимъ ту ученикомъ: «Видите ли горы сиа? Яко на сихъ горахъ въсияеть благодать божиа, и будеть градъ великъ, и церкьви многи богъ въздвигнеть». И въшедъ на горы сия, и благослови я, и постави кресть, и помолися к богу, и сниде с горы, идѣже есьть нынѣ Киевъ. И поиде по Днѣпру горѣ и прииде въ Словѣне, идѣже нынѣ Новъгородъ, и видѣ ту люди сущая, какъ есть обычаи имуть и како ся мыють и хвущутся. И удивисян имъ, и иде въ Варягы, и приде в Римъ, и исповѣда, елико научи и елико видѣ. И рече имъ: «Дивно видѣхъ землю словѣньску, идущу ми сѣмо. Видѣхъ бани древяны, и пережгуть и румяно, и идуть в ню, изъволкутся и будуть нази, и облиются квасомъ кислымъ, и възмутьо на ся прутие младое, и бьются сами. И того ся добьють, едва излѣзуть еле живи, и облиются водою студеною, и тако оживуть. И то творять по вся дни, не мучими никимп же, но сами ся мучать. И то творя омовение себѣ, а не мучение». И то слышавше римляне. Андрѣеви же, бывшу в Римѣ, прииде въ Синопию.

Поляномъ живущимъ осебѣ и владѣющимъ роды своими, даждь и до сее братие бѣху поляне и живяху кождо на своих мѣстѣхъ с родомъ своимъ. И быша три братьа: единому имя Кии, другому Щекъ, третьему Хоривъ, а сестра ихъ Лыбедь. И живяше Кии на горѣ, гдѣ естьр нынѣ увозъ Боричевъ, и бѣ с родомъ своимъ. А братъ его Щекъ живяше на друзѣи страны горы, гдѣ нынѣ зовется Щековица, а Хоривъ на третьеи горѣ, от него же прозвася Хоривица. И тако сътвориша себѣ градокъ въ имя брата своего стариишаго, и яко же и бысть, и нарекоша имя ему градъ Киевъ. И бяше же около града лѣсъ и боръ великъ, и бяху ловящь звѣрь, и бяше мужи мудрии смыслени, и нарицаахуся поляне, от нихъ же суть поляне въ Киевѣ и до сего дни. Бяху же тогда погании, жруще озеромъ и кладеземъ, рощениемъ, яко же и прочии погании. Инии же, не свѣдуще, глаголють, яко Кии есть перевозникъ былъ. У Киева бо бяше тогда перевозъ былъ съ оноя страны Днѣпра. Тѣмъ глаголаху: «На перевозъ на Киевъ». Аще бы Кии перевозникъ былъ, то не бы ходилъ Царюграду, но се Кии княжааше в родѣ своемъ и приходившу ему къ царю, яко же сказають, велику честь прия от царя. Идущу же ему опять, поиде къ Дунаевѣ и възлюби мѣсто, и сруби городокъ малъ, и хотяаше сѣсти в немъ с родомъ своимъ, не даша ему ту близь живущии, еже и донынѣ нарицають дунаици городище Киевець. Киеви пришедшу въ свои градъ Киевъ и ту животъ свои сконча. И братиа его Щекъ, Хоривъ и сестра их Лыбедь скончася. И по сихъ родъ ихъ нача владѣти в полянѣхъ княжениемъ, а въ деревлянехъ свое, дреговичи свое, а словѣнес свое в Новѣгородѣ, а другое на Полотѣ, еже полочане. От нихъ же и кривичи, еже живуть на верхъ Волги и на верхъ Двины, и на верхъ Днѣпра, ихъ же градъ есть Смоленескъ. Тудѣ бо живуть кривичи, тако же сѣверъ от нихъ, а на Белѣозерѣ весь, а на Ростовьскомъ озерѣ меря, а на Клещинѣ озерѣ меря же, а по Оцѣ по рѣцѣ, гдѣ потече въ Волгу, сѣдить мурома, языкъ свои, мещера свои языкъ, мордва свои языкъ. Се бо в Руси словѣньскы языкъ: поляне, древляне, новогородци, полочане, дреговичи, сѣверъ, бужане, зане сѣдоша по Бугут, послѣд же велыняне. А се суть инии языци, иже дань дають Руси: чюдь, меря, весь, мурома, черемиси, мордва, пермь, печера, емь, литва, зимьголя, корсь, морова, либи. Сии суть языкъ свои имущя от колѣна Афетова, иже суть на странах полунощных. А словѣньску языку, яко же рекохъ, живущу на Дунаи и приидоша от скуфь, рекши от козаръ, рекомии болгаре и сѣдошя по Дунаеви, и быша населници словѣномъ. По семь же приидоша угри бѣлии и наслѣдиша землю словѣньску. Сии бо угри почаша быти при Ираклии цари, иже находиша на Хоздроя, царя перьскаго. Ву сии же времена быша и обри, иже находиша на Ираклия, царя перескагоф, и мало его не яша. Сии же добрѣ воевааху словѣны и премучишя дулѣбы, сущая словѣны, и насилье творяаху женамъ дулѣбьскымъ: аще будеть поѣхати обрину, и не дадяше въпрячи коня, ни вола, но веляашех бо въпрячи 3, ли 4, ли 5 женъ в телѣгу и повести обрина, и тако мучаше дулѣбы. Бѣ же бо обри тѣломъ велици, а умомъ горди, и богъ потреби а, и помроша вси, не остася ни единъ обринъ. Есть притча в Руси об. и до сего дни: «Погыбоша, акы обри». Их же несть ни племени, ни наслѣдокъ. По сих же поидоша печенѣзи, и пакы идоша угри чернииц мимо Киевъ, послѣ же при Олзѣ. Поляномъ живущимъ, яко же ркохомъ, сущимъ от рода словѣньска, а древляне от рода словѣн же и нарѣкошася древляне. Радимичи же и вятичи от ляховъ. И бѣста бо два брата в лясѣхъ: Радимъ, а другыи Вятко. Пришедшеч, сѣдосташ Радимъ на Рсьшу, и прозвашася радимичи, а Вятко сѣде с родомъ своимъ по Оцѣ, от него же прозвашася вятичи и до сего дни. И живяаху в мирѣ поляне, древляне, сѣверъ, бужане, радимичи, вятичи, ховрати, дулѣби же живяаху по Бугу, гдѣ нынѣ велыняне. А лутичи и тиверичи присѣдяаху къ Дунаевѣ, и бѣ множьство ихъ сѣдяаху по Днѣстру нолны до моря, и суть гради ихъ и до сего дни. Да то ся зоветъ от Грекъ Великая Скуфия. Имяху бо обычаи свои и законъ от отець своихъ и предания, коиждо ихъ свои нравъ имяху. Поляне бо своихъ отець обычаи имуть кротокъ и тихъ, и стыдливъ къ родителемъ, и къ племени велико стыдѣние, и брачныи обычаи творять. А древлене живяаху звѣринымъ образомъ, живуще скотьскы, убивааху другъ друга и ядяху все нечисто. Брака у нихъ не бывааше, умыкааху бо у воды девици жены себѣ. А радимичи и вятичи, и сѣверене одинъ обычаи имуть: живяаху в лѣсехъ яко же и всякии звѣрь, ядуще все нечисто, срамословие в нихъ предъ родители, и племени не стыдятся. Браци не бывааху в них, но игрища между селы, и схожаахуся на игрища и на вся бѣсовьская плясания, и ту умыкаху и себѣ жены, с нею же свѣчався, имахуть же и двѣ, и по три жены. Аще кто умряаше у нихъ, и творять трызну над нимъ, и по семь творяаху кладу велику, и възложать на кладу мертвеца, и сожьгуть и, и по семь собравше кости, и вложать в судину малу, и поставляаху на путехъ на столпѣхъ, еже творять вятичи и до сего дни. Сеи же имуть обычаи и кривичи, и прочии погани, не вѣдуще закона божия, но творящи самищ себѣ законъ. Глаголеть бо Георгии в лѣтописании: «Ибо коемуждо языку, овѣмъ исписанъ законъ есть, другымь же обычая, зане безаконнымъ отечествие мнитъ и от нихъ же пердииъ и сирии, живуще на конець земля, законъ имуть отецъ своихъ и обычаи не любыдѣяти, ни красти, ни оклеветати, ни убити, ни злодѣяти весма. Законъ же и у ктириянъ, глаголеми брахмане и островници, и от прадѣдъ наказание же имуть и благочестие, мясъ не ядуще, ни вина пиющи, ни блуда творяще страха ради многа, ни злобы творящи никояе же. Ибо друзии близь тѣхъ суть инѣмь закономъ скверно творяще все, гнѣвьливии паче естества, внутренѣишеи странѣ и бяху человекы ядуще, и сътраньствующихъ убивааху, паче же ядяху, яко пси. Ин же законъ халдѣемъ и вавилономъ: матери поимаху, съ братними чады блуд творити и убиваати, и всякое бестудное дѣяния творятьы. Ин же законъ тилиомъ: жены у них орють, храмы сзиждуть и вся мужеская дѣла творять, и прелюбы творити еи, елико же хотятъ, и невъздержимиь от мужь своихъ выну. И суть жены тѣи храбры, ловять звѣрь гораздъ, об. и мужи своими владѣють жены тѣи. И въ Вертании же мнозии мужи съ единою женою спять, и жены съ единымъ мужемъ похотьствують, безаконныи законъ отець творять независтно, ни въздержанно. Амазоня же мужа не имуть, но аки скоти безсловеснии, но одиною днемь к вешнимъ днемъ оземьствени будуть и съчтаются съ окрестнымии бо мужи, яко нѣкотороеэ имъ торжество и велико празднество время то. Тѣмъ мнять от нихъ заченшимъ въ чревѣ, и паки разбѣгнутся от себе вси. Въ время же хотящимъ родити, и аще родить мужескъ полъ, то погубити, аще ли женескъ, то въздоить ю прилѣжно». Яко же и при насъ се нынѣ половци законъ держатъ отець своихъ: кровь пролияти, хвалящеся о сихъ, ядуще мертвячину и всю нечистоту, хомяки и сусолы, и поимають мачехи и ятрови, и иныи обычаи творять отець своихю. Мы же хрестиянь, елико земль, иже вѣруютъ въ святую Троицю и въ едино кресщение, и въ едину вѣру, и законъ имамъ единъ, и елико въ Христа крестихомся, въ Христа обликохомся.

И по сихъ же лѣтехъ и по смерти братии сия быша обидимы древлены и иными околными. И наидоша я козари, сѣдящая на горахъ сихъ въ лѣсехъ, и рѣша имъ козари: «Даите намь дань». И здумавше поляне, и въдаше имъ от дыма мечь. И несоша козари къ князю своему и къ стариишинамъ своимъ, рѣша имъ: «Налѣзохомь дань нову». Они рѣша имъ: «Откуду?». Си же рѣша: «В лѣсѣ на горах надъ рѣкою Днѣпрескою». Они же рѣша: «Что суть дали?». Си же показаша мечь. И рѣша старци козарьстии: «Не добра, княже, дань си. Мы ся доискахомъя оружиемъ одиною страною остриемъ, рекше саблею, а сихъ оружие обоюдуостро есть, рекше мечь. Сии бо имуть дань имати на нас и на иныхъ странахъа. «Се же сбысться все: не от своея воля рекоша, но от божия повелѣния сбысться се. И бысть, яко же прежде при фараонѣ, цари егыпетьстѣмь, егда приведоша Моисѣя пред фараона, и рѣша фараону старци егыпетьстѣи: «О царю, се хощеть смирити область Егыпетьску». Яко и бысть, и погибоша бо егыпьтьне от Муисея. Тако же и сии козаре владѣша, а после же самими начаша владѣти, яко и бысть: владѣють бо козари русь и до днешнаго дне.

Временникъ, еже нарицается Лѣтописець рускыхъ князь, и како избра богъ страну нашу на послѣднее время, и гради почаша быти по мѣстомъ: прежде Новогородьская властьб и потомъ Киевьская, и о статии Киева, како въимяновася Киевъ. Яко древле царь Римъ, в прозвася во имя его градъ Римъ, и паки Антиохъ, и бысть Антиохия, и паки Селевкъ, и бысть Селевкия, и паки Александръ, и бысть во имя его Александрия, и по многа мѣста тако прозвании быша гради ти въ имена царевъ тѣхъ и князь тѣхъ. Яко в нашеи странѣ прозванъ бысть градъ великии Киевъ въ имя Кия, его же древле нарицають перевоздника суща, инии же, яко и ловы дѣяше около града своего. Великъ бо есть промыслъ божии, еже яви в послѣдняя времена: куда же древле погании жряху бѣсомь на горахъ, туда же нынѣ святыя церкви стоятъ златоверхия, каменозданныя и монастыреве, исполнени черноризець, беспрестани славяще бога въ молитвахъ въ бдѣниихъ, в постѣхъ, въ слезахъ. Их же ради молитвъ миръ стоитъ: аще бо къ святымь церквемь прибѣгнеть, тѣмь велику ползу прииметь, души и тѣлу. Мы же на послѣднеед возвратимся. О началѣ Руския земля и о князехъ, како откуду быша. Васъ молю, стадо Христово с любовию, приклоните ушеса ваша разумно: како быша древнии князи и мужи ихъ, и како обарааху Руския земля, и иныя страны приимааху подъ ся. Тии бо князи не сбирааху многа имѣния, ни творимыхъ виръ, ни продаж въскладааху на люди, но оже будяаше правая вира, а ту взимааше и дружинѣ на оружие дая. А дружина его кормяахуся, воюючи иныя страны, бьющеся: «Братие, потягнемъ по своемь князи и по Рускои земли!». Ждяхуж: «Мало мне, княже, 200 гривенъ!». Не кладяаху на свои жены золытыхъ обручеи, но хожааху жены ихъ въ сребрѣ. И росплодили были землю Рускую. За наше несытьство навелъ богъ на ны поганыя, и скоти наша, и села наша, и имѣния наша за тѣми суть, а мы злыхъ своихъ не останемъ. Пишетъ бо ся: «Богатство, неправдою събираемо, скоро извѣется». И паки: «Събираеть и не вѣсть, кому събираеть». И паки: «Луче малое праведнику, паче богатества грѣшныхъ многа». Да отселе се, братия възлюбленная моя, останемся от несытьства своего, но доволнии будете уроки вашими. Яко и Павелъ пишеть: «Ему же дань, то дань, ему же урокъ, то урокъ, никому же насилия творяще, милостинею оцветуще, страннолюбиемъ въ страсѣ божии и правовѣрии свое спасение съдѣвающе, да и здѣ добрѣ поживемъ, и тамо въ вѣчнѣи жизни причястници будемь». Се же таковая. Мы же от начала Руския земли до сего лѣта и вся по ряду извѣстно да скажемъ от Михаила царя до Александра и Исакия.

А отъ перваго лѣта Михаилова царства до Олга князя Рускаго, иже пръвое нача княжити въ Киевѣ, лѣтъ 22. А отъ Олъга до Игоря лѣтъ 31. А отъ Игоря до Святослава, сына его, лѣть 33. А отъ Святослава, сына его, до Ярополка, сына его, лѣтъ 28. А Ярополкь княжилъ 8 лѣтъ. А Володимерь княжиль 37 лѣть. А Ярославь княжиль сынь его 40 лѣть. Купно же отъ пръваго князя Олъга, иже сѣде прьвое въ Киевѣ, до крещениа Рускои земли 4 князи; а киняжениа ихъ 102 лѣть. А Рюрикь княжи въ Новѣгородѣ 17 лѣтъ до Олгова княжениа. А всего княжениа до крещениа 127 лѣтъ. А по крещении Володимерь княжи 27 лѣть, а до крещениа 8 лѣтъ. По немъ Святополкь княжи 3 лѣта. Ярославь княжи 40 лѣтъ. Изяславь княжи 23 лѣта. Всеволодъ Ярославичь княжи 15 лѣтъ. А Михаило, нареченныи Святополкь, княжи 20 лѣтъ. Володимеръ Всеволодичь Манамахъ княжи 12 лѣть. Вячеславъ княжи 4 мѣсяци. Всеволодъ Ольговичь княжи 8 лѣть. Изяславь Мьстиславичь княжи лѣто едино. Братъ его Ростиславъ княжи 6 мѣсяць. Юрии княжи Долгорукии 3 лѣта. Андрѣи Боголюбывыи княжи 17 лѣть. Ярополкь княжи Ростиславичь лѣто едино. Михалко княжи лѣто. Всеволодъ Юриевичь княжи 37 лѣть. Юрии Всеволодичь княжи 5 лѣть. Костантинь Всеволодичь Ростовскыи княжи 2 лѣта. Паки по смерти его Юрии княжи 17 лѣть. Всего оба княжили 25 лѣтъ. Ярославъ, братъ ихь, Новогородскии, по Батыевѣ рати, 2 лѣта. Святославь Всеволодичь, братъ ихь, княжи 2 лѣта. Андрѣи, братъ ихъ, княжи 3 лѣта. Александрь Ярославичь Невьскии княжи 8 лѣть. Василеи Ярославичь, братъ ихь меншии, княжи 5 лѣть. Димитрии Александровичь Невского княжи 5 лѣтъ. Вкупѣ съ братомь Андрѣемъ перемогалися 8 лѣть. Андрѣи по братѣ княжи 11 лѣть. Сии Александровичи княжили 28 лѣтъ. Михаило Ярославичь Тверскии княжи 12 лѣть. Юрии Даниловичь княжи 4 лѣта. Дмитрии княжи 3 лѣта. Александрь княжи Михаиловичь 2 лѣта. И паки сице отъ Андрѣевы смерти 11 лѣтъ. А отъ Кавадыевы смерти до Федурьчюковы смерты лѣтъ 10. И по Федорчюковѣ смерти Иванъ Даниловичь княжи 2 лѣта. Семень Ивановичь княжи 14 лѣть. Ивань Ивановичь княжи 7 лѣть. Дмитрии Суздалскии княжи Костантиновичь лѣтъ 3. Димитрии Ивановичь Донескои княжи 27 лѣтъ. И Василеи княжи сынь его 12 лѣтъ. Василеи Василиевичь княжи 37 лѣть. Ивань Василиевичь княжи 39 лѣтъ. Василии Ивановичь княжи 31 лѣто. Сице славятся Русьстии князи: Пръвыи князь на Рускои землѣ Рурикь, пришедъ изъ Нѣмецъ. И Рурикъ же роди Игоря. Игорь роди Святослава. Святославь роди Владимера Великаго, иже крестися самъ и всю землю Рускую крести. Владимирь роди Ярослава. Ярославь роди Всеволода. Всеволодъ роди Володимера Манамаха. Володимерь роди Юриа Долгорукого. Юрии роди Всеволода Великого Гнѣзда. Всеволодь роди Юрья да Ярослава. Ярославь роди Александра Храбраго. Александръ роди Данила, пръваго Московского. Даниль роди Ивана Калиту, иже исправи Рускую землю отъ татеи и отъ разбоиникь. Ивань Калита роди Семиона. Семеонь роди Ивана. Ивань роди Димитриа, иже былся за Дономъ съ Мамаемъ. Димитрии роди Василия. Василеи роди Василиа, иже ослѣплень былъ. Василии роди Ивана. Ивань роди Ивана. Тотъ Ивань роди Димитриа, внука Иванова, а княжиль Василеи Ивановичь, и роди Василиа, Ивана и Юриа. ИНО РОДОСЛОВИЕ ТѢХЪ ЖЕ КНЯЗЕИ. Сынь Руриковь Игорь. Игоревь сынь Святославь. Сынове Святославли: Ярополкь, Олегь, Владимеръ Великыи. Сынове Володимерови: Вышеславъ, Станиславъ, Ярославъ, Судиславь, Святославъ, Изяславъ, Мъстиславь, Всеволодъ, Святополкь, Борись, Глѣбъ. Сынове Ярославли: Володимеръ, Изяслигавъ, Святославъ, Вячеславь, Всеволодъ. Сынове Всеволожи: Володимеръ Манамахъ, Ростиславъ. Сынове Володимеровы Манамаховъ: Ярославь, Ярополкь, Вячеславь, Всеволодъ, Юрыи, Андреи. Сынове Юриевы Долгорукого: Ярославъ, Ростиславъ, Андрѣи Боголюбскыи, Михаило, Всеволодъ, Борисъ, Глѣбъ, Мстиславъ, Василко. Сынове Всеволожи Великого Гнѣзда: Костянтинь Ростовскии, Юрии, Ярославъ Юриевскии, Володимеръ, Гаврило, Василеи. Сынове Ярославли: Александрь Невскии, Ярославъ Тверъскии, Андрѣи, Константинъ, Афанасии, Данило, Михаило, Василеи. Сынове Александрови Невскаго: Димитрии Переяславьскыи, Андреи Городецъкыи, Василеи Костромскии, Данило Пъсковскои, иже и пръвыи Московьскыи. Сынове Даниловы: Юрии великыи, Ивань, Борисъ, Семенъ, Александрь, Афанасии. Сынове Ивановы Калитины: Семень, Данило, Андреи, Семень, иже родися въ Кавадыеву рать, и по двою лѣту Данило, и по десяти лѣтъ Иоань, и по 12 Андреи. Сынове Семеновы: Василеи, Констянтинь отъ Настасии, а отъ Марии: Данило, Михаило, Иоань, Семень. Сынове Ивановы: Дмитрии, Иоанъ. А Володимеръ Андрѣевичь внукь Калитинь. Сынове Дмитриевы: Василеи, Юрии, Ивань, Семень, Андрѣи, Петръ, Константинъ. Сьнове Василиевы: Юрии, Иванъ, Данило, Семень, Василеи. Сынове Василиевы Василиевича: Ивань, Юрии, Андреи, Борисъ, Аньдреи. Сынове Ивановы Василиевича: Иванъ, Василеи, Юрии, Дьмитрии, Семень, Андреи. Сынь Ивановь Дмитреи. Сынове Василиевы: Ивань, Юрии.

О КНЯЖЕНИИ КИЕВСКОМЪ И О КНЯЗЕХЪ ИХЪ. Прьвыи Игорь, его же убиша Древляне; по немъ сынь его Святославь; по Святославѣ сынъ его Ярополкь, потомъ Владимирь, убивь Ярополка. По крещении же: по Владимерѣ Святополкь, сынь Владимеровъ; по немъ Ярославь, согнавь его. По смерти же Ярославли Владимеровича осташася 3 сыны его: Изяславъ, Святославъ, Всеволодъ, и раздѣлиша землю; взя болшии Изяславь Киевь, и Новогородъ и иные грады Киевскаго предѣла, а Святославь Черниговь и всю страну восточную и до Мурома, а Всеволодь Переяславь, Ростовь, и Суждаль, и Бѣлоозеро, и Поволжие; и убиша Изяслава на бою Половци. Святославь умре и сѣде Всеволодъ въ Киевѣ. По смерти его сѣде Святополкь Изяславичь. По смерти того сѣде Володимерь Манамахъ, сынь Всеволожь, и по немъ сынь его Мъстиславъ, а по смерти Мъстиславли братъ его Ярополкь; а по смерти Мьстиславли Володимеровича Манамахова сѣде Всеволодъ, сынь Олговь, и потомъ Вячеславь со Изяславомъ. По смерти же Изяславли Юрии Володимеричь Манамаховь Долгорукии, и прогнаша его, и сѣде Ростиславъ Мьстиславичь. О КНЯЗЕХЪ НОВОГОРОДСКЫХЪ, КОИ КНЯЖИЛИ ПО ВЕЛИКОМЪ ВОЛОДИМЕРѢ. По крещении прьвыи князь въ Новѣгородѣ Вышеславь Володимировичь, по немъ Ярославь Володимеровичь же. Ярославъ же бився съ Святополкомъ, по смерти отца своего, и одолѣ ему, и сѣде въ Киевѣ; посади въ Новогородѣ Константнна Добрынича. И родися у Ярослава сынъ Илиа, и посади его въ Новогородѣ, и умре; и разгнѣвася Ярославь на Константина и заточи его вь Ростовъ, а сына своего Вълодимера посади въНовогородѣ, и написа грамоту Новогородцомъ, рекь: «по сеи грамотѣ ходите». По смерти Владимеровѣ Ярославича, братъ его Изяславъ Ярославичь изъ Киева посади сына своего Мьстислава, и побѣдиша его.

По потопѣ трие сынове Ноеви раздѣлиша себѣ землю: Симъ, Хамь и Афеть. И яся въстокь Симови: Персида, Ватрь даже и до Индикиа въ дльготу, и въ ширину и до Нирокуриа, и якоже рещи отъ въстока даже и до полудниа, и Сириа, и Мидиа, и Ефратъ рѣку, Вавилонь, Кородуна, Асиряне, Месопотамиа, Аравиа Старѣишаа, Елималисъ, Индиа, Аравиа Силнаа, Колии, Комагини, Финикиа вся. Хамови же яся полуденьнаа часть: Египеть, Ефиопиа прележащиа къ Индиомъ, и другаа же Ефиопиа изъ нея же исходитъ рѣка Ефиопьскаа Чермена, текущи на востокь, Фива, Ливиа прележащиа даже и до Киринеа, Мармариа, Сурити, Люваи другаа, Нумидия, Мисуриа, Мавританиа противу сущи Гадирѣ; сущии же кь востокомъ имутъ Киликию, Памфилию, Писидию, Мосию, Ликаонию, Фригию, Камалию, Ликию, Карию, Лидию, Амасию другую, Троаду, Сълиду, Вифинию, Старую Фригию; и островы пакы имать: Сардании, Кипрь, Крить, и рѣку Гиопъ, зовемую Нилъ. Афету же яшася полунощныа страны н западныа: Мидиа, Алваниа, Армениа Малая и Великая, Каппадокия, Певлагони, Галатиа, Колехысъ, Въсперии, и Меоти, Девереи, Сарматы, Таврианы, Скифиа, Фраци, Македониа, Далматиа, Малоси, Фесалиа, Локриа, Пелениа, яже и Пелононисъ наречеся, Аркадиа, Ипирониа, Илирикь, Словяне, Лухитиа, Андриакиа и Андрианитскаа пучина; имать же островы: Вретаниа, Сикилию, Евиюсь, Родона, Хиона, Лѣзьвона, Кофирона, Закунфа, Кефалиниа, Афакину, Керкулу, и часть Асиискыя страны, нарицаемую Ионию, рѣку Тигрь, текущу межю Миды и Вавилономъ; до Понтиискаго моря, на полунощныя страны рѣка Дунаи, Днѣстрь, и Въкакасиискыа горы, рекше Угорскыа, и оттуду до Днѣпра; и прочаа рѣкы: Десна, Припеть, Двина, Вльховъ, Волга, яже идеть на востокъ въ жребии Спиовъ. Въ Афетовѣ же части сѣдятъ: Русь, Чюдь и вси языци, Меря, Мурома, Весь, Мордва, Заволочьскаа Чюдо, Пермь, Печера, Емь, Угра, Литва, Зимгола, Корсь, Сѣтогола, Либь; Ляхове же, и Прусии, и Чюдь присѣдятъ къ морю Варяжскому; по сему морю сѣдятъ Варази сѣмо ко востоку до предѣла Симова, по тому же морю сѣдять ко западу до земля Агляньски и до Воложскы. Афетово бо колѣно и то: Варязи, Свѣи, Нурманы, Готи, Русь, Агляне, Галичане, Ляхове, Волоси, Римляне, Нѣмци, Корлязи, Венедици, Фрязи и прочии; ти же присидять отъ запада ко полунощию и съсѣдятъ съ племенемь Хамовымь. Симъ же, Хамъ и Афеть, раздѣливше землю и жребие метавше не преступати никому же вь жребии братень, и живяаху кождо въ своеи части. И бѣ языкь единъ, и умножившимся человѣкомъ на земли, и помыслиша столпь създати до небеси, въ дни Нектана и Фалека; и събрашася на мѣстѣ Сенарь на полѣ създати столпъ до небеси и градъ около его Вавилонь, и сьздаша столпъ за 40 лѣтъ, и не съвръшень бысть. И призрѣ Господь видѣти градъ и стльпь, и рече Господь: се родъ единь и языкъ единь. И размѣси Богъ языкы, и раздѣли на 70 и два языка, и разсѣа и въ всеи земли. И по размѣшении языкъ, Богъ вѣтромъ великимъ раздруши стлъпъ; и есть останокъ его и донынѣ промежи Асира и Вавилона, и есть въ высоту сажении 5000 и 400 и 33, толико же и въ шириню, въ лѣта многа бысть хранимъ останокь тои. По разрушении же стльпа и по раздѣлении языкь приаша сынове Симови въсточныа страны, а Хамовы же сынове полуденыиыа страны, Афетовы же сынове прияша западныа и полунощныа страны. Отъ сихъ же седмидесятъ и двою языку бысть языкь Словѣнескь отъ племене Афетова, нарицаемыи и Норицы, еже суть Словяне.

По мнозѣхъ же временехь сѣли суть Словяне по Дунаеви, гдѣ есть нынѣ Угорскаа земля и Болгарская. И отъ тѣхь Словѣнь разыидошася по земли и прозвашася имены своими, гдѣ сѣдше на которомь мѣстѣ: яко прьвии пришедше сѣдоша на рѣцѣ именемь Морава и нарекошася Мораве, а друзии нарекошася Чеси, а все тиже Словяне Хорвати Бѣлии, и Серьбь, и Хорутане, а инии Дунаи. Волохомъ бо нашед.... на Дунаискыа Словяны, и сѣдшимъ имь во нихъ и на... ующимъ имъ,... вѣне же пришедше сѣдоша овии же на Выслѣ рѣ.. и прозвашася Ляхове, а отъ тѣхъ Ляховъ прозвашася По …., Ляхове же друзии Лутици, а инии Литва, инии Мозавшенѣ, инии Поморанѣ. Такоже и тыи Словяне... ше и сѣдоша по Днѣпру, и нарекошася Поланѣ,... зии Древляне, зане сѣдоша въ лѣсѣхь; а инии сѣ.... межи и Двиною и Припетою, и нарекошася.... чи; а инии Полочанѣ, рѣки ради Полоты, яже.... во Двину... не пришедше з Дуная сѣдоша около озера Илмер.., и прозвашася своимъ именемъ, и здѣлаша градъ, и нарекоша Новогородъ, и посадиша и старѣишину Гостомысла; а друзии сѣдоша по Деснѣ, и по Семѣ и по Сулѣ, и нарекошася Сѣвери. И тако разыидеся Словянъскыи языкъ; тѣмъ и грамота прозвася Словянская.

Поляномъ же живущимъ осебѣ и владѣющимъ роды свои, даже и до сеа братии бѣху Поляне, и живяху кождо на своихъ мѣстѣхъ съ родомъ своимъ. О Киевѣ и о създании его. И быша три братиа: единому имя Кии, а другому Щекь, а третиему Хоривъ, а сестра ихъ бѣ Лыбедь. И живяше Кии на горѣ, гдѣ есть нынѣ увозъ Боричевъ,...... съ родомъ своимъ; а братъ его Щекь живяше на друзѣи...... горы, гдѣ нынѣ зовется Щековица; а Хоривъ на третеи...., отъ него же прозвася Хоривица; и тако сътвориша с... градъ, въ имя брата своего старѣишаго, якоже и бысть, и нарекоша имя ему градъ Киевь. И бяше же около града лѣсь и боръ великь, и бяху ловяще звѣрь; бяху же мужи мудри и смислени, и нарицахуся Полянѣ, отъ нихъ же суть Полянѣ въ Киевѣ и до сего дни. Бяху же тогда погани, … ше озеромъ, и кладяземъ и рощениемъ, якоже и прочии по..... Инии же не свѣдуще глаголють, яко Кии есть перевозникъ....; у Киева бо бяше тогда перевозъ былъ съ оноа страны Днѣпра, тѣмъ глаголаху: на перевозъ на градь Киевь. Аще бы Кии прьвозникь быль, то не бы ходилъ ко....; но сеи Кии княжаше въ родѣ своемъ, и приходившу... ко цару, якоже сказають, яко велику честь при... отъ царя. Идущу же ему опять, и поиде ко Дунаеви,.. възлюби мѣсто и срубы городокъ малъ, и хотяше.... въ немъ съ родомъ своимъ, и не даша ему ту близь жнвущ...; се же и донынѣ нарицаютъ Дунаици городище Киевецъ. Киеви же пришедшу въ свои градъ Киевь, и ту животъ свои сконча; и братиа его Щекь и Хоривъ сестра ихь Лыбедь скончася. И по сихъ родъ ихъ нача владѣти въ Полянѣхъ княжениемъ; а въ Деревлянехь свое, а Дреговичи свое, а Словяне свое въ Новѣгородѣ, а другое на Полотѣ, ежеПолочанѣ. Отъ нихъ же и Кривичи, еже живутъ на връхъ Волги, и на връхъ Двины и на врьхь Днѣпра, ихъже градъ есть Смоленескь, и прочии Полотские власти; тудѣ бо живутъ Кривичи, таже Сѣверь отъ нихъ. А на Бѣлѣозерѣ сѣдятъ Весь, а на Ростовскомъ озерѣ Меря, а на Клещимѣ озерѣ Меря же; и по Оцѣ по рѣцѣ, близь устиа, гдѣ потечеть въ Волгу, сѣдить Мурома, а инии языкъ свои имѣаху, Мещера свои, Мордва свои языкь. Се бо въ Руси Словенскыи языкъ: Поляне, Древляне, Новогородци, Полочане, Дреговичи, Сѣверь, Бужанѣ, зане сѣдоша по рѣцѣ по Бугу, послѣдь же Велиняне прозвашася; а Волинци оже Словѣня, иже призваша ю. Сими всѣми обладаху Русь, иже отъ Киева града, и дань емляху на нихъ: на Чюди, на Новогородцехъ, на Мери, на Веси, на Муромѣ, на Черемисѣ, на Перми, на Печерѣ, на Еми, на Литвѣ, на Зимголѣ, на Корси, на Моравѣ, на Неломи, на Либиси, иже суть на полунощныхъ странахъ живутъ, отъ колѣна Афетова, имуще свои языкь. О ЯЗЫЦѢХЪ НА РУСИ... инии языци, иже дань даютъ Руси: Чюдь, Меря, Весь, Мур..., Черемиса, Мордва, Пермь, Печера, Емь, Литва, Зимгола, Корсь, Морава, Либь; сии суть языкъ свои имуща, отъ колѣна Афетова, иже суть на странахъ полунощныхъ. А Словянску языку, якоже рекохъ, живущю на Дунаи, и приидоша отъ Скифь, рекше отъ Козаръ, рекомии Болгари, и сѣдоша по Дунаеви, и быша населници Словяномъ. Посемь же приидоша Угри Бѣлии и наслѣдиша землю Словенскую, согнаша Волохи; сии бо Угри почаша быти при Иракли цари, иже находи на Хозроа царя Перскаго. О ОБРѢХЪ. Въ сии же времена быша и Обри, иже находиша на Ираклиа, царя Греческаго, къ Царуграду, и мало его не яша; сии же Обрѣ воеваху на Словяны и премучиша Дулѣбы, сущаа Словяны, насилие творяху женамъ Дулѣбьскымъ: аще будетъ поихати Обрину, и не дадяше вьпрячи коня, ни вола, но веляше бо въпрячи три, или четыре, или пять жень въ телѣгу и повести Обрину; и тако мучаху Дулѣбы. Бяху бо Обри тѣломъ велици, а умомъ горди, и Богъ потреби а, и помроша вси, и не остася ни единь Обринъ; есть притча въ Руси и до сего дни: погыбоша акы Обри, ихъже нѣсть ни племене, ни наслѣдника. По сихъ же приидоша Печенѣзи; и паки идоша Угри Чернии мимо Киевь, послѣже при Олзѣ.

Поляномъ же, живущимъ особь по Днѣпру по горамъ, и бѣ путь изъ Варягъ въ Грекы; изъ Грекь въврьхъ по Днѣпру, и въврьхъ Днѣпра волокь до Ловоти, и по Ловоти вниити въ езеро великое Ильмерь, изъ него же течетъ рѣка Вльховъ и втечетъ въ озеро великое въ Нево, и того озера устие течетъ во море Варяжское, по тому морю въниити до Рима, а отъ Рима по тому же морю ити кь Царуграду, а отъ Царяграда приити вь Понть море, во не же течеть Днѣпрь рѣка. Днѣпрь бо рѣка течетъ изъ Волоковского лѣса, и потече на полудень; а Двина ис того же лѣса потечетъ, и идетъ на полунощие, и вънииде въ море Варяжское; изъ того же лѣса потечетъ Волга на востокъ, и вътечетъ седмиюдесято жерелы въ море Хвалисское. Тѣмъ же изъ Руси можетъ ити по Волзѣ въ Болгары и въ Хвалисы, и на въстокъ доити вь жребии Симовь; а по Двинѣ вь Варягы, изъ Варягъ до Рима, до племени Хамова. А Днѣпрь же течетъ въ Понтъское море треми жерелы. Се же море словетъ Русское, по нему же училъ святыи апостоль Андреи, братъ Петровъ. ПРОЯВЛЕНИИ КРЕЩЕН... Якоже рѣша,...... святому Андрею въ Синопии, и пришедшу ему.. сунь, и увидѣвь ис Корсуня яко близь есть устие.. прьское, и восхотѣ ити въ Римъ, и прииде вь устие.. прьское, и поиде по Днѣпру горѣ, по приключаю же Божию.... и ста подъ горами при брезѣ. И заутра воставъ и рекь сущимъ...: «видите ли горы сиа? яко на сихъ горахъ восиаетъ благодать Божиа, и будетъ градъ великъ, и церкви многы имать Богъ воздвигнути.» И въшедъ на горы тыа святыи Андреи, и благослови а, и постави крестъ, и помолися къ Богу, и сънииде съ горы, идеже... градъ Киевъ, и поиде по Днѣпру горѣ. И прииде во Новгородъ, и видѣ... сущаа люди, како есть обычаи имутъ, и како ся мыютъ и.... щутся, и удивися имъ. И иде въ Варягы, и прииде.., и исповѣда учение, елико научи и елико видѣ...: «дивно видѣхь землю Словеньскую, идущу ми.... видѣхь бани дривяни, и пережгутъ ихъ румяно.... въ ню, извлькутся и будутъ нази, и облиятся.... кислимъ, и възмутъ на ся прутие младое и биются...., и того ся добиють, едва излѣзутъ еле живи, и о..... водою студеною, и тако оживутъ; и то творятъ по вся дни не мучими никимъ же, но сами ся мучатъ, и то творятъ омовение себѣ, а не мучение.» И то слышавше Римляне дивляхуся; Андрееви же бывшу въ Римѣ прииде въ Синопию.

Поляномъ же живущимъ осебѣ, якоже рекохомъ, сущимъ отъ рода Словенска, и нарекошася Поляне, а Древляне отъ рода Словянъ же, и нарекошася Древляне; Радимичи же и Вятичи отъ Ляховь. О РАДИМИЧЕХЪ. И бѣста бо два брата въ Лясѣхъ, Радимъ, а другии Вятко; и пришедше сѣдоста Радимъ на Рсьшу, и прозвашася Радимичи; Вятко сѣде съ родомъ своимь по Оцѣ и отъ него прозвашася Вятичи. Хорвати; Дулѣби же живяху и до сего дне, еже есть Рѣзанцѣ. И живяху въ мирѣ Поляне. Древляне, Сѣверь, Бужане, Радимичи, Вятичи, Хорвати. Дулѣбы же живяху по Бугу, гдѣ нынѣ Велыняне. О ЛУТИЧЕХЪ. А Лутичи и Тиверичи присѣдааху кь Дунаеви; и бѣ множество ихъ сѣдяаху по Днѣстру полны до моря, и суть грады ихъ и до сего дне, да то ся зоветъ отъ Грекъ Великаа Скифиа. Имяху бо обычаи свои, и законъ отецъ своихъ и преданиа, кождо ихъ свои нравь имѣху. Поляне бо своихъ отець обычаи имуть крот.... и стидливъ, къ родителемъ и кь племени велико ст …., и брачныи обычаи творятъ. О ДРЕВЛЯНЕХЪ. А Древляне живяху звѣринымъ образомъ, живуще скотскы: убываху другь друга и ядяху все нечисто, брака у нихъ не бываше, умыкаху бо у воды дѣвици жены себѣ. О РАДИМЕЧЕХЪ. А Радимичи, и Вятичи, и Сѣверяне одинь обычаи имутъ: живяху въ лѣсѣхь, якоже и всякыи звѣръ, ядуще все нечисто, срамословие вь нихъ предъ родители, и племены не стыдятся; браци не бываху въ нихъ, но игрища межи селы, и схождаахуся на игрища и на вся бѣсовскаа плясаниа, и ту умыкаху себѣ жены, съ неюже кто свѣчався; имяху же и по двѣ и по три жены. И аще кто умряше у нихь, и творять тризну надъ нимъ, и посемь творяху колоду велику, и възложатъ на колоду мертвеца, и съжгутъ его, и посемь събравше кости и въложатъ въ суднину малу, и поставляху на путехь на столпѣхь; еже творятъ Вятичи и до сего дне. Сии же имутъ обычаи и Кривичи и прочии погании, не вѣдуще закона Божиа, но творяще сами себѣ законъ. ХРОНОГРАФЪ. Глаголеть бо Георгии въ лѣтописании: ибо коемуждо языку овѣмъ исписанъ законъ есть, другымъ же обычаа, зане безаконымъ безаконие отечьствие мнится. О МИСЮРИ. И отъ нихъ же первии Сирии, живущии на конецъ земля, законъ имутъ отецъ своихъ и обычаи: не любыдѣати, ни красти, ни оклеветати, ни убити, ни злодѣати весма. О ВРАХМАНЕХЪ. Законъ же и у Ктириань, глаголемии Врахмане и Островници, и отъ прадѣдь наказание же имутъ и благочестие, мясъ не ядуще, ни вина пиюще, ни блуда творяще, страха ради многа, ни злобы творяще никоеа же, Самоѣдъ. ибо друзии близь тѣхъ суть инѣмъ закономъ, скверно творяще все, гнѣвливи паче естества, въ нутренѣише же странѣ иже бяху и человѣки ядуще, и страньствующиихъ убивааху, паче же ядяху яко пси. О ХАЛДЕОХЪ. Инъ же законь Халдѣемъ и Вавилоиомъ: матери поимаху, съ братними чады блудь творити, и убивати, и всякое бестудное дѣание творять. О ПИЛИОХЪ. Инъ же законъ Пилиомъ: жены у нихъ орютъ, и храми зиждютъ, и вся мужескаа дѣла творятъ, и прелюбы творятъ еи елико же хотятъ, не въздрьжими отъ мужъ своихъ выну; и суть жены тѣи храбры, ловятъ звѣрь гораздо, и мужи своими владѣютъ жены тѣ. О ВРЕТАНИОХЪ. А во Вретании же мнози мужи сь единою женою спятъ, и жены сь единымъ мужемъ похотствують, безаконныи законъ отчь творятъ независтно, ни воздрьжанно. О МАЗАВЕЦКИХЪ ЖЕНАХЪ. Амазоня же мужа не имутъ, но аки скоты бесловесны, но единою лѣтомъ къ вешнемъ днемъ оземствены будутъ, и съчетаются съ окрестьными бо мужи, яко нѣкоторое имъ тръжество и велико праздньство время то тѣмъ мнятъ; отъ нихъ заченшимъ въ чревѣ, и паки разбѣгнутся отъсюду вси; въ время же хотящимъ родити, и аще родитъ мужескь полъ, то погубитъ е; аще ли женескь, то въздоитъ ю прилежно. Якоже и при насъ се нынѣ. О ПОЛОВЦѢХЪ. А Половци законь дрьжатъ отецъ своихъ: кровь пролиати, хвалящеся о сихъ, ядуще мертвечину и всю нечистоту, хомякы и сусолы, и поимаютъ мачехы и ятровы, и иныи обычаи творятъ отецъ своихъ. О ХРИСТИАНЕХЪ. Мы же христиане, елико земль, иже вѣруютъ въ святую Троицу, въ едино крещение, въ едину вѣру, и законъ имамы единъ, елици въ Христа крестихомся, въ Христа облекохомся. По сихъ же лѣтехъ, по смерти братиа сиа, Поляне быша обидими отъ Древлянъ и иными околними, и наидоша я Козари сѣдяща на горахъ въ лѣсѣхъ, и рѣша имъ Козари: «даите намъ дань.» Издумавше Поляне и въдаша имъ отъ дыма мечь, и несоша Козари къ князю своему и ко старѣишинамъ своимъ, рѣша имъ: «налѣзохомъ дань нову.» Они же рѣша имъ: «откуду?» Сии же рѣша: «въ лѣсѣхь на горахъ, надъ рѣкою Днѣпрьскою.» Они же рѣша: «да что суть дали?» Си же показаша имъ мечь. И рѣша старци Козарстии: «не добра, княже, дань си; мы ся доискахомъ оружиемъ одиною страною острыемъ, рекше саблею, а сие ихъ оружие обоюду остры есть, рекше мечь; сии бо имутъ дань имати на насъ и на инихъ странахъ.» Се же събысться все; не отъ своеа бо воля се рекоша, но отъ Божиа промысла събысться се. И бысть якоже прежде при Фараонѣ, цари Египетскомъ, егда приведоша Моисеа предь Фараона, и рѣша Фараону старци Египетстии: «о, цару! сьи хощетъ смирити область Египетскую». Яко и бысть; и погыбоша Египтяне отъ Моисеа. Такоже и сии Козаре владѣша Поляны, а послѣди сами почаша владѣны быти отъ нихъ; яко и бысть, владѣютъ бо Козарми Русь и до днешняго дне, по проречению старецъ ихь.

ВРЕМЕННИКЬ СОФѢИСКЫИ, ИЖЕ ГЛАГОЛЕТСЯ ЛѢТОПИСЕЦЬ РУСКЫХЪ КНЯЗЕИ, И КАКО ИЗБРА БОГЪ СТРАНУ НАШУ НА ПОСЛѢДНЕЕ ВРЕМЯ, И ГРАДИ ПОЧАША БЫТИ ПО МѢСТОМЪ, ПРЕЖДЕ НОВОГОРОДСКАА ВОЛОСТЬ, ПОТОМЪ КИЕВСКАА, И О СТАТИИ КИЕВА, И КАКО ИМЕНОВАСЯ КИЕВЪ. Якоже древле Ромъ постави полату и нарече градъ Ромъ, потомъ преименова его Римъ, убиениа ради брата своего Рима; и паки Антиохъ, и бысть градъ Антиохиа, и паки Селевкь, воеводы Александровы, и бысть градъ Селевскыа; и паки самъ Александръ, и бысть во имя его Александриа; и по многа мѣста тако прозвани быша гради ти въ имена цареи тѣхъ и князеи тѣхъ; яко въ нашеи земли прозванъ бысть градъ великыи Киевь въ имя Киа, егоже древле нарицаютъ перевозника суща, иныи же яко ловы дѣаше около града своего. Великь бо есть промысль Божии, еже явися въ послѣдняа времена! куда же древле погании жряху бѣсомъ, туда же нынѣ святыа церкви стоятъ златоверхиа каменнозданныа, и манастыреве исполнени чрьноризецъ, беспрестани славяще Бога въ молитвахъ, и въ бдѣниихъ, вь постѣхъ, въ слезахъ, ихже ради молитвь миръ стоитъ. Аще бо къ святымъ сы прибѣгнетъ церквамъ, тѣмъ велику ползу прииметъ души и тѣлу. Мы же на предьлежащее или на послѣднее възвратимся о началѣ Рускиа землѣ и о князехь, како и откуду быша. Васъ же молю, стадо Христово, съ любовию, приклоните ушеса ваша разумно: како быша древнии князи и мужи ихъ, и како обороняху Русскиа земля, и иныа страны приимаху подъ ся. Тии бо князи не събирааху много имѣниа, ни творимыхъ вирь, ни продажъ въскладааху на люди; но оже будяше праваа вира, а ту възымааше и дааше дружинѣ на оружие. А дружина его кормяшеся, воюючи иныа страны, биющеся: «братие! постягнемъ по своемъ князи и по Русскои земли». Не жадааху: «мало ми есть, княже, 200 гривенъ»; некладаху на свои жены златыхъ обручеи, но хождааху жены ихь въ серебрѣ, и расплодили были землю Русскую. И за наше несытство навелъ Богъ на ны поганыа, и скоти наши, и села наша и имѣниа наша за тѣми суть; а мы злыхъ своихъ не останемъ. Писано бо есть: богатество, неправдою събираемо, скоро извѣется; и пакы: събираетъ, а не вѣсть кому събираетъ; и пакы: луче малое праведнику, паче богатства грѣшнихъ многа. Да отселѣ, братие възлюбленнаа, останемся отъ несытства своего; но доволны будемъ уроки нашими. Яко и Павелъ пишетъ: ему же дань, то дань, а ему же урокъ, то урокъ; никому же насилиа творяще, милостинею цвѣтуще, страннолюбиемъ вь страсѣ Божии и правовѣрии свое спасение сьдѣвающе, да и здѣ добрѣ поживше, и тамо вѣчнѣи жизни причастници будемъ съ всѣми свѣтло пострадавшими и вѣнчавшимися, ихже хощемъ подвиги и борениа въспомянути, творящихъ правду въ всяко время. Злыхъ же властолюбецъ и братоненавидецъ нрава да отбѣгнемъ, ихже огнь ожидаа вь вѣкы не въздремлетъ. Сиа же и таковаа вся оставльше, кь преждепомянутѣи повѣсти възвратимся. Отъ начала Русскиа земля до княжениа великаго князя Ивана Василиевича, Московскаго, и Владимерскаго, и Суждалскаго, и Новогородскаго, и Смоленскаго, и Тверскаго, и Рязанскаго, и Устьюжскаго, и Югорскаго, и Пермьскаго, и Емскаго, и Асытскаго, и иныхъ многыхъ земль государя, сѣдшу ему княжити послѣ отца своего, великаго князя Василиа Ивановича, сущу ему трею лѣтъ отъ рода, мати же его Елена, девятыиженадесять отъ Рюрика, прьваго князя Русскаго.