В лѣто 6362 [854]. Начало земли Рускои. Живяху кождо съ родомъ своимъ на своихъ мѣстех и странахъ, владѣюща кождо родомъ своимъ. И быша три братия: единому имя Кии, второму же имя Щекъ, третьему же имя Хоривъ, а сестра их Лыбедь. И сѣдяше Кыи на горѣ, идѣже нынѣ увоз Боричевъ, и бѣ с родомъ своимъ; а братъ его Щекъ на друзии горѣ, от него же прозвася Щековица; а третии Хоривъ, от него же прозвася Хоривица. И сотвориша градокъ, во имя брата своего старѣишаго и наркоша имя Кыевъ. И бяше около их лѣсъ и боръ великъ, и бяху ловища звѣрие. И бѣша мужи мудри и смысленѣ, нарѣчахуся поляне, и до сего дне от них же суть кыянѣ; бяху же поганѣ, жруще озером и кладязем и рощениемъ, якоже прочии погани.

В лѣто 6557 [1049]. Мѣсяца марта въ 4, въ день суботныи, сгорѣ святая Софѣя; бѣаше же честно устроена и украшена, 13 верхы имущи. а ту стояла святая Софѣя конець Пискуплѣ улицѣ, идеже нынѣ поставилъ Сотъке церковь камену святого Бориса и Глѣба над Волховомъ.

В лѣто 6557 [1049]. Месяца марта 4 въ день суботныи сгорѣ церкви святаа Софиа; бѣаше же честно устроена и украшена, 13 верхы имуща, а стояла конець Пискупли улици над Влъховом, идѣже нынѣ поставилъ Сотко церковь камену святого Бориса и Глѣба.

В лѣто 6557 [1049]. Месяця марта въ 4, въ день суботныи, сгорѣ церкви Святая София. Бяше же честно устроенна и украшена, 13 верхъ имуща, а стояла конець Пискупли улици надъ Волховомъ, идеже нынѣ постави Сотко церковь каменну святого Бориса и Глѣба.

Въ лѣто 6557 [1049]. Мѣсяца марта вь 4 день, въ день суботныи, съгорѣ церкви святаа Софиа въ Новѣгородѣ; бяше же честно устроена и украшена, 13 врьховъ имуща, а стоала конецъ Пискупли улици, надъ Вльхвомъ, идеже нынѣ постави Сьтокмо церковь каменну Бориса и Глѣба.

В лѣто 6623 [1115]. Заложи Воигостъ церковь святого Феодора Тирона среди двою улиць, Щерковѣ и Розважи.

А Рожнѣдъ заложи церковь святого Николу на Иаковли улицѣ.