В лѣто 6706 [1198]. Заложи боголюбивыи архиепископъ Мантурѣи въ Русѣ въ своемь манастырѣ церковъ камену святого Преображениа; и начаша ю дѣлати мѣсяца маия въ 21, а кончаша мѣсяца июля въ 31; и святи церковъ на Успение святѣи Богородици, и створи праздникъ честенъ и службу створи, и помолися, сице глаголя: «Господи Боже, призри съ небесѣ и вижь, и посѣти винограда своего, и сверши еже насади десница твоя; и призри на церковъ сию, юже создах рабъ твои, архиепископъ Мантурии, въ имя святого твоего Преображениа: да еще кто помолится въ церкви сеи с вѣрою, то услыши молитву его, и отпусти грѣхы его молитвами святыя богородица и всѣх святых твоих, аминь». И веселяшеться блаженыи сердцемъ и душею, устроивъ собѣ память вѣчную и всѣм крестианом честныи монастырь.

В то же лѣто, веснѣ, преставистася 2 сына у Ярослава: Изяславъ бяше посаженъ на Луках княжити и от литвы оплечье Новугороду, и тамо преставися; а Ростиславъ в Новѣгородѣ; и оба положена быста у святого Георгиа в манастырѣ.

В то же лѣто заложи церковь камену князь великыи Ярославъ, сынъ Володимирь, внукь Мьстиславль, во имя святого Спаса Преображениа в Новѣгородѣ в Нередицахъ; и начаша дѣлати июня въ 8 день, на святого Федора, а концаша септября.

На тую же осень приидоша полочанѣ с литвою на Луки и пожгоша хоромы, а лучанѣ устерегошася, избыша в городѣ

Того же лѣта заложиша церковь камену святого пророка Ильи на Холмѣ

На ту же зиму ходи князь Ярославъ с новгородци и со плесковици и с новоторжьци и с ладожаны и со всею областью новгородчкою к Полотску, и устрѣтоша полочанѣ с поклономъ на озерѣ Касоплѣ; и вземше миръ, възъвратишася в Новъгород: Богъ бо не вдалъ кровопролитья крестияномъ.

В лѣто 6706 [1198]. Заложиша церковь камену в Русѣ святое Преображение боголюбивыи архиепископь Мантирии; начаша дѣлати месяца маия 21, а кончаша месяца июля 31; и веселяшеся блаженыи срдцемь и душею, устроив себѣ память вѣчную и всѣмь христианом честныи монастырь

Тои же весны преставистася два сына у Ярослава: Изяслав бѣше посажен на Луках княжити, и от литвы заборола Новуграду, а Ростислав в Новѣградѣ; и оба положена бысть у святого Георгиа в монастырѣ.

В то же лѣто заложи церковь камену князь великии Ярослав, сынъ Володимирь, внук Мстиславль, въ имя святого Спаса Преображение в Нередицах.

Того же лѣта заложь Ревша церковь камену святого пророка Ильи на Хлъмѣ. А Полюжая постави святую Евфимию церковь в монастырѣ.

В лѣто 6706 [1198]. Преставишася у князя Ярослава два сына, Изяславъ и Ростиславъ, и положена быста в монастыри у святого Георгия.

Тоя же зыми, 6706 [1198] лѣта, прииде ис Чернигова къ Новугороду Ярополкь Ярославичь, на Врьбное въскресение, мѣсяца марта; и сидѣвшуему 6 мѣсяць, и выгнаша его изъ Новагорода, и послаша опять по Ярослава въ Новый Торгъ; иде Ярославъ съ Нового Торгу въ Володимеръ, позванъ великимъ княземъ Всеволодомъ. Идоша изъ Новагорода преднии мужи и сотьскии, и пояша Ярослава съ всею правдою и честию; и прииде на зиму, по Крещении за недѣлю, и сѣде на столѣ своемъ, и обняся съ людми, и добро все бысть. И Мирошку приведе посадника, сѣдѣль 2 лѣта за Новгородъ, и вси приидоша здрави; и ради быша вси.

Того же лѣта архиепископъ Мартиреи постави церковь святаго Никифора на Островѣ.

Того же лѣта постави манастырь святыа Еуфимиа, въ Плотникохъ, Полюдшаа городщинича Жирошкина дочи.

Того же лѣта преставися Давыдь Ростиславичь въ Смоленскѣ, и сѣде сынь его Мьстиславь въ Смоленскѣ

Въ томъ лѣтѣ посла великии князь Всеволодъ на епископьство Павла въ Переяславль Рускый.

Того же лѣта родися у великого князя сынь Иванъ, августа 28

Того же лѣта архиепископь Мартиреи заложи въ Русѣ церковь святаго Спаса каменну; начаша дѣлати мѣсяца маиа въ 21, а кончаша иулиа 31. И святи еа на Успение святыа Богородица, и сътвори праздникъ честень и службу, и помолися Богу, глаголя сице: «Господи Боже! призри съ небесе, и виждь, и посѣти винограда своего, иже насади и съврьши десница твоа».

Въ то же лѣто преставистася два сына у Ярослава у Володимерича: Изяславъ бяше посажень былъ на Лукахъ княжити, отъ литвы плече Новугороду, и тамо преставися, а Ростиславъ въ Новѣгородѣ; и оба положена бысть у святаго Георгиа вь манастыри.

Въ то же лѣто заложи князь Ярославъ Володимеричь церковь въ Новѣгородѣ святаго Спаса въ Нередичахъ; и начаша дѣлати мѣсяца июня въ 8, на святаго Феодора, а кончаша сентебря.