В лѣто 6707 [1199]. Приславши Всеволод выведе Ярослава из Новагорода и веде и к собѣ; а из Новагорода позва владыку и посадника Мирошьку и вячьшии мужи по сынъ. Яко быша на озерѣ Серегирѣ, преставися рабъ божии архиепископъ новгородчкыи владыка Мантирии августа въ 24; и, привезъше, положиша и въ притворѣ святыя Софѣя. Идоша мужи с посадникомъ и с Михалкомъ ко Всеволоду; и прия их с великою честью и вда имъ сына Святослава; а в Новъгород присла, сдумавъ с посадникомъ и с новгородци, и введе въ епискупью Митрофана, богомъ избрана; и весь Новъгород, шедши, съ честью посадиша и, дондеже будет от митрополита позвание: и тогда поидеши на поставление.

В то же лѣто заложиша церковь камену святыхь мученикь 40, с Прокшею с Малышевицемъ.

Того же лѣта постави церковь княгыни Ярославляя и манастырь устрои святыя Богородица Рожество, и игумению постави Завижюю.

В то же лѣто исписаша церковь святого Спаса на Городищи; а в Русѣ такоже святого Спаса подписаша в монастырѣ владычнѣ.

И по сих прииде князь Святославъ в Новъгород, сынъ Всеволожь, внукъ Юрьевъ, генваря въ 30, и посадиша и на столѣ въ святѣи Софѣи, и обрадовася всь Новъгород.

В то же лѣто в Русѣ город обложиша.

В лѣто 6707 [1199]. Постави Ярославляя церковь святую Богородицу на Михалицѣ.

Того же лѣта присла Всеволод, выведе Ярослава из Новаграда и веде и к собѣ, да позва из Новаграда владыку, а посадника Мирошку, и вячшии мужи по сынъ; и яко быша на озерѣ Серегирѣ, преставися рабь Божии архиепископь Новгородскыи Мантирии, августа 24, и привезше, и положиша и в притворѣ святыа Софиа. И идоша мужи с посадником и с Михалком къ Всеволоду, и приа его с великою чьстию, и вда им сынъ Святослав. А в Новград присла, сдумав с посадником и с новгородци, и введе въ епископью Митрофана, Богом избранна, и всь Новград, шедше, съ честию посадишя.

В то же лѣто заложиша церковь камену Святых мученик 40 с Прокшею с Малышевичем.

Прииде же князь Святослав в Новград на стол, сынъ Всеволож, внук Юрьев, генваря 1, и посадиша и на столѣ въ святѣи Софии, и обрадовася всь Новград.

В то же лѣто в Русѣ град обложишя.

Прииде князь Святославъ в Новъгородъ на столъ, сынъ Всеволожь, внукъ Юрьевъ, генваря 23, и посадиша и на столѣ въ Святѣи Софии, и обрадовася весь Новъгородъ.

Того же лѣта градъ обложиша Русу.

Въ лѣто 6707 [1199]. Преставися сыновець великого князя Всеволода, Ярославъ Мьстиславичь, внукь Юриа Долгорукого, въ Переяславли Рускомъ.

Тоя же осени приидоша полочане на Луки съ литвою, и пожгоша хоромы, а лучанѣ избыша въ городѣ.

Того же лѣта князь великии Всеволодъ Юриевичь, априля 1, ходи на половци. Половци же слышавше походъ его бѣжаша съ вежами прочь; князь же великии ходи по становищемъ ихь възлѣ Донъ, онѣмъ же безбожнымъ побѣгшимъ прочь, князь же великии възвратися къ Володимерю и вънииде июня 6, на память преподобнаго Илариона

Того же лѣта заложиша церковь каменну въ Новѣгородѣ на Холмѣ.

Того же лѣта бысть пожаръ въ Володимерѣ іюня 21, въ суботу, горѣ до вечера, церквей згорѣло 16, а города мало не половина.

На ту же зыму ходи князь Ярославъ Володимеричь съ новогородци на полочанъ къ Полотцку, съ плесковичи и съ всею областию Новогородскою; и усрѣтоша ихъ полочанѣ съ поклономъ на озерѣ на Косоплѣ, и вземше миръ възвратишася въ Новгородъ: Богь бо не вда кровопролитиа христианомъ.