В лѣто 6708 [1200]. Литва взяша Ловоть и до Налюча, с Бѣлѣи и до Свинорта и до Ворча середу; и нагнашася новгородци по них и до Чернянъ, и бишася с ними и убиша у нихъ мужь въ Клинѣ 80, а новгородець 15: Рагуилу Прокшиница с братомъ Олексою, Юрья Сбыщиница, Ратмира Нѣжатиница, Страшка серебряника вѣсца, Внѣзда Ягиница, Луку Мирошкинъ отрокъ, Микиту Лазоревица, Жирошку Огасовица, Осипа подвоискаго, Романа Потка, инѣх 4 муж; а полонъ всь отяша, а избытокъ убѣжа.

В то же лѣто иде Нездыла Пьхичиниць на Лукы воеводою; иде с Лукъ малою дружиною в Лотыголу на сторонѣ, и засташа я въ одринах, и убиша их 40 муж, а жены их и дѣти поимаша, а сами приидоша на Лукы вси здрави; а кто бѣ не пошелъ по них Столбовичи с николикымъ дружины, а у тѣх, бывши, куны поимаша.

В лѣто 6708 [1200]. Ловоть взяша литва и до Налючи, с Бѣлои до Свинорта, и до Ворца середу; и гнашася новгородци по них до Чернян, и бишася с ними, и убиша у них мужеи в Клинѣ 80, а новгородцов 15.

В лѣто 6708 [1200]. Ловоть взяша литва, и новогородьци гнашася по них и до Чернянъ, и бишася с ними въ Клинѣ, с литвою, и убиша у них 80 мужь, а новогородьцевъ паде 15 мужь, а полонъ весь отъяша, а избытокъ убѣжа.

Въ лѣто 6708 [1200]. Преставися Ярославь Всеволодичь Святославича Черниговскии.

Тоя же осени приидоша новогородци въ Володимиръ къ великому князю Всеволоду Юриевичу, лучшии мужи, Мирошкина чадь, рекуче: «Ты господинь, ты царь, тебѣ отчина Новьгородъ; а нынѣ просимъ у тебе сына Новогороду». Князъ же великии здума з дружиною своею, и утвръди ихъ крестомъ на всеи воли своеи, дасть имъ сынъ Святославъ, Новогородци же пояша его у святыа Богородица съ благословениемъ у епископа Иоанна; и отпусти ихъ князь великии съ честию и съ любовию. И иде Святославъ княжити декабря 12, братиа же проводиша его съ честию; приведъ посадиша его на столѣ въ Новѣгородѣ. А въ то же время князъ великии здумавъ съ посадникомъ и съ новогородци, и выведе въ епископию Митрофана, Богомъ избранна; и весь Новьгородъ шедше, съ честию посадиша его. «Донележе будетъ отъ митрополита позвание, и тогда поидеши на поставление».

Того же заложи церковь камену Святыхъ Мученикь 40 съ Прокшею съ Малишевычемь.

Того же лѣта постави церковь княгины Ярославля, манастырь сътвори Рожество святыа Богородица, и игуменую постави Завжую посадницу.

Того же лѣта исписаша церкви 2, святаго Спаса на Городищи и святаго Спаса въ Русѣ.

Въ то же лѣто въ Русѣ обложиша городъ

Того же лѣта взяша литва Ловоть и до Налюча, со Белие и до Свинорта; и гнашася новогородци по нихъ и до Чернянъ, и бишася съ ними, и убиша у нихъ въ Клинѣ мужеи 80, а новогородецъ 15: Рагуила Прокопииничу съ братомъ, Гюргіа Събыкшинича, Ратмира Нѣжатнича, Страшка серебряного вѣсца, Внѣзда Ягинича, Луку Мирошкина отрока, Микиту Лазоревича, Жирошку, Осипа подвойского, Романа и иныхъ 4 мужи; а полонъ весь отъяша.

Въ то же лѣто иде Нѣздыло Пѣхтинычь воеводою на Лукы; иде съ малою дружиною съ Лукь на Лотиголу на торонь, и заставаша а въ одринахъ, убиша ихъ 40 мужъ, а жены ихъ и дѣти поимаша, а сами приидоша на Луки всѣ здоровы; а кто бѣ не пошелъ съ ними съ Молбовичь съ нѣколкомъ дружины, а тѣхъ бывше и куны поимаша.